देवा वै यद् यज्ञे ऽकुर्वत तद् असुरा अकुर्वत ते देवा आग्रयणाग्रान् ग्रहान् अपश्यन् तान् अगृह्णत ततो वै ते ऽग्रम् पर्य् आयन् यस्यैवं विदुष आग्रयणाग्रा ग्रहा गृह्यन्ते ऽग्रम् एव समानानाम् पर्य् एति रुग्णवत्यर्चा भ्रातृव्यवतो गृह्णीयात् । भ्रातृव्यस्यैव रुक्त्वाग्रꣳ समानानाम् पर्य् एति ये देवा दिव्य् एकादश स्थेत्य् आह एतावतीर् वै देवतास् ताभ्य एवैनꣳ सर्वाभ्यो गृह्णाति । एष ते योनिर् विश्वेभ्यस् त्वा देवेभ्य इति आह वैश्वदेवो ह्य् एष देवतया वाग् वै देवेभ्यो ऽपाक्रामद् यज्ञायातिष्ठमाना ते देवा वाच्य् अपक्रान्तायां तूष्णीं ग्रहान् अगृह्णत साऽमन्यत वाग् अन्तर् यन्ति वै मेति साऽऽग्रयणम् प्रत्य् आऽगच्छत् तद् आग्रयणस्याऽऽग्रयणत्वम् तस्माद् आग्रयणे वाग् वि सृज्यते यत् तूष्णीम् पूर्वे ग्रहा गृह्यन्ते यथा त्सारीयति म आख इयति नाप रात्स्यामीत्य् उपावसृजत्य् एवम् एव तद् अध्वर्युर् आग्रयणं गृहीत्वा यज्ञम् आरभ्य वाचं वि सृजते त्रिर् हिं करोत्य् उद्गातॄन् एव तद् वृणीते प्रजापतिर् वा एष यद् आग्रयणो यद् आग्रयणं गृहीत्वा हिंकरोति प्रजापतिर् एव तत् प्रजा अभि जिघ्रति तस्माद् वत्सं जातं गौर् अभि जिघ्रति । आत्मा वा एष यज्ञस्य यद् आग्रयणः सवनेसवने ऽभि गृह्णात्य् आत्मन्न् एव यज्ञꣳ सं तनोति । उपरिष्टाद् आ नयति रेत एव तद् दधाति । अधस्ताद् उप गृह्णाति प्र जनयत्य् एव तत् । ब्रह्मवादिनो वदन्ति कस्मात् सत्याद् गायत्री कनिष्ठा छन्दसाꣳ सती सर्वाणि सवनानि वहतीति । एष वै गायत्रियै वत्सो यद् आग्रयणस् तम् एव तद् अभिनिवर्तꣳ सर्वाणि सवनानि वहति तस्माद् वत्सम् अपाकृतं गौर् अभि नि वर्तते ॥
devā vai yad yajñe 'kurvata tad asurā akurvata te devā āgrayaṇāgrān grahān apaśyan tān agṛhṇata tato vai te 'gram pary āyan yasyaivaṃ viduṣa āgrayaṇāgrā grahā gṛhyante 'gram eva samānānām pary eti rugṇavatyarcā bhrātṛvyavato gṛhṇīyāt | bhrātṛvyasyaiva ruktvāgram̐ samānānām pary eti ye devā divy ekādaśa sthety āha etāvatīr vai devatās tābhya evainam̐ sarvābhyo gṛhṇāti | eṣa te yonir viśvebhyas tvā devebhya iti āha vaiśvadevo hy eṣa devatayā vāg vai devebhyo 'pākrāmad yajñāyātiṣṭhamānā te devā vācy apakrāntāyāṃ tūṣṇīṃ grahān agṛhṇata sā'manyata vāg antar yanti vai meti sā''grayaṇam praty ā'gacchat tad āgrayaṇasyā''grayaṇatvam tasmād āgrayaṇe vāg vi sṛjyate yat tūṣṇīm pūrve grahā gṛhyante yathā tsārīyati ma ākha iyati nāpa rātsyāmīty upāvasṛjaty evam eva tad adhvaryur āgrayaṇaṃ gṛhītvā yajñam ārabhya vācaṃ vi sṛjate trir hiṃ karoty udgātṝn eva tad vṛṇīte prajāpatir vā eṣa yad āgrayaṇo yad āgrayaṇaṃ gṛhītvā hiṃkaroti prajāpatir eva tat prajā abhi jighrati tasmād vatsaṃ jātaṃ gaur abhi jighrati | ātmā vā eṣa yajñasya yad āgrayaṇaḥ savanesavane 'bhi gṛhṇāty ātmann eva yajñam̐ saṃ tanoti | upariṣṭād ā nayati reta eva tad dadhāti | adhastād upa gṛhṇāti pra janayaty eva tat | brahmavādino vadanti kasmāt satyād gāyatrī kaniṣṭhā chandasām̐ satī sarvāṇi savanāni vahatīti | eṣa vai gāyatriyai vatso yad āgrayaṇas tam eva tad abhinivartam̐ sarvāṇi savanāni vahati tasmād vatsam apākṛtaṃ gaur abhi ni vartate ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.