यज्ञेन वै प्रजापतिः प्रजा असृजत ता उपयड्भिर् एवासृजत यद् उपयज उपयजति प्रजा एव तद् यजमानः सृजते जघनार्धाद् अव द्यति जघनार्धाद् धि प्रजाः प्रजायन्ते स्थविमतो ऽव द्यति स्थविमतो हि प्रजाः प्रजायन्ते । असम्भिन्दन्न् अव द्यति प्राणानाम् असम्भेदाय न पर्यावर्तयति यत् पर्यावर्तयेद् उदावर्तः प्रजा ग्राहुकः स्यात् समुद्रं गच्छ स्वाहेत्य् आह रेतः एव तद् दधाति । अन्तरिक्षं गच्छ स्वाहेत्य् आह । अन्तरिक्षेणैवास्मै प्रजाः प्र जनयति । अन्तरिक्षꣳ ह्य् अनु प्रजाः प्रजायन्ते देवꣳ सवितारं गच्छ स्वाहेत्य् आह सवितृप्रसूत एवास्मै प्रजाः प्र जनयति । अहोरात्रे गच्छ स्वाहेत्य् आह । अहोरात्राभ्याम् एवास्मै प्रजाः प्र जनयति । अहोरात्रे ह्य् अनु प्रजाः प्रजायन्ते मित्रावरुणौ गच्छ स्वाहा इत्य् आह प्रजास्व् एव प्रजातासु प्राणापानौ दधाति सोमं गच्छ स्वाहेत्य् आह सौम्या हि देवतया प्रजाः । यज्ञं गच्छ स्वाहेत्य् आह प्रजा एव यज्ञियाः करोति छन्दाꣳसि गच्छ स्वाहेत्य् आह पशवो वै छन्दाꣳसि पशून् एवाव रुन्द्धे द्यावापृथिवी गच्छ स्वाहेत्य् आह प्रजा एव प्रजाता द्यावापृथिवीभ्याम् उभयतः परि गृह्णाति नभः दिव्यं गच्छ स्वाहेत्य् आह प्रजाभ्य एव प्रजाताभ्यो वृष्टिं नि यच्छति । अग्निं वैश्वानरं गच्छ स्वाहेत्य् आह प्रजा एव प्रजाता अस्याम् प्रति ष्ठापयति प्राणानां वा एषो ऽव द्यति यो ऽवद्यति गुदस्य मनो मे हार्दि यच्छेत्य् आह प्राणान् एव यथास्थानम् उप ह्वयते पशोर् वा आलब्धस्य हृदयꣳ शुग् ऋच्छति सा हृदयशूलम् अभि सम् एति यत् पृथिव्याꣳ हृदयशूलम् उद्वासयेत् पृथिवीꣳ शुचार्पयेत् । यद् अप्स्व् अपः शुचार्पयेत् । शुष्कस्य चार्द्रस्य च संधाव् उद् वासयत्य् उभयस्य शान्त्यै यं द्विष्यात् तं ध्यायेत् । शुचैवैनम् अर्पयति ॥
yajñena vai prajāpatiḥ prajā asṛjata tā upayaḍbhir evāsṛjata yad upayaja upayajati prajā eva tad yajamānaḥ sṛjate jaghanārdhād ava dyati jaghanārdhād dhi prajāḥ prajāyante sthavimato 'va dyati sthavimato hi prajāḥ prajāyante | asambhindann ava dyati prāṇānām asambhedāya na paryāvartayati yat paryāvartayed udāvartaḥ prajā grāhukaḥ syāt samudraṃ gaccha svāhety āha retaḥ eva tad dadhāti | antarikṣaṃ gaccha svāhety āha | antarikṣeṇaivāsmai prajāḥ pra janayati | antarikṣam̐ hy anu prajāḥ prajāyante devam̐ savitāraṃ gaccha svāhety āha savitṛprasūta evāsmai prajāḥ pra janayati | ahorātre gaccha svāhety āha | ahorātrābhyām evāsmai prajāḥ pra janayati | ahorātre hy anu prajāḥ prajāyante mitrāvaruṇau gaccha svāhā ity āha prajāsv eva prajātāsu prāṇāpānau dadhāti somaṃ gaccha svāhety āha saumyā hi devatayā prajāḥ | yajñaṃ gaccha svāhety āha prajā eva yajñiyāḥ karoti chandām̐si gaccha svāhety āha paśavo vai chandām̐si paśūn evāva runddhe dyāvāpṛthivī gaccha svāhety āha prajā eva prajātā dyāvāpṛthivībhyām ubhayataḥ pari gṛhṇāti nabhaḥ divyaṃ gaccha svāhety āha prajābhya eva prajātābhyo vṛṣṭiṃ ni yacchati | agniṃ vaiśvānaraṃ gaccha svāhety āha prajā eva prajātā asyām prati ṣṭhāpayati prāṇānāṃ vā eṣo 'va dyati yo 'vadyati gudasya mano me hārdi yacchety āha prāṇān eva yathāsthānam upa hvayate paśor vā ālabdhasya hṛdayam̐ śug ṛcchati sā hṛdayaśūlam abhi sam eti yat pṛthivyām̐ hṛdayaśūlam udvāsayet pṛthivīm̐ śucārpayet | yad apsv apaḥ śucārpayet | śuṣkasya cārdrasya ca saṃdhāv ud vāsayaty ubhayasya śāntyai yaṃ dviṣyāt taṃ dhyāyet | śucaivainam arpayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.