Library·Jiva Gosvami: Gopalacampu - Uttaracampu·2·2.1
श्री-श्री-गोपाल-चम्पूः उत्तर-चम्पूः अथ प्रथमं पूरणम् श्री-श्री-राधा-कृष्णाभ्यां नमः मङ्गलाचरणम् श्री-कृष्ण कृष्ण-चैतन्य स-सनातन-रूपक । गोपाल रघुनाथाप्त-व्रज-वल्लभ पाहि माम्
śrī-śrī-gopāla-campūḥ uttara-campūḥ atha prathamaṃ pūraṇam śrī-śrī-rādhā-kṛṣṇābhyāṃ namaḥ maṅgalācaraṇam śrī-kṛṣṇa kṛṣṇa-caitanya sa-sanātana-rūpaka | gopāla raghunāthāpta-vraja-vallabha pāhi mām
Sanskrit only: no published translation is held for this verse.
अरिष्टं रिष्टं चकार, केशिनः प्रत्ययम् आकृष्य तद्-अर्थेन चात्मनि कृतार्थतां प्रकृष्य केशवतां निर्देशयामास । किं च- या जन्म-श्रीर् अजनि गदिता या च कौमार-शोभा या पौगण्ड-द्युतिर् अघ-रिपोर् या च कैशोर-लक्ष्मीः । एका सा सा हृदयम् अहरन् नस् तदा द्राग् इदानीं संहत्यामूस् तद् अथ बलवल्-लोभतः क्षोभयन्ति
ariṣṭaṃ riṣṭaṃ cakāra, keśinaḥ pratyayam ākṛṣya tad-arthena cātmani kṛtārthatāṃ prakṛṣya keśavatāṃ nirdeśayāmāsa | kiṃ ca- yā janma-śrīr ajani gaditā yā ca kaumāra-śobhā yā paugaṇḍa-dyutir agha-ripor yā ca kaiśora-lakṣmīḥ | ekā sā sā hṛdayam aharan nas tadā drāg idānīṃ saṃhatyāmūs tad atha balaval-lobhataḥ kṣobhayanti
Sanskrit only: no published translation is held for this verse.
यतः- यद् अप्य् अन्तः-पीडा प्रतत-निज-दुःख-श्रवणतस् तथावद् भाता स्यात् तद् अपि मनुजास् तन् न जहाति । व्रणं शुष्की-भावं गतम् अपि निजं ते स्मृततया बलात् पीडं पीडं निविडम् अनुभूतं विदधति
yataḥ- yad apy antaḥ-pīḍā pratata-nija-duḥkha-śravaṇatas tathāvad bhātā syāt tad api manujās tan na jahāti | vraṇaṃ śuṣkī-bhāvaṃ gatam api nijaṃ te smṛtatayā balāt pīḍaṃ pīḍaṃ niviḍam anubhūtaṃ vidadhati
Sanskrit only: no published translation is held for this verse.
अथवा- चिराद् बन्धौ लब्धेऽप्य् असुखम् अभितो याति न तदा गृहीत्वा तत्-कन्ठं न यदि विलपेत् तत्-प्रियतमः । सदा शालीनस् तु स्वयम् इदम् अकुर्वन् व्रज-जनस् तथा कृष्णस् ताभ्यां सदसि कथकाभ्याम् अकथयत्
athavā- cirād bandhau labdhe'py asukham abhito yāti na tadā gṛhītvā tat-kanṭhaṃ na yadi vilapet tat-priyatamaḥ | sadā śālīnas tu svayam idam akurvan vraja-janas tathā kṛṣṇas tābhyāṃ sadasi kathakābhyām akathayat
Sanskrit only: no published translation is held for this verse.
गीर् देवीम् अनुयामः सकल-श्रुति-सार-भागवत-रूपाम् । यद्-रस-सिद्धान्ताभ्यां नवम् अपि काव्यं प्रमाणतां याति
gīr devīm anuyāmaḥ sakala-śruti-sāra-bhāgavata-rūpām | yad-rasa-siddhāntābhyāṃ navam api kāvyaṃ pramāṇatāṃ yāti
Sanskrit only: no published translation is held for this verse.
दिनं दिनं चैवम् अनन्दि स व्रजः कृष्णेन कृष्णः स भृशं व्रजेन च । सिताख्य-पक्षः सित-कान्तिना यथा सिताख्य-पक्षेण यथा सित-द्युतिः
dinaṃ dinaṃ caivam anandi sa vrajaḥ kṛṣṇena kṛṣṇaḥ sa bhṛśaṃ vrajena ca | sitākhya-pakṣaḥ sita-kāntinā yathā sitākhya-pakṣeṇa yathā sita-dyutiḥ
Sanskrit only: no published translation is held for this verse.
कृष्णायासीत् तस्य तृष्णा समन्तात् तृष्णायै वा कृष्ण इत्य् अत्र भेदः । नाभूद् इत्थं पुरुषं स्व-प्रकृत्या युक्तं विज्ञास् तत्र दृष्टान्तयन्ति
kṛṣṇāyāsīt tasya tṛṣṇā samantāt tṛṣṇāyai vā kṛṣṇa ity atra bhedaḥ | nābhūd itthaṃ puruṣaṃ sva-prakṛtyā yuktaṃ vijñās tatra dṛṣṭāntayanti
Sanskrit only: no published translation is held for this verse.
पिपासूनां नीरं क्षुद्-उदयवताम् अन्नम् अभितः प्रतप्तानां शितं हिम-जड-हृदां तप्ति-निकरः । यथा तद्वत् कृष्णः समजनि यदा गोकुल-भुवाम् तदा वैयग्र्यं स प्रतिजन-सुखाय प्रतिगतः
pipāsūnāṃ nīraṃ kṣud-udayavatām annam abhitaḥ prataptānāṃ śitaṃ hima-jaḍa-hṛdāṃ tapti-nikaraḥ | yathā tadvat kṛṣṇaḥ samajani yadā gokula-bhuvām tadā vaiyagryaṃ sa pratijana-sukhāya pratigataḥ
Sanskrit only: no published translation is held for this verse.
तातस्-तद् भ्रातृ-वर्गस्-तद् अखिल-भगिनी-भर्तृ-जामातृ-मुख्या माता मातुः पितुश् च स्वसृ-मुख-महिलास् तद्वद् अन्ये च ये ये । सऋवेषाम् एव तेषां युगपद् अपि वसन्न् अन्तरे वासयंश् च स्वान्तस् तान् वासुदेव-श्रुति-भणितम् इव व्यञ्जयामास कृष्णः
tātas-tad bhrātṛ-vargas-tad akhila-bhaginī-bhartṛ-jāmātṛ-mukhyā mātā mātuḥ pituś ca svasṛ-mukha-mahilās tadvad anye ca ye ye | saṛveṣām eva teṣāṃ yugapad api vasann antare vāsayaṃś ca svāntas tān vāsudeva-śruti-bhaṇitam iva vyañjayāmāsa kṛṣṇaḥ
Sanskrit only: no published translation is held for this verse.
सुरपति-मणि-मानिताङ्ग-लक्ष्मीः शरदिज-सारस-सार-हारि-नेत्रः । निखिल-मति-गतिः कथं न स स्यात् पितृ-जननी-सुख-माधुरी-धुरीणः
surapati-maṇi-mānitāṅga-lakṣmīḥ śaradija-sārasa-sāra-hāri-netraḥ | nikhila-mati-gatiḥ kathaṃ na sa syāt pitṛ-jananī-sukha-mādhurī-dhurīṇaḥ
Sanskrit only: no published translation is held for this verse.
ध्याने कूर्मवद् ईक्षणे शकलिवद् घ्राण-ग्रहे धेनुवत् स्पर्शे पक्षिवद् अस्य पोषण-परौ शश्वद् व्रजेशाव् अमू । नित्यं नित्यम् उदञ्चद्-उत्कलिकिकाम् आशां चिराद् वर्धितां कैशोरे प्रतिपद्य सुष्ठु फलितां जाड्यं मुदा जग्मतुः
dhyāne kūrmavad īkṣaṇe śakalivad ghrāṇa-grahe dhenuvat sparśe pakṣivad asya poṣaṇa-parau śaśvad vrajeśāv amū | nityaṃ nityam udañcad-utkalikikām āśāṃ cirād vardhitāṃ kaiśore pratipadya suṣṭhu phalitāṃ jāḍyaṃ mudā jagmatuḥ
Sanskrit only: no published translation is held for this verse.
सद्-भ्रातृतां स्वमनु तस्य समीक्स्य रामः फुल्लाङ्गतां प्रतिदिनं गतवान् यथा तु । शेष-प्रमाण-तनुतां तनुयाद् असौ किं दिष्ट-क्रमाद् इति जना मतिम् इष्टवन्तः
sad-bhrātṛtāṃ svamanu tasya samīksya rāmaḥ phullāṅgatāṃ pratidinaṃ gatavān yathā tu | śeṣa-pramāṇa-tanutāṃ tanuyād asau kiṃ diṣṭa-kramād iti janā matim iṣṭavantaḥ
Sanskrit only: no published translation is held for this verse.
मुख्यः प्राणस् तद्-विभेदाश् च यद्वत् कृष्णस् तद्वच् छ्रील-दामादयश् च । एकात्मनः शश्वद् उद्दिश्य चैकं कार्यं यत् ते यान्ति तत्-तद्-विहारम्
mukhyaḥ prāṇas tad-vibhedāś ca yadvat kṛṣṇas tadvac chrīla-dāmādayaś ca | ekātmanaḥ śaśvad uddiśya caikaṃ kāryaṃ yat te yānti tat-tad-vihāram
Sanskrit only: no published translation is held for this verse.
येषां सेव्यः समजनि स हरिः सेवकानां निजानां तेषां प्राण-प्रतिकृतिर् अभवद् देह-सादृश्य-भाजाम् । साहाय्यं तं प्रति तम् अपि विना ते न तिष्ठन्ति सोऽपि न्यस्थात् तत्र स्वम् इति बुधमता तेषु दृष्टान्ततेयम्
yeṣāṃ sevyaḥ samajani sa hariḥ sevakānāṃ nijānāṃ teṣāṃ prāṇa-pratikṛtir abhavad deha-sādṛśya-bhājām | sāhāyyaṃ taṃ prati tam api vinā te na tiṣṭhanti so'pi nyasthāt tatra svam iti budhamatā teṣu dṛṣṭāntateyam
Sanskrit only: no published translation is held for this verse.
वत्स-गोष्ठ-विपिनादि चेद् भजेद् घ्राण-तर्पणम् अघारि-सौरभम् । तर्हि तत्र धवलावलिर् भवेद् द्राग् अजागर-धरा न चान्यदा
vatsa-goṣṭha-vipinādi ced bhajed ghrāṇa-tarpaṇam aghāri-saurabham | tarhi tatra dhavalāvalir bhaved drāg ajāgara-dharā na cānyadā
Sanskrit only: no published translation is held for this verse.
श्रद्दध्यान् न जगद् यद् अस्य तु गुणैर् वन्याश् च ते प्राणिनः सन्ति द्राग् अनुगाः परस्परम् अपि प्रीणन्ति यद्-द्वेषिणः । यद्य् एवं स्वयम् एव सोऽपि भगवान् श्री-युक्त-वैयासकिः श्रीमद्-भागवताख्य-वज्र-लिपिभिर् निष्टङ्कयेन् नाग्रतः
śraddadhyān na jagad yad asya tu guṇair vanyāś ca te prāṇinaḥ santi drāg anugāḥ parasparam api prīṇanti yad-dveṣiṇaḥ | yady evaṃ svayam eva so'pi bhagavān śrī-yukta-vaiyāsakiḥ śrīmad-bhāgavatākhya-vajra-lipibhir niṣṭaṅkayen nāgrataḥ
Sanskrit only: no published translation is held for this verse.
तत् तद् यद्यपि शर्म-जातम् अभवद् गोष्ठे तथाप्य् अच्युत- द्वेषाय प्रहितान् मुहुर् निज-भटात् कंसेन भीर् उत्थिता । तस्माद् अत्र न तर्हि शान्ति-रजनीत्य् उन्नीय लीलाम् इमां चित्तं धूत-भयाम् इहानवरतं निर्वक्तुम् अन्विच्छति
tat tad yadyapi śarma-jātam abhavad goṣṭhe tathāpy acyuta- dveṣāya prahitān muhur nija-bhaṭāt kaṃsena bhīr utthitā | tasmād atra na tarhi śānti-rajanīty unnīya līlām imāṃ cittaṃ dhūta-bhayām ihānavarataṃ nirvaktum anvicchati
Sanskrit only: no published translation is held for this verse.
स्वयं लक्ष्मीर् अप्य् अच्युत-हृदि गताप्य् अन्य-वपुषा तपस् तप्त्वा यं क्वाप्य् अलभत न रासादि-महसि । तम् एतं गोविन्दं वशितम् अनुविन्दन् व्रज-रमा- गणः शर्माविन्दत् कियद् इति कथं कः कथयतु?
svayaṃ lakṣmīr apy acyuta-hṛdi gatāpy anya-vapuṣā tapas taptvā yaṃ kvāpy alabhata na rāsādi-mahasi | tam etaṃ govindaṃ vaśitam anuvindan vraja-ramā- gaṇaḥ śarmāvindat kiyad iti kathaṃ kaḥ kathayatu?
Sanskrit only: no published translation is held for this verse.
कुलीनानां श्लाघ्यैर् निज-कुलज-लोकैः परिवृतिस् तथार्याणां रीतिर् यद् अपि किल तासाम् अविचला । तथाप्य् उच्चैस् तत्-तद्-विचलन-कृतिर् ध्वस्त-निखिला मुकुन्द-प्रेमार्तिर् मम हृदि विमोहं प्रथयति
kulīnānāṃ ślāghyair nija-kulaja-lokaiḥ parivṛtis tathāryāṇāṃ rītir yad api kila tāsām avicalā | tathāpy uccais tat-tad-vicalana-kṛtir dhvasta-nikhilā mukunda-premārtir mama hṛdi vimohaṃ prathayati
Sanskrit only: no published translation is held for this verse.
खरांशोर् अंशु-स्पृग्-वपुर् इव खरांशोर् मणि-ततिर् विधोः कान्ति-स्पर्शि-स्थितिर् इव विधो रत्न-विततिः । मुहुर् ज्वालां हन्त द्रवम् अपि वहन्ती तद् अभवन् मुरारेर् दिङ्-मात्राद् भ्रमयति तद् एषा मम मनः
kharāṃśor aṃśu-spṛg-vapur iva kharāṃśor maṇi-tatir vidhoḥ kānti-sparśi-sthitir iva vidho ratna-vitatiḥ | muhur jvālāṃ hanta dravam api vahantī tad abhavan murārer diṅ-mātrād bhramayati tad eṣā mama manaḥ
Sanskrit only: no published translation is held for this verse.
यदा दृष्टिं यातः कथम् अपि हरिस् तासु स तदा परं स्फूर्ति-भ्रान्तिं रचयति पुरावन् न तु परम् । यदा स्पृष्टिं प्राप्तः क्वचिद् अपि तदापि प्रथमवत् तद् एतद् वैयग्र्यं मम हृदयम् उच्चैर् दलयति
yadā dṛṣṭiṃ yātaḥ katham api haris tāsu sa tadā paraṃ sphūrti-bhrāntiṃ racayati purāvan na tu param | yadā spṛṣṭiṃ prāptaḥ kvacid api tadāpi prathamavat tad etad vaiyagryaṃ mama hṛdayam uccair dalayati
Sanskrit only: no published translation is held for this verse.
तद् एतद् वैयग्र्यं वृषरवि-सुतायाम् अधिगमाद् विदूरं यद् गुप्तं हसति किम् उ वा रोदिति यदा । तदा तस्या हासे स्फुरति निखिलं हृष्यतितरां तथा रोदे ग्लानिं कलयतितरां ह जगद् अपि
tad etad vaiyagryaṃ vṛṣaravi-sutāyām adhigamād vidūraṃ yad guptaṃ hasati kim u vā roditi yadā | tadā tasyā hāse sphurati nikhilaṃ hṛṣyatitarāṃ tathā rode glāniṃ kalayatitarāṃ ha jagad api
Sanskrit only: no published translation is held for this verse.
यदा रासानन्द-प्रभृति-हरि-लीलाः सुवलितास् तदा गोप्यः सत्यं परम-परमं शर्म समयुः । परं यातायातं रचयद् अभितस् तद्-विरहजं महा-दुःखं तासां हृदयम् असकृन् मर्दयति नः
yadā rāsānanda-prabhṛti-hari-līlāḥ suvalitās tadā gopyaḥ satyaṃ parama-paramaṃ śarma samayuḥ | paraṃ yātāyātaṃ racayad abhitas tad-virahajaṃ mahā-duḥkhaṃ tāsāṃ hṛdayam asakṛn mardayati naḥ
Sanskrit only: no published translation is held for this verse.
प्रियाणां सर्वासां परम् उपरि राधां प्रणयवान् असाधारण्येन स्व-हृदि स पुरा लालयति यत् । तद् एतन् नः सर्वं सुखम् अहह हा नाथ रमणेत्य् अदः स्तोक-श्लोकः पिबति किम् अहं वच्मि करवै?
priyāṇāṃ sarvāsāṃ param upari rādhāṃ praṇayavān asādhāraṇyena sva-hṛdi sa purā lālayati yat | tad etan naḥ sarvaṃ sukham ahaha hā nātha ramaṇety adaḥ stoka-ślokaḥ pibati kim ahaṃ vacmi karavai?
Sanskrit only: no published translation is held for this verse.
इदं स्मारं स्मारं ज्वलति मम धीर् यद् व्रज-मृगी- दृशां लज्जालूनां हरिम् अनु रतिर् व्यक्तिम् अगमत् । तद् आस्तां राध्यायाः स-विधम् इव तं तत्-स्फुरण-कृत् प्रमायास् तं द्रष्टुं दृशि कुटिलता मं विदहति
idaṃ smāraṃ smāraṃ jvalati mama dhīr yad vraja-mṛgī- dṛśāṃ lajjālūnāṃ harim anu ratir vyaktim agamat | tad āstāṃ rādhyāyāḥ sa-vidham iva taṃ tat-sphuraṇa-kṛt pramāyās taṃ draṣṭuṃ dṛśi kuṭilatā maṃ vidahati
Sanskrit only: no published translation is held for this verse.
अन्यत् पश्यति कृष्णम् अन्य-वचने कृष्णं ब्रवीत्य् अन्य-वाक् श्रुत्यां कृष्णम् अहो शृणोति सततं या गोप-सुभ्रू-ततिः । तस्यां किं बत गोपन-प्रवलतां यद्य् अश्नुवाना स्फुटं राधाया जडता न हि प्रबलतां यायाद् अमूदृश्य् अपि
anyat paśyati kṛṣṇam anya-vacane kṛṣṇaṃ bravīty anya-vāk śrutyāṃ kṛṣṇam aho śṛṇoti satataṃ yā gopa-subhrū-tatiḥ | tasyāṃ kiṃ bata gopana-pravalatāṃ yady aśnuvānā sphuṭaṃ rādhāyā jaḍatā na hi prabalatāṃ yāyād amūdṛśy api
Sanskrit only: no published translation is held for this verse.
एका श्रीर् यद्-वशे भाति तद्-वशे सुख-सन्ततिः । श्री-कोटीर् वशयन् कृष्णस् तत्-कोटिं स्फुटम् अर्हति
ekā śrīr yad-vaśe bhāti tad-vaśe sukha-santatiḥ | śrī-koṭīr vaśayan kṛṣṇas tat-koṭiṃ sphuṭam arhati
Sanskrit only: no published translation is held for this verse.
म्लानौ म्लानिं रुचौ रोचिः प्रेयसीनाम् अनुव्रजन् । वीक्षितः सोऽयम् अन्तर्ज्ञैर् वृर्त्तीनाम् वृत्तिमान् इव
mlānau mlāniṃ rucau rociḥ preyasīnām anuvrajan | vīkṣitaḥ so'yam antarjñair vṛrttīnām vṛttimān iva
Sanskrit only: no published translation is held for this verse.
गाम्भीर्यान् मुर-शत्रो स्फुटम् अब्धेर् इव न भाति कार्श्यादि । किन्तु तदन्वयि-जीवन- धाराणां तेन तच् च तर्क्येत
gāmbhīryān mura-śatro sphuṭam abdher iva na bhāti kārśyādi | kintu tadanvayi-jīvana- dhārāṇāṃ tena tac ca tarkyeta
Sanskrit only: no published translation is held for this verse.
यद्यपि तासां लाभे हरिणा न स्वैरिता याता । तद् अपि स्वस्मिन्न् अभिमति- मात्रे शश्वत्-कृतार्थतां मेने
yadyapi tāsāṃ lābhe hariṇā na svairitā yātā | tad api svasminn abhimati- mātre śaśvat-kṛtārthatāṃ mene
Sanskrit only: no published translation is held for this verse.
आस्तां व्रज-सुभ्रूणाम् अभिसृति-सङ्केत-धाम-मिलनादि । स्वैर-स्थितिर् अपि तासाम् अवकलिता कृष्णम् उन्मुदं कुरुते
āstāṃ vraja-subhrūṇām abhisṛti-saṅketa-dhāma-milanādi | svaira-sthitir api tāsām avakalitā kṛṣṇam unmudaṃ kurute
Sanskrit only: no published translation is held for this verse.
बलि-मुषिता निज-लक्ष्मीर् इव लब्धुं ताः सदोत्कृतां यातः । कृष्णश् चिन्तामणिवत् तासु च राधाम् अचिन्तयन् नितराम्
bali-muṣitā nija-lakṣmīr iva labdhuṃ tāḥ sadotkṛtāṃ yātaḥ | kṛṣṇaś cintāmaṇivat tāsu ca rādhām acintayan nitarām
Sanskrit only: no published translation is held for this verse.
निमेषः कल्पः स्याद् अपि नयन-पक्ष्माचल-वरस् तथा दृग्-वार्य्-अब्धिर् व्रज-वर-रमाः पश्यति हरौ । तद्-ईदृग्-भावः किं समचरद् अमूभ्यस् तम् अथवा ततोऽमूर् इत्य् एवं द्वयम् अपि न निर्णीतिम् अयते
nimeṣaḥ kalpaḥ syād api nayana-pakṣmācala-varas tathā dṛg-vāry-abdhir vraja-vara-ramāḥ paśyati harau | tad-īdṛg-bhāvaḥ kiṃ samacarad amūbhyas tam athavā tato'mūr ity evaṃ dvayam api na nirṇītim ayate
Sanskrit only: no published translation is held for this verse.
किम् एषा स्फूर्तिर् मे व्यतिमिलन-कर्त्री वनितया तया किं वा साक्षात्-कृतिर् इति विवेकाविदुर-धीः । हरिः स्वान्त-ज्वाला-वलयित-वपुः क्वापि वलवत्- प्रफुल्लाङ्गः क्वापि प्रतिमुहुर् उदग्रं भ्रमम् अगात्
kim eṣā sphūrtir me vyatimilana-kartrī vanitayā tayā kiṃ vā sākṣāt-kṛtir iti vivekāvidura-dhīḥ | hariḥ svānta-jvālā-valayita-vapuḥ kvāpi valavat- praphullāṅgaḥ kvāpi pratimuhur udagraṃ bhramam agāt
Sanskrit only: no published translation is held for this verse.
श्री-गोपाधिप-दुग्ध-सिन्धु-जनितं सत्-कीर्ति-शुभ्रं स्फुरत्- कृष्णाभावलितं सुदीर्घ-नयन-ज्योतिर्-विधूताम्बुजम् । गोपी-नेत्र-चकोर-जीवन-रुचिं काम-प्रचाराकरं कैशोरामृत-पूर्णम् अव्यय-कलं गोविन्द-चन्द्रं भजे
śrī-gopādhipa-dugdha-sindhu-janitaṃ sat-kīrti-śubhraṃ sphurat- kṛṣṇābhāvalitaṃ sudīrgha-nayana-jyotir-vidhūtāmbujam | gopī-netra-cakora-jīvana-ruciṃ kāma-pracārākaraṃ kaiśorāmṛta-pūrṇam avyaya-kalaṃ govinda-candraṃ bhaje
Sanskrit only: no published translation is held for this verse.
वक्त्रेन्दु-स्फुट-नेत्र-कैरव-रुचिः पाण्डूभवद्गण्डभूर् वक्षो-जन्म-सहस्र-पत्र-मुकुलामन्दावलि-भ्राजिता । नव्य-स्तव्य-नितम्ब-बिम्ब-पुलिन-श्री-करिणी श्री-हरेर् आभीरी-नव-यौवन-स्थितिर् अधाज् ज्यौत्स्नीव नेत्र-प्रथाम्
vaktrendu-sphuṭa-netra-kairava-ruciḥ pāṇḍūbhavadgaṇḍabhūr vakṣo-janma-sahasra-patra-mukulāmandāvali-bhrājitā | navya-stavya-nitamba-bimba-pulina-śrī-kariṇī śrī-harer ābhīrī-nava-yauvana-sthitir adhāj jyautsnīva netra-prathām
Sanskrit only: no published translation is held for this verse.
नान्तर् बहिर् अपि यस्यां स्फुरति ज्ञानं मनो-विकृतौ । एकस्यापि न तस्या न व्यक्तिः स्याद् अमूदृशां किम् उत?
nāntar bahir api yasyāṃ sphurati jñānaṃ mano-vikṛtau | ekasyāpi na tasyā na vyaktiḥ syād amūdṛśāṃ kim uta?
Sanskrit only: no published translation is held for this verse.
कलङ्को यत्र स्याद् अपरिहरणीयार्थ-कृतकस् ततो दूराद् भाव्यं कुल-जनि-जनेनैवम् उचितम् । स कालाल् लुप्तः स्याद् भवति हि च तत्र प्रतिविधिस् तद् अस्मान् मे गोष्ठाद् व्यवहितिर् अकष्टं प्रसजति
kalaṅko yatra syād apariharaṇīyārtha-kṛtakas tato dūrād bhāvyaṃ kula-jani-janenaivam ucitam | sa kālāl luptaḥ syād bhavati hi ca tatra pratividhis tad asmān me goṣṭhād vyavahitir akaṣṭaṃ prasajati
Sanskrit only: no published translation is held for this verse.
येषां पित्रादीनां स्नेहो मम जीवनं गोष्ठे । अहह कु-दैवाद् अभितः सङ्कोचस् तेभ्य एव सञ्जातः
yeṣāṃ pitrādīnāṃ sneho mama jīvanaṃ goṣṭhe | ahaha ku-daivād abhitaḥ saṅkocas tebhya eva sañjātaḥ
Sanskrit only: no published translation is held for this verse.
प्राणास् त्यजन्तु देहं देहः प्राणान् अपि त्यजतु । हरि-गोप्यस् तु मिथस् ताः प्राणाः कथम् इव मिथस् त्याज्याः?
prāṇās tyajantu dehaṃ dehaḥ prāṇān api tyajatu | hari-gopyas tu mithas tāḥ prāṇāḥ katham iva mithas tyājyāḥ?
Sanskrit only: no published translation is held for this verse.
एकस्मिन्न् आवासे दम्पत्योर् भवति दुःसहो विरहः । तस्माद् दूरे गमनं समयं गमनीयतां नयति
ekasminn āvāse dampatyor bhavati duḥsaho virahaḥ | tasmād dūre gamanaṃ samayaṃ gamanīyatāṃ nayati
Sanskrit only: no published translation is held for this verse.
राधे न युक्त मुक्तं स्यान् मुक्त-शातम् अथापि वाम् । मिथः प्रेम-भरं व्यक्तं वक्तुम् उद्यतवान् अहम्
rādhe na yukta muktaṃ syān mukta-śātam athāpi vām | mithaḥ prema-bharaṃ vyaktaṃ vaktum udyatavān aham
Sanskrit only: no published translation is held for this verse.
पुरा कथेयं कथिता मुरारे राग-बृंहिणी । पश्य सोऽयं प्राण-नाथः प्रसादं तव वाञ्छति
purā katheyaṃ kathitā murāre rāga-bṛṃhiṇī | paśya so'yaṃ prāṇa-nāthaḥ prasādaṃ tava vāñchati
Sanskrit only: no published translation is held for this verse.