कर्मणे वां देवेभ्यश्शकेयमित्याह शक्त्यै । यज्ञस्य वै संततिमनु प्रजाः पशवो यजमानस्य संतायन्ते । यज्ञस्य विच्छित्तिमनु प्रजाः पशवो यजमानस्य विच्छिद्यन्ते । यज्ञस्य संततिरसि यज्ञस्य त्वा संतत्यै स्तृणामि संतत्यै त्वा यज्ञस्येत्याहवनीयात्संतनोति । यजमानस्य प्रजायै पशूनाꣳ संतत्यै । अपः प्रणयति । श्रद्धा वा आपः श्रद्धामेवारब्य प्रणीय प्रचरति । अपः प्रणयति । यज्ञो वा आपः १ यज्ञमेवारभ्य प्रणीय प्रचरति । अपः प्रणयति । वज्रो वा आपः । वज्रमेव भ्रातृव्येभ्यः प्रहृत्य प्रणीय प्रचरति । अपः प्रणयति । आपो वै रक्षोघ्नीः । रक्षसामपहत्यै । अपः प्रणयति । आपो वै देवानां प्रियं धाम । देवानामेव प्रियं धाम प्रणीय प्रचरति २ अपः प्रणयति । आपो वै सर्वा देवताः । देवता एवारभ्य प्रणीय प्रचरति । वेषाय त्वेत्याह । वेषाय ह्येनदादत्ते । प्रत्युष्टꣳ रक्षः प्रत्युष्टा अरातय इत्याह । रक्षसामपहत्यै । धूरसीत्याह । एष वै धुर्योऽग्निः । तं यदनुपस्पृश्यातीयात् ३ अध्वर्युं च यजमानं च प्रदहेत् । उपस्पृश्यात्येति । अध्वर्योश्च यजमानस्य चाप्रदाहाय । धूर्व तं योऽस्मान्धूर्वति तं धूर्व यं वयं धूर्वाम इत्याह । द्वौ वाव पुरुषौ । यं चैव धूर्वति । यश्चैनं धूर्वति । तावुभौ शुचार्पयति । त्वं देवानामसि सस्नितमं पप्रितमं जुष्टतमं वह्नितमं देवहूतममित्याह । यथायजुरेवैतत् ४ अह्रुतमसि हविर्धानमित्याहानार्त्यै । दृꣳहस्व मा ह्वारित्याह धृत्यै । मित्रस्य त्वा चक्षुषा प्रेक्ष इत्याह मित्रत्वाय । मा भेर्मा संविक्था मा त्वा हिꣳसिषमि-त्याहाहिꣳसायै । यद्वै किं च वातो नाभिवाति । तत्सर्वं वरुणदेवत्यम् । उरु वातायेत्याह । अवारुणमेवैनत्करोति । देवस्य त्वा सवितुः प्रसव इत्याह प्रसूत्यै । अश्विनोर्बाहुभ्यामित्याह ५ अश्विनौ हि देवानामध्वर्यू आस्ताम् । पूष्णो हस्ताभ्यामित्याह । यत्यै । अग्नये जुष्टं निर्वपामीत्याह । अग्नय एवैनाञ्जुष्टं निर्वपति । त्रिर्यजुषा । त्रय इमे लोकाः । एषां लोकानामाप्त्यै । तूष्णीं चतुर्थम् । अपरिमितमेवावरुन्धे । स एवमेवानुपूर्वꣳ हवीꣳषि निर्वपति ६ इदं देवानामिदमु नः सहेत्याह व्यावृत्त्यै । स्फात्यै त्वा नारात्या इत्याह गुप्त्यै । तमसीव वा एषोऽन्तश्चरति । यः परीणहि । सुवरभि विख्येषं वैश्वानरं ज्योतिरित्याह । सुवरेवाभि विपश्यति वैश्वानरं ज्योतिः । द्यावापृथिवी हविषि गृहीत उदवेपेताम् । दृꣳहन्तां दुर्या द्यावापृथिव्योरित्याह । गृहाणां द्यावापृथिव्योर्धृत्यै । उर्वन्तरिक्षमन्विहीत्याह गत्यै । अदित्यास्त्वोपस्थे सादयामीत्याह । इयं वा अदितिः । अस्या एवैनदुपस्थे सादयति । अग्ने हव्यꣳ रक्षस्वेत्याह गुप्त्यै ७
karmaṇe vāṃ devebhyaśśakeyamityāha śaktyai | yajñasya vai saṃtatimanu prajāḥ paśavo yajamānasya saṃtāyante | yajñasya vicchittimanu prajāḥ paśavo yajamānasya vicchidyante | yajñasya saṃtatirasi yajñasya tvā saṃtatyai stṛṇāmi saṃtatyai tvā yajñasyetyāhavanīyātsaṃtanoti | yajamānasya prajāyai paśūnām̐ saṃtatyai | apaḥ praṇayati | śraddhā vā āpaḥ śraddhāmevārabya praṇīya pracarati | apaḥ praṇayati | yajño vā āpaḥ 1 yajñamevārabhya praṇīya pracarati | apaḥ praṇayati | vajro vā āpaḥ | vajrameva bhrātṛvyebhyaḥ prahṛtya praṇīya pracarati | apaḥ praṇayati | āpo vai rakṣoghnīḥ | rakṣasāmapahatyai | apaḥ praṇayati | āpo vai devānāṃ priyaṃ dhāma | devānāmeva priyaṃ dhāma praṇīya pracarati 2 apaḥ praṇayati | āpo vai sarvā devatāḥ | devatā evārabhya praṇīya pracarati | veṣāya tvetyāha | veṣāya hyenadādatte | pratyuṣṭam̐ rakṣaḥ pratyuṣṭā arātaya ityāha | rakṣasāmapahatyai | dhūrasītyāha | eṣa vai dhuryo'gniḥ | taṃ yadanupaspṛśyātīyāt 3 adhvaryuṃ ca yajamānaṃ ca pradahet | upaspṛśyātyeti | adhvaryośca yajamānasya cāpradāhāya | dhūrva taṃ yo'smāndhūrvati taṃ dhūrva yaṃ vayaṃ dhūrvāma ityāha | dvau vāva puruṣau | yaṃ caiva dhūrvati | yaścainaṃ dhūrvati | tāvubhau śucārpayati | tvaṃ devānāmasi sasnitamaṃ papritamaṃ juṣṭatamaṃ vahnitamaṃ devahūtamamityāha | yathāyajurevaitat 4 ahrutamasi havirdhānamityāhānārtyai | dṛm̐hasva mā hvārityāha dhṛtyai | mitrasya tvā cakṣuṣā prekṣa ityāha mitratvāya | mā bhermā saṃvikthā mā tvā him̐siṣami-tyāhāhim̐sāyai | yadvai kiṃ ca vāto nābhivāti | tatsarvaṃ varuṇadevatyam | uru vātāyetyāha | avāruṇamevainatkaroti | devasya tvā savituḥ prasava ityāha prasūtyai | aśvinorbāhubhyāmityāha 5 aśvinau hi devānāmadhvaryū āstām | pūṣṇo hastābhyāmityāha | yatyai | agnaye juṣṭaṃ nirvapāmītyāha | agnaya evaināñjuṣṭaṃ nirvapati | triryajuṣā | traya ime lokāḥ | eṣāṃ lokānāmāptyai | tūṣṇīṃ caturtham | aparimitamevāvarundhe | sa evamevānupūrvam̐ havīm̐ṣi nirvapati 6 idaṃ devānāmidamu naḥ sahetyāha vyāvṛttyai | sphātyai tvā nārātyā ityāha guptyai | tamasīva vā eṣo'ntaścarati | yaḥ parīṇahi | suvarabhi vikhyeṣaṃ vaiśvānaraṃ jyotirityāha | suvarevābhi vipaśyati vaiśvānaraṃ jyotiḥ | dyāvāpṛthivī haviṣi gṛhīta udavepetām | dṛm̐hantāṃ duryā dyāvāpṛthivyorityāha | gṛhāṇāṃ dyāvāpṛthivyordhṛtyai | urvantarikṣamanvihītyāha gatyai | adityāstvopasthe sādayāmītyāha | iyaṃ vā aditiḥ | asyā evainadupasthe sādayati | agne havyam̐ rakṣasvetyāha guptyai 7
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.