Library·Atharvaveda Saṃhitā (Śaunaka)·18·18.3
इयं नारी पतिलोकं वृणाना नि पद्यत उप त्वा मर्त्य प्रेतम् । धर्मं पुराणम् अनुपालयन्ती तस्यै प्रजां द्रविणं चेह धेहि ॥१॥
iyaṃ nārī patilokaṃ vṛṇānā ni padyata upa tvā martya pretam | dharmaṃ purāṇam anupālayantī tasyai prajāṃ draviṇaṃ ceha dhehi ||1||
Sanskrit only: no published translation is held for this verse.
उद् ईर्ष्व नार्य् अभि जीवलोकं गतासुम् एतम् उप शेष एहि । हस्तग्राभस्य दधिषोस् तवेदं पत्युर् जनित्वम् अभि सं बभूथ ॥२॥
ud īrṣva nāry abhi jīvalokaṃ gatāsum etam upa śeṣa ehi | hastagrābhasya dadhiṣos tavedaṃ patyur janitvam abhi saṃ babhūtha ||2||
Rise, come unto the world of life, O woman: come, he is lifeless by whose side thou liest. Wifehood with this thy husband was thy portion, who took thy hand and wooed thee as a lover.
Translated by Ralph T. H. Griffith (1896)This is the translator's rendering of the same verse where it occurs at RV 10.18.8; the wording of this text may differ in places.
अपश्यं युवतिं नीयमानां जीवां मृतेभ्यः परिणीयमानाम् । अन्धेन यत् तमसा प्रावृतासीत् प्राक्तो अपाचीम् अनयं तद् एनाम् ॥३॥
apaśyaṃ yuvatiṃ nīyamānāṃ jīvāṃ mṛtebhyaḥ pariṇīyamānām | andhena yat tamasā prāvṛtāsīt prākto apācīm anayaṃ tad enām ||3||
Sanskrit only: no published translation is held for this verse.
प्रजानत्य् अघ्न्ये जीवलोकं देवानां पन्थाम् अनुसंचरन्ती । अयं ते गोपतिस् तं जुषस्व स्वर्गं लोकम् अधि रोहयैनम् ॥४॥
prajānaty aghnye jīvalokaṃ devānāṃ panthām anusaṃcarantī | ayaṃ te gopatis taṃ juṣasva svargaṃ lokam adhi rohayainam ||4||
Sanskrit only: no published translation is held for this verse.
उप द्याम् उप वेतसम् अवत्तरो नदीनाम् । अग्ने पित्तम् अपाम् असि ॥५॥
upa dyām upa vetasam avattaro nadīnām | agne pittam apām asi ||5||
Sanskrit only: no published translation is held for this verse.
यं त्वम् अग्ने समदहस् तम् उ निर् वापय पुनः । क्याम्बूर् अत्र रोहतु शाण्डदूर्वा व्यल्कशा ॥६॥
yaṃ tvam agne samadahas tam u nir vāpaya punaḥ | kyāmbūr atra rohatu śāṇḍadūrvā vyalkaśā ||6||
Cool, Agni, and again refresh the spot which thou hast scorched and burnt. Here let the water-lily grow, and tender grass and leafy herb.
Translated by Ralph T. H. Griffith (1896)This is the translator's rendering of the same verse where it occurs at RV 10.16.13; the wording of this text may differ in places.
इदं त एकम् पुर ऊ त एकं तृतीयेन ज्योतिषा सं विशस्व । संवेशने तन्वा चारुर् एधि प्रियो देवानां परमे सधस्थे ॥७॥
idaṃ ta ekam pura ū ta ekaṃ tṛtīyena jyotiṣā saṃ viśasva | saṃveśane tanvā cārur edhi priyo devānāṃ parame sadhasthe ||7||
Here is one light for thee, another yonder: enter the third and he therewith united. Uniting with a body be thou welcome, dear to the Gods in their sublimest birthplace.
Translated by Ralph T. H. Griffith (1896)This is the translator's rendering of the same verse where it occurs at RV 10.56.1; the wording of this text may differ in places.
उत् तिष्ठ प्रेहि प्र द्रवौकः कृणुष्व सलिले सधस्थे । तत्र त्वं पितृभिः संविदानः सं सोमेन मदस्व सं स्वधाभिः ॥८॥
ut tiṣṭha prehi pra dravaukaḥ kṛṇuṣva salile sadhasthe | tatra tvaṃ pitṛbhiḥ saṃvidānaḥ saṃ somena madasva saṃ svadhābhiḥ ||8||
Sanskrit only: no published translation is held for this verse.
प्र च्यवस्व तन्वं सं भरस्व मा ते गात्रा वि हायि मो शरीरम् । मनो निविष्टम् अनुसंविशस्व यत्र भूमेर् जुषसे तत्र गछ ॥९॥
pra cyavasva tanvaṃ saṃ bharasva mā te gātrā vi hāyi mo śarīram | mano niviṣṭam anusaṃviśasva yatra bhūmer juṣase tatra gacha ||9||
Sanskrit only: no published translation is held for this verse.
वर्चसा मां पितरः सोम्यासो अञ्जन्तु देवा मधुना घृतेन । चक्षुषे मा प्रतरं तारयन्तो जरसे मा जरदष्टिं वर्धन्तु ॥१०॥ १३
varcasā māṃ pitaraḥ somyāso añjantu devā madhunā ghṛtena | cakṣuṣe mā prataraṃ tārayanto jarase mā jaradaṣṭiṃ vardhantu ||10|| 13
Sanskrit only: no published translation is held for this verse.
वर्चसा मां सम् अनक्त्व् अग्निर् मेधां मे विष्णुर् न्य् अनक्त्व् आसन् । रयिं मे विश्वे नि यछन्तु देवाः स्योना मापः पवनैः पुनन्तु ॥११॥
varcasā māṃ sam anaktv agnir medhāṃ me viṣṇur ny anaktv āsan | rayiṃ me viśve ni yachantu devāḥ syonā māpaḥ pavanaiḥ punantu ||11||
Sanskrit only: no published translation is held for this verse.
मित्रावरुणा परि माम् अधाताम् आदित्या मा स्वरवो वर्धयन्तु । वर्चो म इन्द्रो न्य् अनक्तु हस्तयोर् जरदष्टिं मा सविता कृणोतु ॥१२॥
mitrāvaruṇā pari mām adhātām ādityā mā svaravo vardhayantu | varco ma indro ny anaktu hastayor jaradaṣṭiṃ mā savitā kṛṇotu ||12||
Sanskrit only: no published translation is held for this verse.
यो ममार प्रथमो मर्त्यानां यः प्रेयाय प्रथमो लोकम् एतम् । वैवस्वतं संगमनं जनानां यमं राजानं हविषा सपर्यत ॥१३॥
yo mamāra prathamo martyānāṃ yaḥ preyāya prathamo lokam etam | vaivasvataṃ saṃgamanaṃ janānāṃ yamaṃ rājānaṃ haviṣā saparyata ||13||
Sanskrit only: no published translation is held for this verse.
परा यात पितर आ च यातायं वो यज्ञो मधुना समक्तः । दत्तो अस्मभ्यं द्रविणेह भद्रं रयिं च नः सर्ववीरं दधात ॥१४॥
parā yāta pitara ā ca yātāyaṃ vo yajño madhunā samaktaḥ | datto asmabhyaṃ draviṇeha bhadraṃ rayiṃ ca naḥ sarvavīraṃ dadhāta ||14||
Sanskrit only: no published translation is held for this verse.
कण्वः कक्षीवान् पुरुमीढो अगस्त्यः श्यावाश्वः सोभर्य् अर्चनानाः । विश्वामित्रो ऽयं जमदग्निर् अत्रिर् अवन्तु नः कश्यपो वामदेवः ॥१५॥
kaṇvaḥ kakṣīvān purumīḍho agastyaḥ śyāvāśvaḥ sobhary arcanānāḥ | viśvāmitro 'yaṃ jamadagnir atrir avantu naḥ kaśyapo vāmadevaḥ ||15||
Sanskrit only: no published translation is held for this verse.
विश्वामित्र जमदग्ने वसिष्ठ भरद्वाज गोतम वामदेव । शर्दिर् नो अत्रिर् अग्रभीन् नमोभिः सुसंशासः पितरो मृडता नः ॥१६॥
viśvāmitra jamadagne vasiṣṭha bharadvāja gotama vāmadeva | śardir no atrir agrabhīn namobhiḥ susaṃśāsaḥ pitaro mṛḍatā naḥ ||16||
Sanskrit only: no published translation is held for this verse.
कस्ये मृजाना अति यन्ति रिप्रम् आयुर् दधानाः प्रतरं नवीयः । आप्यायमानाः प्रजया धनेनाध स्याम सुरभयो गृहेषु ॥१७॥
kasye mṛjānā ati yanti ripram āyur dadhānāḥ prataraṃ navīyaḥ | āpyāyamānāḥ prajayā dhanenādha syāma surabhayo gṛheṣu ||17||
Sanskrit only: no published translation is held for this verse.
अञ्जते व्य् अञ्जते सम् अञ्जते क्रतुं रिहन्ति मधुनाभ्य् अञ्जते । सिन्धोर् उच्छ्वासे पतयन्तम् उक्षणं हिरण्यपावाः पशुम् आसु गृह्नते ॥१८॥
añjate vy añjate sam añjate kratuṃ rihanti madhunābhy añjate | sindhor ucchvāse patayantam ukṣaṇaṃ hiraṇyapāvāḥ paśum āsu gṛhnate ||18||
They balm him, balm him over balm him thoroughly, caress the mighty strength and balm it with the meath. They seize the flying Steer at the stream's breathing-place: cleansing with gold they grasp the Animal herein.
Translated by Ralph T. H. Griffith (1896)This is the translator's rendering of the same verse where it occurs at RV 9.86.43; the wording of this text may differ in places.
यद् वो मुद्रं पितरः सोम्यं च तेनो सचध्वं स्वयशसो हि भूत । ते अर्वाणः कवय आ शृणोत सुविदत्रा विदथे हुयमानाः ॥१९॥
yad vo mudraṃ pitaraḥ somyaṃ ca teno sacadhvaṃ svayaśaso hi bhūta | te arvāṇaḥ kavaya ā śṛṇota suvidatrā vidathe huyamānāḥ ||19||
Sanskrit only: no published translation is held for this verse.
ये अत्रयो अङ्गिरसो नवग्वा इष्टावन्तो रातिषाचो दधानाः । दक्षिणावन्तः सुकृतो य उ स्थासद्यास्मिन् बर्हिषि मादयध्वम् ॥२०॥ १४
ye atrayo aṅgiraso navagvā iṣṭāvanto rātiṣāco dadhānāḥ | dakṣiṇāvantaḥ sukṛto ya u sthāsadyāsmin barhiṣi mādayadhvam ||20|| 14
Sanskrit only: no published translation is held for this verse.
अधा यथा नः पितरः परासः प्रत्नासो अग्न ऋतम् आशशानाः । शुचीद् अयन् दीध्यत उक्थशसः क्षामा भिन्दन्तो अरुणीर् अप व्रन् ॥२१॥
adhā yathā naḥ pitaraḥ parāsaḥ pratnāso agna ṛtam āśaśānāḥ | śucīd ayan dīdhyata ukthaśasaḥ kṣāmā bhindanto aruṇīr apa vran ||21||
As in the days of old our ancient Fathers, speeding the work of holy worship, Agni, Sought pure light and devotion, singing praises; they cleft the ground and made red Dawns apparent.
Translated by Ralph T. H. Griffith (1896)This is the translator's rendering of the same verse where it occurs at RV 4.2.16; the wording of this text may differ in places.
सुकर्मानः सुरुचो देवयन्तो अयो न देवा जनिमा धमन्तः । शुचन्तो अग्निं वावृधन्त इन्द्रम् उर्वीम् गव्यां परिषदं नो अक्रन् ॥२२॥
sukarmānaḥ suruco devayanto ayo na devā janimā dhamantaḥ | śucanto agniṃ vāvṛdhanta indram urvīm gavyāṃ pariṣadaṃ no akran ||22||
Gods, doing holy acts, devout, resplendent, smelting like ore their human generations. Enkindling Agni and exalting Indra, they came encompassing the stall of cattle.
Translated by Ralph T. H. Griffith (1896)This is the translator's rendering of the same verse where it occurs at RV 4.2.17; the wording of this text may differ in places.
आ यूथेव क्षुमति पश्वो अख्यद् देवानां जनिमान्त्य् उग्रः । मर्तासश् चिद् उर्वशीर् अकृप्रन् वृधे चिद् अर्य उपरस्यायोः ॥२३॥
ā yūtheva kṣumati paśvo akhyad devānāṃ janimānty ugraḥ | martāsaś cid urvaśīr akṛpran vṛdhe cid arya uparasyāyoḥ ||23||
Strong One! he marked them-and the Gods before them-like herds of cattle in a foodful pasture. There they moaned forth their strong desire for mortals, to aid the True, the nearest One, the Living.
Translated by Ralph T. H. Griffith (1896)This is the translator's rendering of the same verse where it occurs at RV 4.2.18; the wording of this text may differ in places.
अकर्म ते स्वपसो अभूम ऋतम् अवस्रन्न् उषसो विभातीः । विश्वं तद् भद्रं यद् अवन्ति देवा बृहद् वदेम विदथे सुवीराः ॥२४॥
akarma te svapaso abhūma ṛtam avasrann uṣaso vibhātīḥ | viśvaṃ tad bhadraṃ yad avanti devā bṛhad vadema vidathe suvīrāḥ ||24||
Sanskrit only: no published translation is held for this verse.
इन्द्रो मा मरुत्वान् प्राच्या दिशः पातु बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥२५॥
indro mā marutvān prācyā diśaḥ pātu bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||25||
Sanskrit only: no published translation is held for this verse.
धाता मा निरृत्या दक्षिणाया दिशः पातु बाहुच्युता पृथिवी द्यां इवोपरि । लोककृतः पथिकृतो यजामहे ये देवानां हुतभागा इह स्थ ॥२६॥
dhātā mā nirṛtyā dakṣiṇāyā diśaḥ pātu bāhucyutā pṛthivī dyāṃ ivopari | lokakṛtaḥ pathikṛto yajāmahe ye devānāṃ hutabhāgā iha stha ||26||
Sanskrit only: no published translation is held for this verse.
अदितिर् मादित्यैः प्रतीच्या दिशः पातु बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥२७॥
aditir mādityaiḥ pratīcyā diśaḥ pātu bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||27||
Sanskrit only: no published translation is held for this verse.
सोमो मा विश्वैर् देवैर् उदीच्या दिशः पातु बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥२८॥
somo mā viśvair devair udīcyā diśaḥ pātu bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||28||
Sanskrit only: no published translation is held for this verse.
धर्ता ह त्वा धरुणो धारयाता ऊर्ध्वं भानुं सविता द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥२९॥
dhartā ha tvā dharuṇo dhārayātā ūrdhvaṃ bhānuṃ savitā dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||29||
Sanskrit only: no published translation is held for this verse.
प्राच्यां त्वा दिशि पुरा सम्वृतः स्वधायाम् आ दधामि बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥३०॥ १५
prācyāṃ tvā diśi purā samvṛtaḥ svadhāyām ā dadhāmi bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||30|| 15
Sanskrit only: no published translation is held for this verse.
दक्षिणायां त्वा दिशि पुरा सम्वृतः स्वधायाम् आ दधामि बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥३१॥
dakṣiṇāyāṃ tvā diśi purā samvṛtaḥ svadhāyām ā dadhāmi bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||31||
Sanskrit only: no published translation is held for this verse.
प्रतीच्यां त्वा दिशि पुरा संवृतः स्वधायाम् आ दधामि बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥३२॥
pratīcyāṃ tvā diśi purā saṃvṛtaḥ svadhāyām ā dadhāmi bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||32||
Sanskrit only: no published translation is held for this verse.
उदीच्यां त्वा दिशि पुरा सम्वृतः स्वधायाम् आ दधामि बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥३३॥
udīcyāṃ tvā diśi purā samvṛtaḥ svadhāyām ā dadhāmi bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||33||
Sanskrit only: no published translation is held for this verse.
ध्रुवायां त्वा दिशि पुरा संवृतः स्वधायाम् आ दधामि बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥३४॥
dhruvāyāṃ tvā diśi purā saṃvṛtaḥ svadhāyām ā dadhāmi bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||34||
Sanskrit only: no published translation is held for this verse.
ऊर्ध्वायां त्वा दिशि पुरा सम्वृतः स्वधायाम् आ दधामि बाहुच्युता पृथिवी द्याम् इवोपरि । लोककृतः पथिकृतो यजामहे ये देवानां हुतभागा इह स्थ ॥३५॥
ūrdhvāyāṃ tvā diśi purā samvṛtaḥ svadhāyām ā dadhāmi bāhucyutā pṛthivī dyām ivopari | lokakṛtaḥ pathikṛto yajāmahe ye devānāṃ hutabhāgā iha stha ||35||
Sanskrit only: no published translation is held for this verse.
धर्तासि धरुनो ऽसि वंसगो ऽसि ॥३६॥
dhartāsi dharuno 'si vaṃsago 'si ||36||
Sanskrit only: no published translation is held for this verse.
उदपूर् असि मधुपूर् असि वातपूर् असि ॥३७॥
udapūr asi madhupūr asi vātapūr asi ||37||
Sanskrit only: no published translation is held for this verse.
इतश् च मामुतश् चावतां यमे इव यतमाने यद् ऐतम् । प्र वां भरन् मानुषा देवयन्तो आ सीदतां स्वम् उ लोकं विदाने ॥३८॥
itaś ca māmutaś cāvatāṃ yame iva yatamāne yad aitam | pra vāṃ bharan mānuṣā devayanto ā sīdatāṃ svam u lokaṃ vidāne ||38||
Sanskrit only: no published translation is held for this verse.
स्वासस्थे भवतम् इन्दवे नो युजे वां ब्रह्म पूर्व्यं नमोभिः । वि श्लोक एति पथ्येव सूरिः शृण्वन्तु विश्वे अमृतास एतत् ॥३९॥
svāsasthe bhavatam indave no yuje vāṃ brahma pūrvyaṃ namobhiḥ | vi śloka eti pathyeva sūriḥ śṛṇvantu viśve amṛtāsa etat ||39||
Sanskrit only: no published translation is held for this verse.
त्रीणि पदानि रुपो अन्व् अरोहच् चतुष्पदीम् अन्व् एतद् व्रतेन । अक्षरेण प्रति मिमीते अर्कम् ऋतस्य नाभाव् अभि सं पुनाति ॥४०॥ १६
trīṇi padāni rupo anv arohac catuṣpadīm anv etad vratena | akṣareṇa prati mimīte arkam ṛtasya nābhāv abhi saṃ punāti ||40|| 16
Sanskrit only: no published translation is held for this verse.
देवेभ्यः कम् अवृणीत मृत्युं प्रजायै किम् अमृतं नावृणीत । बृहस्पतिर् यज्ञम् अतनुत ऋषिः प्रियां यमस् तन्वम् आ रिरेच ॥४१॥
devebhyaḥ kam avṛṇīta mṛtyuṃ prajāyai kim amṛtaṃ nāvṛṇīta | bṛhaspatir yajñam atanuta ṛṣiḥ priyāṃ yamas tanvam ā rireca ||41||
Sanskrit only: no published translation is held for this verse.
त्वम् अग्न ईडितो जातवेदो ऽवाड् ढव्यानि सुरभीणि कृत्वा । प्रादाः पितृभ्यः स्वधया ते अक्षन्न् अद्धि त्वं देव प्रयता हवींषि ॥४२॥
tvam agna īḍito jātavedo 'vāḍ ḍhavyāni surabhīṇi kṛtvā | prādāḥ pitṛbhyaḥ svadhayā te akṣann addhi tvaṃ deva prayatā havīṃṣi ||42||
Thou, Agni Jatavedas, when entreated, didst bear the offerings which thou madest fragrant, And give them to the Fathers who did cat them with Svadha. Eat, thou God, the gifts we bring thee.
Translated by Ralph T. H. Griffith (1896)This is the translator's rendering of the same verse where it occurs at RV 10.15.12; the wording of this text may differ in places.
आसीनासो अरुणीनाम् उपस्थे रयिं धत्त दाशुषे मर्त्याय । पुत्रेभ्यः पितरस् तस्य वस्वः प्र यछत त इहोर्जं दधात ॥४३॥
āsīnāso aruṇīnām upasthe rayiṃ dhatta dāśuṣe martyāya | putrebhyaḥ pitaras tasya vasvaḥ pra yachata ta ihorjaṃ dadhāta ||43||
Lapped in the bosom of the purple Mornings, give riches to the man who brings oblations. Grant to your sons a portion of that treasure, and, present, give them energy, ye Fathers.
Translated by Ralph T. H. Griffith (1896)This is the translator's rendering of the same verse where it occurs at RV 10.15.7; the wording of this text may differ in places.
अग्निष्वात्ताः पितर एह गछत सदःसदः सदत सुप्रणीतयः । अत्तो हवींषि प्रयतानि बर्हिषि रयिं च नः सर्ववीरं दधात ॥४४॥
agniṣvāttāḥ pitara eha gachata sadaḥsadaḥ sadata supraṇītayaḥ | atto havīṃṣi prayatāni barhiṣi rayiṃ ca naḥ sarvavīraṃ dadhāta ||44||
Sanskrit only: no published translation is held for this verse.
उपहूता नः पितरः सोम्यासो बर्हिष्येषु निधिषु प्रियेषु । त आ गमन्तु त इह श्रुवन्त्व् अधि ब्रुवन्तु ते ऽवन्त्व् अस्मान् ॥४५॥
upahūtā naḥ pitaraḥ somyāso barhiṣyeṣu nidhiṣu priyeṣu | ta ā gamantu ta iha śruvantv adhi bruvantu te 'vantv asmān ||45||
May they, the Fathers, worthy of the Soma, invited to their favourite oblations. Laid on the sacred grass, come nigh and listen: may they be gracious unto us and bless us.
Translated by Ralph T. H. Griffith (1896)This is the translator's rendering of the same verse where it occurs at RV 10.15.5; the wording of this text may differ in places.
ये नः पितुः पितरो ये पितामहा अनूजहिरे सोमपीथं वसिष्ठाः । तेभिर् यमः सम्रराणो हवींष्य् उशन्न् उशद्भिः प्रतिकामम् अत्तु ॥४६॥
ye naḥ pituḥ pitaro ye pitāmahā anūjahire somapīthaṃ vasiṣṭhāḥ | tebhir yamaḥ samrarāṇo havīṃṣy uśann uśadbhiḥ pratikāmam attu ||46||
Sanskrit only: no published translation is held for this verse.
ये तातृषुर् देवत्रा जेहमाना होत्राविदः स्तोमतष्टासो अर्कैः । आग्ने याहि सहस्रं देववन्दैः सत्यैः कविभिर् ऋषिभिर् घर्मसद्भिः ॥४७॥
ye tātṛṣur devatrā jehamānā hotrāvidaḥ stomataṣṭāso arkaiḥ | āgne yāhi sahasraṃ devavandaiḥ satyaiḥ kavibhir ṛṣibhir gharmasadbhiḥ ||47||
Sanskrit only: no published translation is held for this verse.
ये सत्यासो हविरदो हविष्पा इन्द्रेण देवैः सरथं तुरेण । आग्ने याहि सुविदत्रेभिर् अर्वाङ् परैः पूर्वैर् ऋषिभिर् घर्मसद्भिः ॥४८॥
ye satyāso havirado haviṣpā indreṇa devaiḥ sarathaṃ tureṇa | āgne yāhi suvidatrebhir arvāṅ paraiḥ pūrvair ṛṣibhir gharmasadbhiḥ ||48||
Sanskrit only: no published translation is held for this verse.
उप सर्प मातरं भूमिम् एताम् उरुव्यचसं पृथिवीं सुशेवाम् । ऊर्णम्रदाः पृथिवी दक्षिणावत एषा त्वा पातु प्रपथे पुरस्तात् ॥४९॥
upa sarpa mātaraṃ bhūmim etām uruvyacasaṃ pṛthivīṃ suśevām | ūrṇamradāḥ pṛthivī dakṣiṇāvata eṣā tvā pātu prapathe purastāt ||49||
Sanskrit only: no published translation is held for this verse.
उच् छ्वञ्चस्व पृथिवि मा नि बाधथाः सूपायनास्मै भव सूपसर्पणा । माता पुत्रं यथा सिचाभ्य् एनं भूम ऊर्णुहि ॥५०॥ १७
uc chvañcasva pṛthivi mā ni bādhathāḥ sūpāyanāsmai bhava sūpasarpaṇā | mātā putraṃ yathā sicābhy enaṃ bhūma ūrṇuhi ||50|| 17
Heave thyself, Earth, nor press thee downward heavily: afford him easy access, gently tending him. Cover him, as a mother wraps her skirt about her child, O Earth.
Translated by Ralph T. H. Griffith (1896)This is the translator's rendering of the same verse where it occurs at RV 10.18.11; the wording of this text may differ in places.
उच्छ्वञ्चमाना पृथिवी सु तिष्ठतु सहस्रं मित उप हि श्रयन्ताम् । ते गृहासो घृतश्चुतः स्योना विश्वाहास्मै शरणाः सन्त्व् अत्र ॥५१॥
ucchvañcamānā pṛthivī su tiṣṭhatu sahasraṃ mita upa hi śrayantām | te gṛhāso ghṛtaścutaḥ syonā viśvāhāsmai śaraṇāḥ santv atra ||51||
Now let the heaving earth be free from motion: yea,- let a thousand clods remain above him. Be they to him a home distilling fatness, here let them ever be his place of refuge.
Translated by Ralph T. H. Griffith (1896)This is the translator's rendering of the same verse where it occurs at RV 10.18.12; the wording of this text may differ in places.
उत् ते स्तभ्नामि पृथिवीं त्वत् परीमं लोगं निदधन् मो अहम् रिषम् । एतां स्थूणां पितरो धारयन्ति ते तत्र यमः सादना ते कृणोतु ॥५२॥
ut te stabhnāmi pṛthivīṃ tvat parīmaṃ logaṃ nidadhan mo aham riṣam | etāṃ sthūṇāṃ pitaro dhārayanti te tatra yamaḥ sādanā te kṛṇotu ||52||
I stay the earth from thee, while over thee I place this piece of earth. May I be free from injury. Here let the Fathers keep this pillar firm for thee, and there let Yama make thee an abiding-place.
Translated by Ralph T. H. Griffith (1896)This is the translator's rendering of the same verse where it occurs at RV 10.18.13; the wording of this text may differ in places.
इमम् अग्ने चमसं मा वि जिह्वरः प्रियो देवानाम् उत सोम्यानाम् । अयं यश् चमसो देवपानस् तस्मिन् देवा अमृता मादयन्ताम् ॥५३॥
imam agne camasaṃ mā vi jihvaraḥ priyo devānām uta somyānām | ayaṃ yaś camaso devapānas tasmin devā amṛtā mādayantām ||53||
Forbear, O Agni, to upset this ladle: the Gods and they who merit Soma love it. This ladle, this which serves the Gods to drink from, in this the Immortal Deities rejoice them.
Translated by Ralph T. H. Griffith (1896)This is the translator's rendering of the same verse where it occurs at RV 10.16.8; the wording of this text may differ in places.
अथर्वा पूर्णम् चमसम् यम् इन्द्रायाबिभर् वाजिनीवते । तस्मिन् कृणोति सुकृतस्य भक्षं तस्मिन् इन्दुः पवते विश्वदानिम् ॥५४॥
atharvā pūrṇam camasam yam indrāyābibhar vājinīvate | tasmin kṛṇoti sukṛtasya bhakṣaṃ tasmin induḥ pavate viśvadānim ||54||
Sanskrit only: no published translation is held for this verse.
यत् ते कृष्णः शकुन आतुतोद पिपीलः सर्प उत वा श्वापदः । अग्निष् टद् विश्वाद् अगदं कृणोतु सोमश् च यो ब्राह्मणां आविवेश ॥५५॥
yat te kṛṣṇaḥ śakuna ātutoda pipīlaḥ sarpa uta vā śvāpadaḥ | agniṣ ṭad viśvād agadaṃ kṛṇotu somaś ca yo brāhmaṇāṃ āviveśa ||55||
What wound soe'er the dark bird hath inflicted, the emmet, or the serpent, or the jackal, May Agni who devoureth all things heal it and Soma who hath passed into the Brahmans.
Translated by Ralph T. H. Griffith (1896)This is the translator's rendering of the same verse where it occurs at RV 10.16.6; the wording of this text may differ in places.
पयस्वतीर् ओषधयः पयस्वन् मामकं पयः । अपां पयसो यत् पयस् तेन मा सह शुम्भतु ॥५६॥
payasvatīr oṣadhayaḥ payasvan māmakaṃ payaḥ | apāṃ payaso yat payas tena mā saha śumbhatu ||56||
Sanskrit only: no published translation is held for this verse.
इमा नारीर् अविधवाः सुपत्नीर् आञ्जनेन सर्पिषा सं स्पृशन्ताम् । अनश्रवो अनमीवाः सुरत्ना आ रोहन्तु जनयो योनिम् अग्रे ॥५७॥
imā nārīr avidhavāḥ supatnīr āñjanena sarpiṣā saṃ spṛśantām | anaśravo anamīvāḥ suratnā ā rohantu janayo yonim agre ||57||
Let these unwidowed dames with noble husbands adorn themselves with fragrant balm and unguent. Decked with fair jewels, tearless, free from sorrow, first let the dames go up to where he lieth.
Translated by Ralph T. H. Griffith (1896)This is the translator's rendering of the same verse where it occurs at RV 10.18.7; the wording of this text may differ in places.
सं गछस्व पितृभिः सं यमेनेष्टापूर्तेन परमे व्योमन् । हित्वावद्यं पुनर् अस्तम् एहि सं गछतां तन्वा सुवर्चाः ॥५८॥
saṃ gachasva pitṛbhiḥ saṃ yameneṣṭāpūrtena parame vyoman | hitvāvadyaṃ punar astam ehi saṃ gachatāṃ tanvā suvarcāḥ ||58||
Sanskrit only: no published translation is held for this verse.
ये नः पितुः पितरो ये पितामहा य आविविशुर् उर्व् अन्तरिक्षम् । तेभ्यः स्वराद् असुनीतिर् नो अद्य वथावशं तन्वः कल्पयाति ॥५९॥
ye naḥ pituḥ pitaro ye pitāmahā ya āviviśur urv antarikṣam | tebhyaḥ svarād asunītir no adya vathāvaśaṃ tanvaḥ kalpayāti ||59||
Sanskrit only: no published translation is held for this verse.
शं ते नीहारो भवतु शं ते प्रुष्वाव शीयताम् । शीतिके शीतिकावति ह्लादिके ह्लादिकावति । मण्डूक्य् अप्सु शं भुव इमं स्व् अग्निं शमय ॥६०॥ १८
śaṃ te nīhāro bhavatu śaṃ te pruṣvāva śīyatām | śītike śītikāvati hlādike hlādikāvati | maṇḍūky apsu śaṃ bhuva imaṃ sv agniṃ śamaya ||60|| 18
Sanskrit only: no published translation is held for this verse.
विवस्वान् नो अभयं कृणोतु यः सुत्रामा जीरदानुः सुदानुः । इहेमे वीरा बहवो भवन्तु गोमद् अश्ववन् मय्य् अस्तु पुष्टम् ॥६१॥
vivasvān no abhayaṃ kṛṇotu yaḥ sutrāmā jīradānuḥ sudānuḥ | iheme vīrā bahavo bhavantu gomad aśvavan mayy astu puṣṭam ||61||
Sanskrit only: no published translation is held for this verse.
विवस्वान् नो अमृतत्वे दधातु परैतु मृत्युर् अमृतं न ऐतु । इमान् रक्षतु पुरुषान् आ जरिम्णो मो स्व् एषाम् असवो यमं गुः ॥६२॥
vivasvān no amṛtatve dadhātu paraitu mṛtyur amṛtaṃ na aitu | imān rakṣatu puruṣān ā jarimṇo mo sv eṣām asavo yamaṃ guḥ ||62||
Sanskrit only: no published translation is held for this verse.
यो दध्रे अन्तरिक्षे न मह्ना पितॄणां कविः प्रमतिर् मतीनाम् । तम् अर्चत विश्वमित्रा हविर्भिः स नो यमः प्रतरं जीवसे धात् ॥६३॥
yo dadhre antarikṣe na mahnā pitṝṇāṃ kaviḥ pramatir matīnām | tam arcata viśvamitrā havirbhiḥ sa no yamaḥ prataraṃ jīvase dhāt ||63||
Sanskrit only: no published translation is held for this verse.
आ रोहत दिवम् उत्तमाम् ऋषयो मा बिभीतन । सोमपाः सोमपायिन इदं वः क्रियते हविर् अगन्म ज्वोतिर् उत्तमम् ॥६४॥
ā rohata divam uttamām ṛṣayo mā bibhītana | somapāḥ somapāyina idaṃ vaḥ kriyate havir aganma jvotir uttamam ||64||
Sanskrit only: no published translation is held for this verse.
प्र केतुना बृहता भात्य् अग्निर् आ रोदसी वृषभो रोरवीति । दिवश् चिद् अन्ताद् उपमाम् उद् आनड् अपाम् उपस्थे महिषो ववर्ध ॥६५॥
pra ketunā bṛhatā bhāty agnir ā rodasī vṛṣabho roravīti | divaś cid antād upamām ud ānaḍ apām upasthe mahiṣo vavardha ||65||
Agni advances with his lofty banner: the Bull is bellowing to the earth and heavens. He hath attained the sky's supremest limits. the Steer hath waxen in the lap of waters.
Translated by Ralph T. H. Griffith (1896)This is the translator's rendering of the same verse where it occurs at RV 10.8.1; the wording of this text may differ in places.
नाके सुपर्णम् उप यत् पतन्तं ह्र्दा वेनन्तो अभ्यचक्षत त्वा । हिरण्यपक्षं वरुणस्य दूतं यमस्य योनौ शकुनं भुरन्युम् ॥६६॥
nāke suparṇam upa yat patantaṃ hrdā venanto abhyacakṣata tvā | hiraṇyapakṣaṃ varuṇasya dūtaṃ yamasya yonau śakunaṃ bhuranyum ||66||
They gaze on thee with longing in their spirit, as on a strong-winged bird that mounteth sky-ward; On thee with wings of gold, Varuna's envoy, the Bird that hasteneth to the home of Yama.
Translated by Ralph T. H. Griffith (1896)This is the translator's rendering of the same verse where it occurs at RV 10.123.6; the wording of this text may differ in places.
इन्द्र क्रतुं न आ भर पिता पुत्रेभ्यो यथा । शिक्षा णो अस्मिन् पुरुहूत यामनि जीवा ज्योतिर् अशीमहि ॥६७॥
indra kratuṃ na ā bhara pitā putrebhyo yathā | śikṣā ṇo asmin puruhūta yāmani jīvā jyotir aśīmahi ||67||
O Indra, give us wisdom as a sire gives wisdom to his sons. Guide us, O Much-invoked, in this our way may we still live and look upon the light.
Translated by Ralph T. H. Griffith (1896)This is the translator's rendering of the same verse where it occurs at RV 7.32.26; the wording of this text may differ in places.
अपूपापिहितान् कुम्भान् यांस् ते देवा अधारयन् । ते ते सन्तु स्वधावन्तो मधुमन्तो घृतश्चुतः ॥६८॥
apūpāpihitān kumbhān yāṃs te devā adhārayan | te te santu svadhāvanto madhumanto ghṛtaścutaḥ ||68||
Sanskrit only: no published translation is held for this verse.
यास् ते धाना अनुकिरामि तिलमिश्रा स्वधावतीः । तास् ते सन्तु विभ्वीः प्रभ्वीस् तास् ते यमो राजानु मन्यताम् ॥६९॥
yās te dhānā anukirāmi tilamiśrā svadhāvatīḥ | tās te santu vibhvīḥ prabhvīs tās te yamo rājānu manyatām ||69||
Sanskrit only: no published translation is held for this verse.
पुनर् देहि वनस्पते य एष निहितस् त्वयि । यथा यमस्य सादन आसातौ विदथा वदन् ॥७०॥
punar dehi vanaspate ya eṣa nihitas tvayi | yathā yamasya sādana āsātau vidathā vadan ||70||
Sanskrit only: no published translation is held for this verse.
आ रभस्व जातवेदस् तेजस्वद् धरो अस्तु ते । शरीरम् अस्य सं दहाथैनं देहि सुकृताम् उ लोके ॥७१॥
ā rabhasva jātavedas tejasvad dharo astu te | śarīram asya saṃ dahāthainaṃ dehi sukṛtām u loke ||71||
Sanskrit only: no published translation is held for this verse.
ये ते पूर्वे परागता अपरे पितरश् च ये । तेभ्यो घृतस्य कुल्यैतु शतधारा व्युन्दती ॥७२॥
ye te pūrve parāgatā apare pitaraś ca ye | tebhyo ghṛtasya kulyaitu śatadhārā vyundatī ||72||
Sanskrit only: no published translation is held for this verse.
एतद् आ रोह वय उन्मृजानः स्वा इह बृहद् उ दीदयन्ते । अभि प्रेहि मध्यतो माप हास्थाः पितॄनां लोकं प्रथमो यो अत्र ॥७३॥ १९
etad ā roha vaya unmṛjānaḥ svā iha bṛhad u dīdayante | abhi prehi madhyato māpa hāsthāḥ pitṝnāṃ lokaṃ prathamo yo atra ||73|| 19
Sanskrit only: no published translation is held for this verse.