देवस्य त्वा सवितुः प्रसव इति ग्रावाणम् आ दत्ते प्रसूत्यै । अश्विनोर् बाहुभ्याम् इत्य् आह । अश्विनौ हि देवानाम् अध्वर्यू आस्ताम् पूष्णो हस्ताभ्याम् इत्य् आह यत्यै पशवो वै सोमो व्यान उपाꣳशुसवनः । यद् उपाꣳशुसवनम् अभि मिमीते व्यानम् एव पशुषु दधाति । इन्द्राय त्वेन्द्राय त्वेति मिमीते । इन्द्राय हि सोम आह्रियते पञ्च कृत्वो यजुषा मिमीते । पञ्चाक्षरा पङ्क्तिः पाङ्क्तो यज्ञः । यज्ञम् एवाव रुन्द्धे पञ्च कृत्वस् तूष्णीम् । दश सम् पद्यन्ते दशाक्षरा विराड् अन्नं विराड् विराजैवान्नाद्यम् अव रुन्द्धे श्वात्रा स्थ वृत्रतुर इत्य् आह । एष वा अपाꣳ सोमपीथः । य एवं वेद नाप्स्व् आर्तिम् आर्च्छति यत् ते सोम दिवि ज्योतिर् इत्य् आह । एभ्य एवैनम् लोकेभ्यः सम् भरति सोमो वै राजा दिशो ऽभ्यध्यायत् स दिशो ऽनु प्राविशत् प्राग् अपाग् उदग् अधराग् इत्य् आह दिग्भ्य एवैनꣳ सम् भरत्य् अथो दिश एवास्मा अव रुन्द्धे । अम्ब नि ष्वरेत्य् आह कामुका एनꣳ स्त्रियो भवन्ति य एवं वेद यत् ते सोमादाभ्यं नाम जागृवीति आह । एष वै सोमस्य सोमपीथः । य एवं वेद न सौम्याम् आर्तिम् आर्च्छति घ्नन्ति वा एतत् सोमं यद् अभिषुण्वन्ति । अꣳशून् अप गृह्णाति त्रायत एवैनम् प्राणा वा अꣳशवः पशवः सोमः । अꣳशून् पुनर् अपि सृजति प्राणान् एव पशुषु दधाति द्वौद्वाव् अपि सृजति तस्माद् द्वौद्वौ प्राणाः ॥
devasya tvā savituḥ prasava iti grāvāṇam ā datte prasūtyai | aśvinor bāhubhyām ity āha | aśvinau hi devānām adhvaryū āstām pūṣṇo hastābhyām ity āha yatyai paśavo vai somo vyāna upām̐śusavanaḥ | yad upām̐śusavanam abhi mimīte vyānam eva paśuṣu dadhāti | indrāya tvendrāya tveti mimīte | indrāya hi soma āhriyate pañca kṛtvo yajuṣā mimīte | pañcākṣarā paṅktiḥ pāṅkto yajñaḥ | yajñam evāva runddhe pañca kṛtvas tūṣṇīm | daśa sam padyante daśākṣarā virāḍ annaṃ virāḍ virājaivānnādyam ava runddhe śvātrā stha vṛtratura ity āha | eṣa vā apām̐ somapīthaḥ | ya evaṃ veda nāpsv ārtim ārcchati yat te soma divi jyotir ity āha | ebhya evainam lokebhyaḥ sam bharati somo vai rājā diśo 'bhyadhyāyat sa diśo 'nu prāviśat prāg apāg udag adharāg ity āha digbhya evainam̐ sam bharaty atho diśa evāsmā ava runddhe | amba ni ṣvarety āha kāmukā enam̐ striyo bhavanti ya evaṃ veda yat te somādābhyaṃ nāma jāgṛvīti āha | eṣa vai somasya somapīthaḥ | ya evaṃ veda na saumyām ārtim ārcchati ghnanti vā etat somaṃ yad abhiṣuṇvanti | am̐śūn apa gṛhṇāti trāyata evainam prāṇā vā am̐śavaḥ paśavaḥ somaḥ | am̐śūn punar api sṛjati prāṇān eva paśuṣu dadhāti dvaudvāv api sṛjati tasmād dvaudvau prāṇāḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.