सꣳश्रवा ह सौवर्चनसस् तुमिंजम् औपोदितिम् उवाच यत् सत्त्रिणाꣳ होताभूः काम् इडाम् उपाह्वथा इति ताम् उपाह्व इति होवाच या प्राणेन देवान् दधार व्यानेन मनुष्यान् अपानेन पितॄन् इति छिनत्ति सा न छिनत्ती3 इति छिनत्तीति होवाच शरीरं वा अस्यै तद् उपाह्वथा इति होवाच गौर् वै अस्यै शरीरम् । गां वाव तौ तत् पर्य् अवदताम् या यज्ञे दीयते सा प्राणेन देवान् दाधार यया मनुष्या जीवन्ति सा व्यानेन मनुष्यान् याम् पितृभ्यो घ्नन्ति साऽपानेन पितॄन् य एवं वेद पशुमान् भवति । अथ वै ताम् उपाह्व इति होवाच या प्रजाः प्रभवन्तीः प्रत्य् आभवतीति । अन्नं वा अस्यै तत् ॥ उपाह्वथा इति होवाच । ओषधयो वा अस्या अन्नम् ओषधयो वै प्रजाः प्रभवन्तीः प्रत्य् आ भवन्ति य एवं वेदान्नादो भवति । अथ वै ताम् उपाह्व इति होवाच या प्रजाः पराभवन्तीर् अनुगृह्णाति प्रत्य् आभवन्तीर् गृह्णातीति प्रतिष्ठां वा अस्यै तद् उपाह्वथा इति होवाच । इयं वा अस्यै प्रतिष्ठा ॥ इयं वै प्रजाः पराभवन्तीर् अनु गृह्णाति प्रत्य् आभवन्तीर् गृह्णाति य एवं वेद प्रत्य् एव तिष्ठति । अथ वै ताम् उपाह्व इति होवाच यस्यै निक्रमणे घृतम् प्रजाः संजीवन्तीः पिबन्तीति छिनत्ति सा न छिनत्ती3 इति न छिनत्तीति होवाच प्र तु जनयतीति । एष वा इडाम् उपाह्वथा इति होवाच वृष्टिर् वा इडा वृष्ट्यै वै निक्रमणे घृतम् प्रजाः संजीवन्तीः पिबन्ति य एवं वेद प्रैव जायते ऽन्नादो भवति ॥
sam̐śravā ha sauvarcanasas tumiṃjam aupoditim uvāca yat sattriṇām̐ hotābhūḥ kām iḍām upāhvathā iti tām upāhva iti hovāca yā prāṇena devān dadhāra vyānena manuṣyān apānena pitṝn iti chinatti sā na chinattī3 iti chinattīti hovāca śarīraṃ vā asyai tad upāhvathā iti hovāca gaur vai asyai śarīram | gāṃ vāva tau tat pary avadatām yā yajñe dīyate sā prāṇena devān dādhāra yayā manuṣyā jīvanti sā vyānena manuṣyān yām pitṛbhyo ghnanti sā'pānena pitṝn ya evaṃ veda paśumān bhavati | atha vai tām upāhva iti hovāca yā prajāḥ prabhavantīḥ praty ābhavatīti | annaṃ vā asyai tat || upāhvathā iti hovāca | oṣadhayo vā asyā annam oṣadhayo vai prajāḥ prabhavantīḥ praty ā bhavanti ya evaṃ vedānnādo bhavati | atha vai tām upāhva iti hovāca yā prajāḥ parābhavantīr anugṛhṇāti praty ābhavantīr gṛhṇātīti pratiṣṭhāṃ vā asyai tad upāhvathā iti hovāca | iyaṃ vā asyai pratiṣṭhā || iyaṃ vai prajāḥ parābhavantīr anu gṛhṇāti praty ābhavantīr gṛhṇāti ya evaṃ veda praty eva tiṣṭhati | atha vai tām upāhva iti hovāca yasyai nikramaṇe ghṛtam prajāḥ saṃjīvantīḥ pibantīti chinatti sā na chinattī3 iti na chinattīti hovāca pra tu janayatīti | eṣa vā iḍām upāhvathā iti hovāca vṛṣṭir vā iḍā vṛṣṭyai vai nikramaṇe ghṛtam prajāḥ saṃjīvantīḥ pibanti ya evaṃ veda praiva jāyate 'nnādo bhavati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.