प्रजापतिरकामयतोभौ लोकाववरुन्धीयेति । स एतानुभयान्पशूनपश्यत् । ग्राम्याꣳ श्चारण्याꣳ श्च । तानालभत । तैर्वै स उभौ लोकाववारुन्ध । ग्राम्यैरेव पशुभिरिमं लोकमवारुन्ध । आरण्यैरमुम् । यद्ग्राम्यान्पशूनालभते । इममेव तैर्लोकमवरुन्धे । यदारण्यान् १ अमुं तैः । अनवरुद्धो वा एतस्य संवत्सर इत्याहुः । य इतेतश्चातुर्मास्यानि संवत्सरं प्रयुङ्क्त इति । एतावान्वै संवत्सरः । यच्चातुर्मास्यानि । यदेते चातुर्मास्याः पशव आलभ्यन्ते । प्रत्यक्षमेव तैः संवत्सरं यजमानोऽवरुन्धे । वि वा एष प्रजया पशुभिरृध्यते । यः संवत्सरं प्रयुङ्क्ते । संवत्सरः सुवर्गो लोकः २ सुवर्गं तु लोकं नापराध्नोति । प्रजा वै पशव एकादशिनी ।यदेत ऐकादशिनाः पशव आलभ्यन्ते । साक्षादेव प्रजां पशून्यजमानोऽवरुन्धे । प्रजापति-र्विराजमसृजत । सा सृष्टाश्वमेधं प्रविशत् । तां दशिभिरनु प्रायुङ्क्त । तामाप्नोत् । तामाप्त्वा दशिभिरवारुन्ध । यद्दशिन आलभ्यन्ते ३ विराजमेव तैराप्त्वा यजमानोऽवरुन्धे । एकादश दशत आलभ्यन्ते । एकादशाक्षरा त्रिष्टुप् । त्रैष्टुभाः पशवः । पशूनेवावरुन्धे । वैश्वदेवो वा अश्वः । नानादेवत्याः पशवो भवन्ति । अश्वस्य सर्वत्वाय । नानारूपा भवन्ति । तस्मान्नानारूपाः पशवः । बहुरूपा भवन्ति । तस्माद्बहुरूपाः पशवः समृद्ध्यै ४
prajāpatirakāmayatobhau lokāvavarundhīyeti | sa etānubhayānpaśūnapaśyat | grāmyām̐ ścāraṇyām̐ śca | tānālabhata | tairvai sa ubhau lokāvavārundha | grāmyaireva paśubhirimaṃ lokamavārundha | āraṇyairamum | yadgrāmyānpaśūnālabhate | imameva tairlokamavarundhe | yadāraṇyān 1 amuṃ taiḥ | anavaruddho vā etasya saṃvatsara ityāhuḥ | ya itetaścāturmāsyāni saṃvatsaraṃ prayuṅkta iti | etāvānvai saṃvatsaraḥ | yaccāturmāsyāni | yadete cāturmāsyāḥ paśava ālabhyante | pratyakṣameva taiḥ saṃvatsaraṃ yajamāno'varundhe | vi vā eṣa prajayā paśubhirṛdhyate | yaḥ saṃvatsaraṃ prayuṅkte | saṃvatsaraḥ suvargo lokaḥ 2 suvargaṃ tu lokaṃ nāparādhnoti | prajā vai paśava ekādaśinī |yadeta aikādaśināḥ paśava ālabhyante | sākṣādeva prajāṃ paśūnyajamāno'varundhe | prajāpati-rvirājamasṛjata | sā sṛṣṭāśvamedhaṃ praviśat | tāṃ daśibhiranu prāyuṅkta | tāmāpnot | tāmāptvā daśibhiravārundha | yaddaśina ālabhyante 3 virājameva tairāptvā yajamāno'varundhe | ekādaśa daśata ālabhyante | ekādaśākṣarā triṣṭup | traiṣṭubhāḥ paśavaḥ | paśūnevāvarundhe | vaiśvadevo vā aśvaḥ | nānādevatyāḥ paśavo bhavanti | aśvasya sarvatvāya | nānārūpā bhavanti | tasmānnānārūpāḥ paśavaḥ | bahurūpā bhavanti | tasmādbahurūpāḥ paśavaḥ samṛddhyai 4
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.