देवा वै यद् यज्ञे ऽकुर्वत तद् असुरा अकुर्वत ते देवा उपाꣳशौ यज्ञꣳ सꣳस्थाप्यम् अपश्यन् तम् उपाꣳशौ सम् अस्थापयन् ते ऽसुरा वज्रम् उद्यत्य देवान् अभ्य् आयन्त ते देवा बिभ्यत इन्द्रम् उपाधावन् तान् इन्द्रो ऽन्तर्यामेणान्तर् अधत्त तद् अन्तर्यामस्यान्तर्यामत्वम् । यद् अन्तर्यामो गृह्यते भ्रातृव्यान् एव तद् यजमानो ऽन्तर् धत्ते । अन्तस् ते दधामि द्यावापृथिवी अन्तर् उर्व् अन्तरिक्षम् इत्य् आह । एभिर् एव लोकैर् यजमानो भ्रातृव्यान् अन्तर् धत्ते ते देवा अमन्यन्त । इन्द्रो वा इदम् अभूद् यद् वयꣳ स्म इति ते ऽब्रुवन् मघवन्न् अनु न आ भजेति सजोषा देवैर् अवरैः परैश् चेत्य् अब्रवीत् । ये चैव देवाः परे ये चावरे तान् उभयान् अन्वाभजत् सजोषा देवैर् अवरैः परैश् चेत्य् आह ये चैव देवाः परे य चावरे तान् उभयान् अन्वाभजति । अन्तर्यामे मघवन् मादयस्वेत्य् आह यज्ञाद् एव यजमानं नान्तर् एति । उपयामगृहीतो ऽसीत्य् आह । अपानस्य धृत्यै यद् उभाव् अपवित्रौ गृह्येयाताम् प्राणम् अपानो ऽनु न्य् ऋच्छेत् प्रमायुकः स्यात् पवित्रवान् अन्तर्यामो गृह्यते । प्राणापानयोर् विधृत्यै प्राणापानौ वा एतौ यद् उपाꣳश्वन्तर्यामौ व्यान उपाꣳशुसवनः । यं कामयेत प्रमायुकः स्याद् इत्य् असꣳस्पृष्टौ तस्य सादयेत् । व्यानेनैवास्य प्राणापानौ वि च्छिनत्ति ताजक् प्रमीयते यं कामयेत सर्वम् आयुर् इयाद् इति सꣳस्पृष्टौ तस्य सादयेत् । व्यानेनैवास्य प्राणापानौ सं तनोति सर्वम् आयुर् एति ॥
devā vai yad yajñe 'kurvata tad asurā akurvata te devā upām̐śau yajñam̐ sam̐sthāpyam apaśyan tam upām̐śau sam asthāpayan te 'surā vajram udyatya devān abhy āyanta te devā bibhyata indram upādhāvan tān indro 'ntaryāmeṇāntar adhatta tad antaryāmasyāntaryāmatvam | yad antaryāmo gṛhyate bhrātṛvyān eva tad yajamāno 'ntar dhatte | antas te dadhāmi dyāvāpṛthivī antar urv antarikṣam ity āha | ebhir eva lokair yajamāno bhrātṛvyān antar dhatte te devā amanyanta | indro vā idam abhūd yad vayam̐ sma iti te 'bruvan maghavann anu na ā bhajeti sajoṣā devair avaraiḥ paraiś cety abravīt | ye caiva devāḥ pare ye cāvare tān ubhayān anvābhajat sajoṣā devair avaraiḥ paraiś cety āha ye caiva devāḥ pare ya cāvare tān ubhayān anvābhajati | antaryāme maghavan mādayasvety āha yajñād eva yajamānaṃ nāntar eti | upayāmagṛhīto 'sīty āha | apānasya dhṛtyai yad ubhāv apavitrau gṛhyeyātām prāṇam apāno 'nu ny ṛcchet pramāyukaḥ syāt pavitravān antaryāmo gṛhyate | prāṇāpānayor vidhṛtyai prāṇāpānau vā etau yad upām̐śvantaryāmau vyāna upām̐śusavanaḥ | yaṃ kāmayeta pramāyukaḥ syād ity asam̐spṛṣṭau tasya sādayet | vyānenaivāsya prāṇāpānau vi cchinatti tājak pramīyate yaṃ kāmayeta sarvam āyur iyād iti sam̐spṛṣṭau tasya sādayet | vyānenaivāsya prāṇāpānau saṃ tanoti sarvam āyur eti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.