परोऽक्षं वा अन्ये देवा इज्यन्ते प्रत्यक्षम् अन्ये यद् यजते य एव देवाः परोऽक्षम् इज्यन्ते तान् एव तद् यजति यद् अन्वाहार्यम् आहरत्य् एते वै देवाः प्रत्यक्षं यद् ब्राह्मणास् तान् एव तेन प्रीणाति । अथो दक्षिणैवास्यैषा । अथो यज्ञस्यैव छिद्रम् अपि दधाति यद् वै यज्ञस्य क्रूरं यद् विलिष्टं तद् अन्वाहार्येण अन्वाहरति तद् अन्वाहार्यस्यान्वाहार्यत्वम् । देवदूता वा एते यद् ऋत्विजः । यद् अन्वाहार्यम् आहरति देवदूतान् एव प्रीणाति प्रजापतिर् देवेभ्यो यज्ञान् व्यादिशत् स रिरिचानो ऽमन्यत स एतम् अन्वाहार्यम् अभक्तम् अपश्यत् तम् आत्मन्न् अधत्त स वा एष प्राजापत्यो यद् अन्वाहार्यः । यस्यैवंविदुषो ऽन्वाहार्य आह्रियते साक्षाद् एव प्रजापतिम् ऋध्नोति । अपरिमितो निरुप्यः । अपरिमितः प्रजापतिः । प्रजापतेः ॥ आप्त्यै देवा वै यद् यज्ञे ऽकुर्वत तद् असुरा अकुर्वत ते देवा एतम् प्राजापत्यम् अन्वाहार्यम् अपश्यन् तम् अन्वाहरन्त ततो देवा अभवन् परासुराः । यस्यैवं विदुषो ऽन्वाहार्य आह्रियते भवत्य् आत्मना परास्य भ्रातृव्यो भवति यज्ञेन वा इष्टी पक्वेन पूर्ती यस्यैवं विदुषो ऽन्वाहार्य आह्रियते स त्व् एवेष्टापूर्ती प्रजापतेर् भागो ऽसि इत्य् आह प्रजापतिम् एव भागधेयेन सम् अर्धयति । ऊर्जस्वान् पयस्वान् इत्य् आह । ऊर्जम् एवास्मिन् पयो दधाति प्राणापानौ मे पाहि समानव्यानौ मे पाहीत्य् आह । आशिषम् एवैताम् आ शास्ते । अक्षितो ऽस्य् अक्षित्यै त्वा मा मे क्षेष्ठा अमुत्रामुष्मिम्̐ लोक इत्य् आह क्षीयते वा अमुष्मिम्̐ लोके ऽन्नम् इतःप्रदानꣳ ह्य् अमुष्मिम्̐ लोके प्रजा उपजीवन्ति यद् एवम् अभिमृशत्य् अक्षितिम् एवैनद् गमयति नास्यामुष्मिम्̐ लोके ऽन्नं क्षीयते ॥
paro'kṣaṃ vā anye devā ijyante pratyakṣam anye yad yajate ya eva devāḥ paro'kṣam ijyante tān eva tad yajati yad anvāhāryam āharaty ete vai devāḥ pratyakṣaṃ yad brāhmaṇās tān eva tena prīṇāti | atho dakṣiṇaivāsyaiṣā | atho yajñasyaiva chidram api dadhāti yad vai yajñasya krūraṃ yad viliṣṭaṃ tad anvāhāryeṇa anvāharati tad anvāhāryasyānvāhāryatvam | devadūtā vā ete yad ṛtvijaḥ | yad anvāhāryam āharati devadūtān eva prīṇāti prajāpatir devebhyo yajñān vyādiśat sa riricāno 'manyata sa etam anvāhāryam abhaktam apaśyat tam ātmann adhatta sa vā eṣa prājāpatyo yad anvāhāryaḥ | yasyaivaṃviduṣo 'nvāhārya āhriyate sākṣād eva prajāpatim ṛdhnoti | aparimito nirupyaḥ | aparimitaḥ prajāpatiḥ | prajāpateḥ || āptyai devā vai yad yajñe 'kurvata tad asurā akurvata te devā etam prājāpatyam anvāhāryam apaśyan tam anvāharanta tato devā abhavan parāsurāḥ | yasyaivaṃ viduṣo 'nvāhārya āhriyate bhavaty ātmanā parāsya bhrātṛvyo bhavati yajñena vā iṣṭī pakvena pūrtī yasyaivaṃ viduṣo 'nvāhārya āhriyate sa tv eveṣṭāpūrtī prajāpater bhāgo 'si ity āha prajāpatim eva bhāgadheyena sam ardhayati | ūrjasvān payasvān ity āha | ūrjam evāsmin payo dadhāti prāṇāpānau me pāhi samānavyānau me pāhīty āha | āśiṣam evaitām ā śāste | akṣito 'sy akṣityai tvā mā me kṣeṣṭhā amutrāmuṣmim̐ loka ity āha kṣīyate vā amuṣmim̐ loke 'nnam itaḥpradānam̐ hy amuṣmim̐ loke prajā upajīvanti yad evam abhimṛśaty akṣitim evainad gamayati nāsyāmuṣmim̐ loke 'nnaṃ kṣīyate ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.