ब्रह्मवादिनो वदन्ति स त्वा अध्वर्युः स्याद् यः सोमम् उपावहरन्त् सर्वाभ्यो देवताभ्य उपावहरेद् इति हृदे त्वेत्य् आह मनुष्येभ्य एवैतेन करोति मनसे त्वेत्य् आह पितृभ्य एवैतेन करोति दिवे त्वा सूर्याय त्वेत्य् आह देवेभ्य एवैतेन करोति । एतावतीर् वै देवतास् ताभ्य एवैनꣳ सर्वाभ्य उपावहरति पुरा वाचः प्रवदितोः प्रातरनुवाकम् उपाकरोति यावत्य् एव वाक् ताम् अव रुन्द्धे । अपो ऽग्रे ऽभिव्याहरति यज्ञो वा आपो यज्ञम् एवाभि वाचं वि सृजति सर्वाणि छन्दाꣳस्य् अन्व् आह पशवो वै छन्दाꣳसि पशून् एवाव रुन्द्धे गायत्रिया तेजस्कामस्य परि दध्यात् त्रिष्टुभेन्द्रियकामस्य जगत्या पशुकामस्यानुष्टुभा प्रतिष्ठाकामस्य पङ्क्त्या यज्ञकामस्य विराजान्नकामस्य शृणोत्व् अग्निः समिधा हवम् म इत्य् आह सवितृप्रसूत एव देवताभ्यो निवेद्यापो ऽच्छैति । अप इष्य होतर् इत्य् आहेषितꣳ हि कर्म क्रियते मैत्रावरुणस्य चमसाध्वर्यव् आ द्रवेत्य् आह मैत्रावरुणौ वा अपां नेतारौ ताभ्याम् एवैना अच्छैति देवीर् आपो अपां नपाद् इत्य् आहाऽऽहुत्यैवैना निष्क्रीय गृह्णात्य् अथो हविष्कृतानाम् एवाभिघृतानां गृह्णाति । कार्षिर् असीत्य् आह शमलम् एवाऽऽसाम् अप प्लावयति समुद्रस्य वोऽक्षित्या उन् नय इत्य् आह तस्माद् अद्यमानाः पीयमाना आपो न क्षीयन्ते योनिर् वै यज्ञस्य चात्वालं यज्ञो वसतीवरीर् होतृचमसं च मैत्रावरुणचमसं च सꣳस्पर्श्य वसतीवरीर् व्यानयति यज्ञस्य सयोनित्वाय । अथो स्वाद् एवैना योनेः प्र जनयति । अध्वर्यो ऽवेर् अपा3 इत्य् आह । उतेमनंनमुर् उतेमाः पश्य । इति वावैतद् आह यद्य् अग्निष्टोमो जुहोति यद्य् उक्थ्यः परिधौ नि मार्ष्टि यद्य् अतिरात्रो यजुर् वदन् प्र पद्यते यज्ञक्रतूनां व्यावृत्त्यै ॥
brahmavādino vadanti sa tvā adhvaryuḥ syād yaḥ somam upāvaharant sarvābhyo devatābhya upāvahared iti hṛde tvety āha manuṣyebhya evaitena karoti manase tvety āha pitṛbhya evaitena karoti dive tvā sūryāya tvety āha devebhya evaitena karoti | etāvatīr vai devatās tābhya evainam̐ sarvābhya upāvaharati purā vācaḥ pravaditoḥ prātaranuvākam upākaroti yāvaty eva vāk tām ava runddhe | apo 'gre 'bhivyāharati yajño vā āpo yajñam evābhi vācaṃ vi sṛjati sarvāṇi chandām̐sy anv āha paśavo vai chandām̐si paśūn evāva runddhe gāyatriyā tejaskāmasya pari dadhyāt triṣṭubhendriyakāmasya jagatyā paśukāmasyānuṣṭubhā pratiṣṭhākāmasya paṅktyā yajñakāmasya virājānnakāmasya śṛṇotv agniḥ samidhā havam ma ity āha savitṛprasūta eva devatābhyo nivedyāpo 'cchaiti | apa iṣya hotar ity āheṣitam̐ hi karma kriyate maitrāvaruṇasya camasādhvaryav ā dravety āha maitrāvaruṇau vā apāṃ netārau tābhyām evainā acchaiti devīr āpo apāṃ napād ity āhā''hutyaivainā niṣkrīya gṛhṇāty atho haviṣkṛtānām evābhighṛtānāṃ gṛhṇāti | kārṣir asīty āha śamalam evā''sām apa plāvayati samudrasya vo'kṣityā un naya ity āha tasmād adyamānāḥ pīyamānā āpo na kṣīyante yonir vai yajñasya cātvālaṃ yajño vasatīvarīr hotṛcamasaṃ ca maitrāvaruṇacamasaṃ ca sam̐sparśya vasatīvarīr vyānayati yajñasya sayonitvāya | atho svād evainā yoneḥ pra janayati | adhvaryo 'ver apā3 ity āha | utemanaṃnamur utemāḥ paśya | iti vāvaitad āha yady agniṣṭomo juhoti yady ukthyaḥ paridhau ni mārṣṭi yady atirātro yajur vadan pra padyate yajñakratūnāṃ vyāvṛttyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.