ध्रुवां वै रिच्यमानां यज्ञो ऽनु रिच्यते यज्ञं यजमानो यजमानम् प्रजाः । ध्रुवाम् आप्यायमानां यज्ञो ऽन्व् आ प्यायते यज्ञं यजमानो यजमानम् प्रजाः । आ प्यायतां ध्रुवा घृतेनेत्य् आह ध्रुवाम् एवा प्याययति ताम् आप्यायमानां यज्ञो ऽन्व् आ प्यायते यज्ञं यजमानो यजमानम् प्रजाः प्रजापतेर् विभान् नाम लोकस् तस्मिꣳस् त्वा दधामि सह यजमानेनेति आह । अयं वै प्रजापतेर् विभान् नाम लोकस् तस्मिन्न् एवैनं दधाति सह यजमानेन रिच्यत इव वा एतद् यद् यजते यद् यजमानभागम् प्राश्नात्य् आत्मानम् एव प्रीणाति । एतावान् वै यज्ञो यावान् यजमानभागः । यज्ञो यजमानः । यद् यजमान भागम् प्राश्नाति यज्ञ एव यज्ञम् प्रति ष्ठापयति । एतद् वै सूयवसꣳ सोदकं यद् बर्हिश् चापश् च । एतत् यजमानस्यायतनं यद् वेदिः । यद् पूर्णपात्रम् अन्तर्वेदि निनयति स्व एवायतने सूयवसꣳ सोदकं कुरुते सद् असि सन् मे भूया इत्य् आह । आपो वै यज्ञः । आपो ऽमृतम् । यज्ञम् एवामृतम् आत्मन् धत्ते सर्वाणि वै भूतानि व्रतम् उपयन्तम् अनूप यन्ति प्राच्यां दिशि देवा ऋत्विजो मार्जयन्ताम् इत्य् आह । एष वै दर्शपूर्णमासयोर् अवभृथः ॥ यान्य् एवैनम् भूतानि व्रतम् उपयन्तम् अनूपयन्ति तैर् एव सहावभृथम् अवैति विष्णुमुखा वै देवाश् छन्दोभिर् इमाँल्लोकान् अनपजय्यम् अभ्य् अजयन् यद् विष्णुक्रमान् क्रमते विष्णुर् एव भूत्वा यजमानः । छन्दोभिर् इमाँल्लोकान् अनपजय्यम् अभि जयति विष्णोः क्रमो ऽस्य् अभिमातिहेत्य् आह गायत्री वै पृथिवी त्रैष्टुभम् अन्तरिक्षं जागती द्यौर् आनुष्टुभीर् दिशः । छन्दोभिर् एवेमाँल्लोकान् यथापूर्वम् अभि जयति ॥
dhruvāṃ vai ricyamānāṃ yajño 'nu ricyate yajñaṃ yajamāno yajamānam prajāḥ | dhruvām āpyāyamānāṃ yajño 'nv ā pyāyate yajñaṃ yajamāno yajamānam prajāḥ | ā pyāyatāṃ dhruvā ghṛtenety āha dhruvām evā pyāyayati tām āpyāyamānāṃ yajño 'nv ā pyāyate yajñaṃ yajamāno yajamānam prajāḥ prajāpater vibhān nāma lokas tasmim̐s tvā dadhāmi saha yajamāneneti āha | ayaṃ vai prajāpater vibhān nāma lokas tasminn evainaṃ dadhāti saha yajamānena ricyata iva vā etad yad yajate yad yajamānabhāgam prāśnāty ātmānam eva prīṇāti | etāvān vai yajño yāvān yajamānabhāgaḥ | yajño yajamānaḥ | yad yajamāna bhāgam prāśnāti yajña eva yajñam prati ṣṭhāpayati | etad vai sūyavasam̐ sodakaṃ yad barhiś cāpaś ca | etat yajamānasyāyatanaṃ yad vediḥ | yad pūrṇapātram antarvedi ninayati sva evāyatane sūyavasam̐ sodakaṃ kurute sad asi san me bhūyā ity āha | āpo vai yajñaḥ | āpo 'mṛtam | yajñam evāmṛtam ātman dhatte sarvāṇi vai bhūtāni vratam upayantam anūpa yanti prācyāṃ diśi devā ṛtvijo mārjayantām ity āha | eṣa vai darśapūrṇamāsayor avabhṛthaḥ || yāny evainam bhūtāni vratam upayantam anūpayanti tair eva sahāvabhṛtham avaiti viṣṇumukhā vai devāś chandobhir imā~llokān anapajayyam abhy ajayan yad viṣṇukramān kramate viṣṇur eva bhūtvā yajamānaḥ | chandobhir imā~llokān anapajayyam abhi jayati viṣṇoḥ kramo 'sy abhimātihety āha gāyatrī vai pṛthivī traiṣṭubham antarikṣaṃ jāgatī dyaur ānuṣṭubhīr diśaḥ | chandobhir evemā~llokān yathāpūrvam abhi jayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.