तेषाम् असुराणां तिस्रः पुर आसन्न् अयस्मय्य् अवमाथ रजताथ हरिणी ता देवा जेतुं नाशक्नुवन् ता उपसदैवाजिगीषन् तस्माद् आहुर् यश् चैवं वेद यश् च न । उपसदा वै महापुरं जयन्तीति त इषुꣳ सम् अस्कुर्वताग्निम् अनीकꣳ सोमꣳ शल्यं विष्णुं तेजनम् । ते ऽब्रुवन् क इमाम् असिष्यतीति ॥ रुद्र इत्य् अब्रुवन् रुद्रो वै क्रूरः सो ऽस्यत्विति सो ऽब्रवीत् । वरं वृणा अहम् एव पशूनाम् अधिपतिर् असानीति तस्माद् रुद्रः पशूनाम् अधिपतिस् ताꣳ रुद्रो ऽवासृजत् स तिस्रः पुरो भित्त्वैभ्यो लोकेभ्यो ऽसुरान् प्राणुदत यद् उपसद उपसद्यन्ते भ्रातृव्यपराणुत्तयै नान्याम् आहुतिम् पुरस्ताज् जुहुयात् । यद् अन्याम् आहुतिम् पुरस्ताज् जुहुयात् अन्यन् मुखं कुर्यात् स्रुवेणाघारम् आ घारयति यज्ञस्य प्रज्ञात्यै पराङ् अतिक्रम्य जुहोति पराच एवैभ्यो लोकेभ्यो यजमानो भ्रातृव्यान् प्र णुदते पुनर् अत्याक्रम्योपसदं जुहोति प्रणुद्यैवैभ्यो लोकेभ्यो भ्रातृव्याञ्जित्वा भ्रातृव्यलोकम् अभ्यारोहति देवा वै याः प्रातर् उपसद उपासीदन्न् अह्नस् ताभिर् असुरान् प्राणुदन्त याः सायꣳ रात्रियै ताभिः । यत् सायम्प्रातर् उपसदः उपसद्यन्ते ऽहोरात्राभ्याम् एव तद् यजमानो भ्रातृव्यान् प्र णुदते याः प्रातर् याज्याः स्युस् ताः सायम् पुरोऽनुवाक्याः कुर्याद् अयातयामत्वाय तिस्र उपसद उपैति त्रय इमे लोका इमान् एव लोकान् प्रीणाति षट् सम् पद्यन्ते षड् वा ऋतव ऋतून् एव प्रीणाति द्वादशाहीने सोम उपैति द्वादश मासाः संवत्सरः संवत्सरम् एव प्रीणाति चतुर्विꣳशतिः सम् पद्यन्ते चतुर्विꣳशतिर् अर्धमासा अर्धमासान् एव प्रीणाति । आराग्राम् अवान्तरदीक्षाम् उपेयाद् यः कामयेत । अस्मिन् मे लोके ऽर्धुकꣳ स्याद् इत्य् एकम् अग्रे ऽथे द्वाव् अथ त्रीन् अथ चतुर एषा वा आराग्राऽवान्तरदीक्षाऽस्मिन्न् एवास्मै लोके ऽर्धुकम् भवति परोवरीयसीम् अवान्तरदीक्षाम् उपेयाद् यः कामयेत । अमुष्मिन् मे लोके ऽर्धुकꣳ स्याद् इति चतुरो ऽग्रे ऽथे त्रीन् अथ द्वाव् अथैकम् एषा वै परोवरीयस्य् अवान्तरदीक्षाऽमुष्मिन्न् एवास्मै लोके ऽर्धुकं भवति ॥
teṣām asurāṇāṃ tisraḥ pura āsann ayasmayy avamātha rajatātha hariṇī tā devā jetuṃ nāśaknuvan tā upasadaivājigīṣan tasmād āhur yaś caivaṃ veda yaś ca na | upasadā vai mahāpuraṃ jayantīti ta iṣum̐ sam askurvatāgnim anīkam̐ somam̐ śalyaṃ viṣṇuṃ tejanam | te 'bruvan ka imām asiṣyatīti || rudra ity abruvan rudro vai krūraḥ so 'syatviti so 'bravīt | varaṃ vṛṇā aham eva paśūnām adhipatir asānīti tasmād rudraḥ paśūnām adhipatis tām̐ rudro 'vāsṛjat sa tisraḥ puro bhittvaibhyo lokebhyo 'surān prāṇudata yad upasada upasadyante bhrātṛvyaparāṇuttayai nānyām āhutim purastāj juhuyāt | yad anyām āhutim purastāj juhuyāt anyan mukhaṃ kuryāt sruveṇāghāram ā ghārayati yajñasya prajñātyai parāṅ atikramya juhoti parāca evaibhyo lokebhyo yajamāno bhrātṛvyān pra ṇudate punar atyākramyopasadaṃ juhoti praṇudyaivaibhyo lokebhyo bhrātṛvyāñjitvā bhrātṛvyalokam abhyārohati devā vai yāḥ prātar upasada upāsīdann ahnas tābhir asurān prāṇudanta yāḥ sāyam̐ rātriyai tābhiḥ | yat sāyamprātar upasadaḥ upasadyante 'horātrābhyām eva tad yajamāno bhrātṛvyān pra ṇudate yāḥ prātar yājyāḥ syus tāḥ sāyam puro'nuvākyāḥ kuryād ayātayāmatvāya tisra upasada upaiti traya ime lokā imān eva lokān prīṇāti ṣaṭ sam padyante ṣaḍ vā ṛtava ṛtūn eva prīṇāti dvādaśāhīne soma upaiti dvādaśa māsāḥ saṃvatsaraḥ saṃvatsaram eva prīṇāti caturvim̐śatiḥ sam padyante caturvim̐śatir ardhamāsā ardhamāsān eva prīṇāti | ārāgrām avāntaradīkṣām upeyād yaḥ kāmayeta | asmin me loke 'rdhukam̐ syād ity ekam agre 'the dvāv atha trīn atha catura eṣā vā ārāgrā'vāntaradīkṣā'sminn evāsmai loke 'rdhukam bhavati parovarīyasīm avāntaradīkṣām upeyād yaḥ kāmayeta | amuṣmin me loke 'rdhukam̐ syād iti caturo 'gre 'the trīn atha dvāv athaikam eṣā vai parovarīyasy avāntaradīkṣā'muṣminn evāsmai loke 'rdhukaṃ bhavati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.