Vājasaneyi Saṃhitā (Śukla Yajurveda, as given on Wikisource) 29

समिद्धो ऽ अञ्जन् कृदरं मतीनां घृतम् अग्ने मधुमत् पिन्वमानः । वाजी वहन् वाजिनं जातवेदो देवानां वक्षि प्रियम् आ सधस्थम् ॥

samiddho ' añjan kṛdaraṃ matīnāṃ ghṛtam agne madhumat pinvamānaḥ | vājī vahan vājinaṃ jātavedo devānāṃ vakṣi priyam ā sadhastham ||

Sanskrit only: no published translation is held for this verse.

घृतेनाञ्जन्त् सं पथो देवयानान् प्रजानन् वाज्य् अप्य् एतु देवान् । अनु त्वा सप्ते प्रदिशः सचन्ताꣳ स्वधाम् अस्मै यजमानाय धेहि ॥

ghṛtenāñjant saṃ patho devayānān prajānan vājy apy etu devān | anu tvā sapte pradiśaḥ sacantām̐ svadhām asmai yajamānāya dhehi ||

Sanskrit only: no published translation is held for this verse.

ईड्यश् चासि वन्द्यश् च वाजिन्न् आशुश् चासि मेध्यश् च सप्ते । अग्निष् ट्वा देवैर् वसुभिः सजोषाः प्रीतं वह्निं वहतु जातवेदाः ॥

īḍyaś cāsi vandyaś ca vājinn āśuś cāsi medhyaś ca sapte | agniṣ ṭvā devair vasubhiḥ sajoṣāḥ prītaṃ vahniṃ vahatu jātavedāḥ ||

Sanskrit only: no published translation is held for this verse.

स्तीर्णं बर्हिः सुष्टरीमा जुषाणोरु पृथु प्रथमानं पृथिव्याम् । देवेभिर् युक्तम् अदितिः सजोषाः स्योनं कृण्वान सुविते दधातु ॥

stīrṇaṃ barhiḥ suṣṭarīmā juṣāṇoru pṛthu prathamānaṃ pṛthivyām | devebhir yuktam aditiḥ sajoṣāḥ syonaṃ kṛṇvāna suvite dadhātu ||

Sanskrit only: no published translation is held for this verse.

एता ऽ उ वः सुभगा विश्वरूपा वि पक्षोभिः श्रयमाणा ऽ उदातैः । ऋष्वाः सतीः कवषः शुम्भमाना द्वारो देवीः सुप्रायणा भवन्तु ॥

etā ' u vaḥ subhagā viśvarūpā vi pakṣobhiḥ śrayamāṇā ' udātaiḥ | ṛṣvāḥ satīḥ kavaṣaḥ śumbhamānā dvāro devīḥ suprāyaṇā bhavantu ||

Sanskrit only: no published translation is held for this verse.

अन्तरा मित्रावरुणा चरन्ती मुखं यज्ञानाम् अभि संविदाने । उषासा वाꣳ सुहिरण्ये सुशिल्पे ऽ ऋतस्य योनाव् इह सादयामि ॥

antarā mitrāvaruṇā carantī mukhaṃ yajñānām abhi saṃvidāne | uṣāsā vām̐ suhiraṇye suśilpe ' ṛtasya yonāv iha sādayāmi ||

Sanskrit only: no published translation is held for this verse.

प्रथमा वाꣳ सरथिना सुवर्णा देवौ पश्यन्तौ भुवनानि विश्वा । अपिप्रयं चोदना वां मिमाना होतारा ज्योतिः प्रदिशा दिशन्ता ॥

prathamā vām̐ sarathinā suvarṇā devau paśyantau bhuvanāni viśvā | apiprayaṃ codanā vāṃ mimānā hotārā jyotiḥ pradiśā diśantā ||

Sanskrit only: no published translation is held for this verse.

आदित्यैर् नो भारती वष्टु यज्ञꣳ सरस्वती सह रुद्रैर् न ऽ आवीत् । इडोपहूता वसुभिः सजोषा यज्ञं नो देवीर् अमृतेषु धत्त ॥

ādityair no bhāratī vaṣṭu yajñam̐ sarasvatī saha rudrair na ' āvīt | iḍopahūtā vasubhiḥ sajoṣā yajñaṃ no devīr amṛteṣu dhatta ||

Sanskrit only: no published translation is held for this verse.

त्वष्टा वीरं देवकामं जजान त्वष्टुर् अर्वा जायत ऽ आशुर् अश्वः । त्वष्टेदं विश्वं भुवनं जजान बहोः कर्तारम् इह यक्षि होतः ॥

tvaṣṭā vīraṃ devakāmaṃ jajāna tvaṣṭur arvā jāyata ' āśur aśvaḥ | tvaṣṭedaṃ viśvaṃ bhuvanaṃ jajāna bahoḥ kartāram iha yakṣi hotaḥ ||

Sanskrit only: no published translation is held for this verse.

अश्वो घृतेन त्मन्या समक्त ऽ उप देवाꣳ२ऽ ऋतुशः पाथ ऽ एतु । वनस्पतिर् देवलोकं प्रजानन्न् अग्निना हव्या स्वदितानि वक्षत् ॥

aśvo ghṛtena tmanyā samakta ' upa devām̐2' ṛtuśaḥ pātha ' etu | vanaspatir devalokaṃ prajānann agninā havyā svaditāni vakṣat ||

Sanskrit only: no published translation is held for this verse.

प्रजापतेस् तपसा वावृधानः सद्यो जातो दधिषे यज्ञम् अग्ने । स्वाहाकृतेन हविषा पुरोगा याहि साध्या हविर् अदन्तु देवाः ॥

prajāpates tapasā vāvṛdhānaḥ sadyo jāto dadhiṣe yajñam agne | svāhākṛtena haviṣā purogā yāhi sādhyā havir adantu devāḥ ||

Sanskrit only: no published translation is held for this verse.

यद् अक्रन्दः प्रथमं जायमान ऽ उद्यन्त् समुद्राद् उत वा पुरीषात् । श्येनस्य पक्षा हरिणस्य बाहू ऽ उपस्तुत्यं महि जातं ते ऽ अर्वन् ॥

yad akrandaḥ prathamaṃ jāyamāna ' udyant samudrād uta vā purīṣāt | śyenasya pakṣā hariṇasya bāhū ' upastutyaṃ mahi jātaṃ te ' arvan ||

यमेन दत्तं त्रित ऽ एनम् आयुनग् इन्द्र ऽ एणं प्रथमो ऽ अध्य् अतिष्ठत् । गन्धर्वो ऽ अस्य रशनाम् अगृभ्णात् सूराद् अश्वं वसवो निर् अतष्ट ॥

yamena dattaṃ trita ' enam āyunag indra ' eṇaṃ prathamo ' adhy atiṣṭhat | gandharvo ' asya raśanām agṛbhṇāt sūrād aśvaṃ vasavo nir ataṣṭa ||

असि यमो ऽ अस्य् आदित्यो ऽ अर्वन्न् असि त्रितो गुह्येन व्रतेन । असि सोमेन समया विपृक्त ऽ आहुस् ते त्रीणि दिवि बन्धनानि ॥

asi yamo ' asy ādityo ' arvann asi trito guhyena vratena | asi somena samayā vipṛkta ' āhus te trīṇi divi bandhanāni ||

त्रीणि त ऽ आहुर् दिवि बन्धनानि त्रीण्य् अप्सु त्रीण्य् अन्तः समुद्रे । उतेव मे वरुणश् छन्त्स्य् अर्वन् यत्रा त ऽ आहुः परमं जनित्रम् ॥

trīṇi ta ' āhur divi bandhanāni trīṇy apsu trīṇy antaḥ samudre | uteva me varuṇaś chantsy arvan yatrā ta ' āhuḥ paramaṃ janitram ||

इमा ते वाजिन्न् अवमार्जनानीमा शफानाꣳ सनितुर् निधाना । अत्रा ते भद्रा रशना ऽ अपश्यम् ऋतस्य या ऽ अभिरक्षन्ति गोपाः ॥

imā te vājinn avamārjanānīmā śaphānām̐ sanitur nidhānā | atrā te bhadrā raśanā ' apaśyam ṛtasya yā ' abhirakṣanti gopāḥ ||

आत्मानं ते मनसाराद् अजानाम् अवो दिवा पतयन्तं पतंगम् । शिरो ऽ अपश्यं पथिभिः सुगेभिर् अरेणुभिर् जेहमानं पतत्रि ॥

ātmānaṃ te manasārād ajānām avo divā patayantaṃ pataṃgam | śiro ' apaśyaṃ pathibhiḥ sugebhir areṇubhir jehamānaṃ patatri ||

अत्रा ते रूपम् उत्तमम् अपश्यं जिगीषमाणम् इष ऽ आ पदे गोः । यदा ते मर्तो ऽ अनु भोगम् आनड् आद् इद् ग्रसिष्ठ ऽ ओषधीर् अजीगः ॥

atrā te rūpam uttamam apaśyaṃ jigīṣamāṇam iṣa ' ā pade goḥ | yadā te marto ' anu bhogam ānaḍ ād id grasiṣṭha ' oṣadhīr ajīgaḥ ||

अनु त्वा रथो ऽ अनु मर्यो ऽ अर्वन्न् अनु गावो ऽनु भगः कनीनाम् । अनु व्रातासस् तव सख्यम् ईयुर् अनु देवा ममिरे वीर्यं ते ॥

anu tvā ratho ' anu maryo ' arvann anu gāvo 'nu bhagaḥ kanīnām | anu vrātāsas tava sakhyam īyur anu devā mamire vīryaṃ te ||

हिरण्यशृङ्गो ऽयो अस्य पादा मनोजवा ऽ अवर इन्द्र ऽ आसीत् । देवा ऽ इद् अस्य हविरद्यम् आयन् यो ऽ अर्वन्तं प्रथमो ऽ अध्यतिष्ठत् ॥

hiraṇyaśṛṅgo 'yo asya pādā manojavā ' avara indra ' āsīt | devā ' id asya haviradyam āyan yo ' arvantaṃ prathamo ' adhyatiṣṭhat ||

ईर्मान्तासः सिलिकमध्यमासः सꣳ शूरणासो दिव्यासो ऽ अत्याः । हꣳसा ऽ इव श्रेणिशो यतन्ते यद् आक्षिषुर् दिव्यम् अज्मम् अश्वाः ॥

īrmāntāsaḥ silikamadhyamāsaḥ sam̐ śūraṇāso divyāso ' atyāḥ | ham̐sā ' iva śreṇiśo yatante yad ākṣiṣur divyam ajmam aśvāḥ ||

तव शरीरं पतयिष्ण्व् अर्वन् तव चित्तं वात ऽ इव ध्रजीमान् । तव शृङ्गाणि विष्ठिता पुरुत्रारण्येषु जर्भुराणा चरन्ति ॥

tava śarīraṃ patayiṣṇv arvan tava cittaṃ vāta ' iva dhrajīmān | tava śṛṅgāṇi viṣṭhitā purutrāraṇyeṣu jarbhurāṇā caranti ||

उप प्रागाच् छसनं वाज्य् अर्वा देवद्रीचा मनसा दीध्यानः । अजः पुरो नीयते नाभिर् अस्यानु पश्चात् कवयो यन्ति रेभाः ॥

upa prāgāc chasanaṃ vājy arvā devadrīcā manasā dīdhyānaḥ | ajaḥ puro nīyate nābhir asyānu paścāt kavayo yanti rebhāḥ ||

उप प्रागात् परमं यत् सधस्थम् अर्वाꣳ२ऽ अच्छा पितरं मातरं च । अद्या देवान् जुष्टतमो हि गम्या ऽ अथा शास्ते दाशुषे वार्याणि ॥

upa prāgāt paramaṃ yat sadhastham arvām̐2' acchā pitaraṃ mātaraṃ ca | adyā devān juṣṭatamo hi gamyā ' athā śāste dāśuṣe vāryāṇi ||

समिद्धो ऽ अद्य मनुषो दुरोणे देवो देवान् यजसि जातवेदः । आ च वह मित्रमहश् चिकित्वान् त्वं दूतः कविर् असि प्रचेताः ॥

samiddho ' adya manuṣo duroṇe devo devān yajasi jātavedaḥ | ā ca vaha mitramahaś cikitvān tvaṃ dūtaḥ kavir asi pracetāḥ ||

तनूनपात् पथ ऽ ऋतस्य यानान् मध्वा समञ्जन्त् स्वदया सुजिह्व । मन्मानि धीभिर् उत यज्ञम् ऋन्धन् देवत्रा च कृणुह्य् अध्वरं नः ॥

tanūnapāt patha ' ṛtasya yānān madhvā samañjant svadayā sujihva | manmāni dhībhir uta yajñam ṛndhan devatrā ca kṛṇuhy adhvaraṃ naḥ ||

नराशꣳसस्य महिमानम् एषाम् उप स्तोषाम यजतस्य यज्ञैः । ये सुक्रतवः शुचयो धियंधाः स्वदन्ति देवा ऽ उभयानि हव्या ॥

narāśam̐sasya mahimānam eṣām upa stoṣāma yajatasya yajñaiḥ | ye sukratavaḥ śucayo dhiyaṃdhāḥ svadanti devā ' ubhayāni havyā ||

Sanskrit only: no published translation is held for this verse.

आजुह्वान ऽ ईड्यो वन्द्यश् चा याह्य् अग्ने वसुभिः सजोषाः । त्वं देवानाम् असि यह्व होता स ऽ एनान् यक्षीषितो यजीयान् ॥

ājuhvāna ' īḍyo vandyaś cā yāhy agne vasubhiḥ sajoṣāḥ | tvaṃ devānām asi yahva hotā sa ' enān yakṣīṣito yajīyān ||

प्राचीनं बर्हिः प्रदिशा पृथिव्या वस्तोर् अस्या वृज्यते ऽ अग्रे ऽ अह्नाम् । व्य् उ प्रथते वितरं वरीयो देवेभ्यो ऽ अदितये स्योनम् ॥

prācīnaṃ barhiḥ pradiśā pṛthivyā vastor asyā vṛjyate ' agre ' ahnām | vy u prathate vitaraṃ varīyo devebhyo ' aditaye syonam ||

व्यचस्वतीर् उर्विया वि श्रयन्तां पतिभ्यो न जनयः शुम्भमानाः । देवीर् द्वारो बृहतीर् विश्वमिन्वा देवेभ्यो भवत सुप्रायणाः ॥

vyacasvatīr urviyā vi śrayantāṃ patibhyo na janayaḥ śumbhamānāḥ | devīr dvāro bṛhatīr viśvaminvā devebhyo bhavata suprāyaṇāḥ ||

आ सुष्वयन्ती यजते ऽ उपाके ऽ उषासानक्ता सदतां नि योनौ । दिव्ये योषणे बृहती सुरुक्मे ऽ अधि श्रियꣳ शुक्रपिशं दधाने ॥

ā suṣvayantī yajate ' upāke ' uṣāsānaktā sadatāṃ ni yonau | divye yoṣaṇe bṛhatī surukme ' adhi śriyam̐ śukrapiśaṃ dadhāne ||

दैव्या होतारा प्रथमा सुवाचा मिमाना यज्ञं मनुषो यजध्यै । प्रचोदयन्ता विदथेषु कारू प्राचीनं ज्योतिः प्रदिशा दिशन्ता ॥

daivyā hotārā prathamā suvācā mimānā yajñaṃ manuṣo yajadhyai | pracodayantā vidatheṣu kārū prācīnaṃ jyotiḥ pradiśā diśantā ||

आ नो यज्ञं भारती तूयम् एत्व् इडा मनुष्वद् इह चेतयन्ती । तिस्रो देवीर् बर्हिर् एदꣳ स्योनꣳ सरस्वती स्वपसः सदन्तु ॥

ā no yajñaṃ bhāratī tūyam etv iḍā manuṣvad iha cetayantī | tisro devīr barhir edam̐ syonam̐ sarasvatī svapasaḥ sadantu ||

य ऽ इमे द्यावापृथिवी जनित्री रूपइर् अपिꣳशद् भुवनानि विश्वा । तम् अद्य होतर् इषितो यजीयान् देवं त्वष्टारम् इह यक्षि विद्वान् ॥

ya ' ime dyāvāpṛthivī janitrī rūpair apim̐śad bhuvanāni viśvā | tam adya hotar iṣito yajīyān devaṃ tvaṣṭāram iha yakṣi vidvān ||

उपाव सृज त्मन्या समञ्जन् देवानां पाथ ऽ ऋतुथा हवीꣳषि । वनस्पतिः शमिता देवो ऽ अग्निः स्वदन्तु हव्यं मधुना घृतेन ॥

upāva sṛja tmanyā samañjan devānāṃ pātha ' ṛtuthā havīm̐ṣi | vanaspatiḥ śamitā devo ' agniḥ svadantu havyaṃ madhunā ghṛtena ||

सद्यो जातो व्यमिमीत यज्ञम् अग्निर् देवानाम् अभवत् पुरोगाः । अस्य होतुः प्रदिश्य् ऋतस्य वाचि स्वाहाकृतꣳ हविर् अदन्तु देवाः ॥

sadyo jāto vyamimīta yajñam agnir devānām abhavat purogāḥ | asya hotuḥ pradiśy ṛtasya vāci svāhākṛtam̐ havir adantu devāḥ ||

केतुं कृण्वन्न् अकेतवे पेशो मर्या ऽ अपेशसे । सम् उषद्भिर् अजायथाः ॥

ketuṃ kṛṇvann aketave peśo maryā ' apeśase | sam uṣadbhir ajāyathāḥ ||

जीमूतस्येव भवति प्रतीकं यद् वर्मी याति समदाम् उपस्थे । अनाविद्धया तन्वा जय त्वꣳ स त्वा वर्मणो महिमा पिपर्तु ॥

jīmūtasyeva bhavati pratīkaṃ yad varmī yāti samadām upasthe | anāviddhayā tanvā jaya tvam̐ sa tvā varmaṇo mahimā pipartu ||

धन्वना गा धन्वनाजिं जयेम धन्वना तीव्राः समदो जयेम । धनुः शत्रोर् अपकामं कृणोति धन्वना सर्वाः प्रदिशो जयेम ॥

dhanvanā gā dhanvanājiṃ jayema dhanvanā tīvrāḥ samado jayema | dhanuḥ śatror apakāmaṃ kṛṇoti dhanvanā sarvāḥ pradiśo jayema ||

वक्ष्यन्तीवेद् आ गनीगन्ति कर्णं प्रियꣳ सखायं परिषस्वजाना । योषेव शिङ्क्ते वितताधि धन्वन् ज्या इयꣳ समने पारयन्ती ॥

vakṣyantīved ā ganīganti karṇaṃ priyam̐ sakhāyaṃ pariṣasvajānā | yoṣeva śiṅkte vitatādhi dhanvan jyā iyam̐ samane pārayantī ||

ते ऽ आचरन्ती समनेव योषा मातेव पुत्रं बिभृताम् उपस्थे । अप शत्रून् विध्यताꣳ संविदाने ऽ आर्त्नी इमे विष्फुरन्ती ऽ अमित्रान् ॥

te ' ācarantī samaneva yoṣā māteva putraṃ bibhṛtām upasthe | apa śatrūn vidhyatām̐ saṃvidāne ' ārtnī ime viṣphurantī ' amitrān ||

बह्वीनां पिता बहुर् अस्य पुत्रश् चिश्चा कृणोति समनावगत्य । इषुधिः सङ्काः पृतनाश् च सर्वाः पृष्ठे निनद्धो जयति प्रसूतः ॥

bahvīnāṃ pitā bahur asya putraś ciścā kṛṇoti samanāvagatya | iṣudhiḥ saṅkāḥ pṛtanāś ca sarvāḥ pṛṣṭhe ninaddho jayati prasūtaḥ ||

रथे तिष्ठन् नयति वाजिनः पुरो यत्र-यत्र कामयते सुषारथिः । अभीशूनां महिमानं पनायत मनः पश्चाद् अनु यच्छन्ति रश्मयः ॥

rathe tiṣṭhan nayati vājinaḥ puro yatra-yatra kāmayate suṣārathiḥ | abhīśūnāṃ mahimānaṃ panāyata manaḥ paścād anu yacchanti raśmayaḥ ||

तीव्रान् घोषान् कृण्वते वृषपाणयो ऽश्वा रथेभिः सह वाजयन्तः । अवक्रामन्तः प्रपदैर् अमित्रान् क्षिणन्ति शत्रूꣳ१ऽ रनपव्ययन्तः ॥

tīvrān ghoṣān kṛṇvate vṛṣapāṇayo 'śvā rathebhiḥ saha vājayantaḥ | avakrāmantaḥ prapadair amitrān kṣiṇanti śatrūm̐1' ranapavyayantaḥ ||

रथवाहनꣳ हविर् अस्य नाम यत्रायुधं निहितम् अस्य वर्म । तत्रा रथम् उप शग्मꣳ सदेम विश्वाहा वयꣳ सुमनस्यमानाः ॥

rathavāhanam̐ havir asya nāma yatrāyudhaṃ nihitam asya varma | tatrā ratham upa śagmam̐ sadema viśvāhā vayam̐ sumanasyamānāḥ ||

स्वादुषꣳसदः पितरो वयोधाः कृच्छ्रेश्रितः शक्तीवन्तो गभीराः । चित्रसेना ऽ इषुबला ऽ अमृध्राः सतोवीरा ऽ उरवो व्रातसाहाः ॥

svāduṣam̐sadaḥ pitaro vayodhāḥ kṛcchreśritaḥ śaktīvanto gabhīrāḥ | citrasenā ' iṣubalā ' amṛdhrāḥ satovīrā ' uravo vrātasāhāḥ ||

ब्राह्मणासः पितरः सोम्यासः शिवे नो द्यावापृथिवी ऽ अनेहसा । पूषा नः पातु दुरिताद् ऋतावृधो रक्षा माकिर् नो ऽ अघशꣳस ऽ ईशत ॥

brāhmaṇāsaḥ pitaraḥ somyāsaḥ śive no dyāvāpṛthivī ' anehasā | pūṣā naḥ pātu duritād ṛtāvṛdho rakṣā mākir no ' aghaśam̐sa ' īśata ||

सुपर्णं वस्ते मृगो ऽ अस्या दन्तो गोभिः संनद्धा पतति प्रसूता । यत्रा नरः सं च वि च द्रवन्ति तत्रास्मभ्यम् इषवः शर्म यꣳसन् ॥

suparṇaṃ vaste mṛgo ' asyā danto gobhiḥ saṃnaddhā patati prasūtā | yatrā naraḥ saṃ ca vi ca dravanti tatrāsmabhyam iṣavaḥ śarma yam̐san ||

ऋजीते परि वृङ्धि नो ऽश्मा भवतु नस् तनूः । सोमो ऽ अधि ब्रवीतु नो ऽदितिः शर्म यच्छतु ॥

ṛjīte pari vṛṅdhi no 'śmā bhavatu nas tanūḥ | somo ' adhi bravītu no 'ditiḥ śarma yacchatu ||

आ जङ्घन्ति सान्व् एषां जघनाꣳ२ऽ उप जिघ्नते । अश्वाजनि प्रचेतसो ऽश्वान्त् समत्सु चोदय ॥

ā jaṅghanti sānv eṣāṃ jaghanām̐2' upa jighnate | aśvājani pracetaso 'śvānt samatsu codaya ||

अहिर् इव भोगैः पर्य् एति बाहुं ज्याया हेतिं परिबाधमानः । हस्तघ्नो विश्वा वयुनानि विद्वान् पुमान् पुमाꣳसं परि पातु विश्वतः ॥

ahir iva bhogaiḥ pary eti bāhuṃ jyāyā hetiṃ paribādhamānaḥ | hastaghno viśvā vayunāni vidvān pumān pumām̐saṃ pari pātu viśvataḥ ||

वनस्पते वीड्वङ्गो हि भूया ऽ अस्मत्सखा प्रतरणः सुवीरः । गोभिः संनद्धो ऽ असि वीडयस्वास्थाता ते जयतु जेत्वानि ॥

vanaspate vīḍvaṅgo hi bhūyā ' asmatsakhā prataraṇaḥ suvīraḥ | gobhiḥ saṃnaddho ' asi vīḍayasvāsthātā te jayatu jetvāni ||

दिवः पृथिव्याः पर्य् ओज ऽ उद्भृतं वनस्पतिभ्यः पर्य् आभृतꣳ सहः । अपाम् ओज्मानं परि गोभिर् आवृतम् इन्द्रस्य वज्रꣳ हविषा रथं यज ॥

divaḥ pṛthivyāḥ pary oja ' udbhṛtaṃ vanaspatibhyaḥ pary ābhṛtam̐ sahaḥ | apām ojmānaṃ pari gobhir āvṛtam indrasya vajram̐ haviṣā rathaṃ yaja ||

इन्द्रस्य वज्रो मरुताम् अनीकं मित्रस्य गर्भो वरुणस्य नाभिः । सेमां नो हव्यदातिं जुषाणो देव रथ प्रति हव्या गृभाय ॥

indrasya vajro marutām anīkaṃ mitrasya garbho varuṇasya nābhiḥ | semāṃ no havyadātiṃ juṣāṇo deva ratha prati havyā gṛbhāya ||

उप श्वासय पृथिवीम् उत द्यां पुरुत्रा ते मनुतां विष्ठितं जगत् । स दुन्दुभे सजूर् इन्द्रेण देवैर् दूराद् दवीयो ऽ अप सेध शत्रून् ॥

upa śvāsaya pṛthivīm uta dyāṃ purutrā te manutāṃ viṣṭhitaṃ jagat | sa dundubhe sajūr indreṇa devair dūrād davīyo ' apa sedha śatrūn ||

आ क्रन्दय बलम् ओजो न ऽ आ धा नि ष्टनिहि दुरिता बाधमानः । अप प्रोथ दुन्दुभे दुच्छुना ऽ इत ऽ इन्द्रस्य मुष्टिर् असि वीडयस्व ॥

ā krandaya balam ojo na ' ā dhā ni ṣṭanihi duritā bādhamānaḥ | apa protha dundubhe ducchunā ' ita ' indrasya muṣṭir asi vīḍayasva ||

आमूर् अज प्रत्या वर्तयेमाः केतुमद् दुन्दुभिर् वावदीति । सम् अश्वपर्णाश् चरन्ति नो नरो ऽस्माकम् इन्द्र रथिनो जयन्तु ॥

āmūr aja pratyā vartayemāḥ ketumad dundubhir vāvadīti | sam aśvaparṇāś caranti no naro 'smākam indra rathino jayantu ||

आग्नेयः कृष्णग्रीवः सारस्वती मेषी बभ्रुः सौम्यः पौष्णः श्यामः शितिपृष्ठो बार्हस्पत्यः शिल्पो वैश्वदेव ऽ ऐन्द्रो ऽरुणो मारुतः कल्माष ऽ ऐन्द्राग्नः सꣳहितो ऽधोरामः सावित्रो वारुणः कृष्ण ऽ एकशितिपात् पेत्वः ॥

āgneyaḥ kṛṣṇagrīvaḥ sārasvatī meṣī babhruḥ saumyaḥ pauṣṇaḥ śyāmaḥ śitipṛṣṭho bārhaspatyaḥ śilpo vaiśvadeva ' aindro 'ruṇo mārutaḥ kalmāṣa ' aindrāgnaḥ sam̐hito 'dhorāmaḥ sāvitro vāruṇaḥ kṛṣṇa ' ekaśitipāt petvaḥ ||

Sanskrit only: no published translation is held for this verse.

अग्नये ऽनीकवते रोहिताञ्जिर् अनड्वान् अधोरामौ सावित्रौ पौष्णौ रजतनाभी वैश्वदेवौ पिशंगौ तूपरु मारुतः कल्माष ऽ आग्नेयः कृष्णो ऽजः सारस्वती मेषी वारुणः पेत्वः ॥

agnaye 'nīkavate rohitāñjir anaḍvān adhorāmau sāvitrau pauṣṇau rajatanābhī vaiśvadevau piśaṃgau tūparu mārutaḥ kalmāṣa ' āgneyaḥ kṛṣṇo 'jaḥ sārasvatī meṣī vāruṇaḥ petvaḥ ||

Sanskrit only: no published translation is held for this verse.

अग्नये गायत्राय त्रिवृते राथन्तरायाष्टाकपाल ऽ इन्द्राय त्रैष्टुभाय पञ्चदशाय बर्हतायैकादशकपालो विश्वेभ्यो देवेभ्यो जागतेभ्यः सप्तदशेभ्यो वैरूपेभ्यो द्वादशकपालो मित्रावरुणाभ्याम् आनुष्टुभाभ्याम् एकविꣳशाभ्यां वैराजाभ्यां पयस्या बृहस्पतये पाङ्क्ताय त्रिणवाय शाक्वराय चरुः सवित्र ऽ औष्णिहाय त्रयस्त्रिꣳशाय रैवताय द्वादशकपालः प्राजापत्यश् चरुर् अदित्यै विष्णुपत्न्यै चरुर् अग्नये वैश्वानराय द्वादशकपालो ऽनुमत्या ऽ अष्टाकपालः ॥

agnaye gāyatrāya trivṛte rāthantarāyāṣṭākapāla ' indrāya traiṣṭubhāya pañcadaśāya barhatāyaikādaśakapālo viśvebhyo devebhyo jāgatebhyaḥ saptadaśebhyo vairūpebhyo dvādaśakapālo mitrāvaruṇābhyām ānuṣṭubhābhyām ekavim̐śābhyāṃ vairājābhyāṃ payasyā bṛhaspataye pāṅktāya triṇavāya śākvarāya caruḥ savitra ' auṣṇihāya trayastrim̐śāya raivatāya dvādaśakapālaḥ prājāpatyaś carur adityai viṣṇupatnyai carur agnaye vaiśvānarāya dvādaśakapālo 'numatyā ' aṣṭākapālaḥ ||

Sanskrit only: no published translation is held for this verse.