Aryasura: Jatakamala 14

धर्माश्रयं सत्यवचनम् अप्य् आपदं नुदति प्राग् एव तत्फलम् इति धर्मानुवर्तिना भवितव्यम् ॥ तद्यथानुश्रूयते । बोधिसत्त्वः किल महासत्त्वः परमनिपुणमतिर् नौसारथिर् बभूव । धर्मता ह्य् एषा बोधिसत्त्वानां प्रकृतिमेधावित्वाद् यद् उत यं यं शास्त्रातिशयं जिज्ञासन्ते कलाविशेषं वा तस्मिंस् तस्मिन्न् अधिका भवन्ति मेधाविनो जगतः ॥ अथ स महात्मा विदितज्योतिर्गतित्वाद् दिग्विभागेष्व् असंमूढमतिः परिविदितनियतागन्तुकौत्पातिकनिमित्तः कालाकालक्रमकुशलो मीनतोयवर्णभौमप्रकारशकुनिपर्वतादिभिश् चिह्नैः सूपलक्षितसमुद्रप्रदेशः स्मृतिमान् विजिततन्द्रीनिद्रः शीतोष्णवर्षादिपरिखेदसहिष्णुर् अप्रमादी धृतिमान् आहरणापसरणादिकुशलत्वाद् ईप्सितं देशं प्रापयिता वणिजाम् आसीत् । तस्य परमसिद्धयात्रत्वात् सुपारग इत्य् एव नाम बभूव । तदध्युषितं च पत्तनं सुपारगम् इत्य् एव ख्यातम् आसीत् । यद् एतर्हि शूर्पारकम् इति ज्ञायते ॥ सो ऽतिमङ्गलसंमतत्वाद् वृद्धत्वे ऽपि सांयात्रिकैर् यात्रासिद्धिकामैर् वहनम् अभ्यर्थनसत्कारपुरःसरम् आरोप्यते स्म ॥ अथ कदा चिद् भरुकच्छाद् अभिप्रयाताः सुवर्णभूमिं वणिजो यात्रासिद्धिकामाः सुपारगं पत्तनम् उपेत्य तं महासत्त्वं वहनारोहणार्थम् अभ्यर्थयाम् आसुः । स तान् उवाच । जराज्ञया संह्रियमाणदर्शने श्रमाभिपातैः प्रतनूकृतस्मृतौ । स्वदेहकृत्ये ऽप्य् अवसन्नविक्रमे सहायता का परिशङ्क्यते मयि

dharmāśrayaṃ satyavacanam apy āpadaṃ nudati prāg eva tatphalam iti dharmānuvartinā bhavitavyam // tadyathānuśrūyate / bodhisattvaḥ kila mahāsattvaḥ paramanipuṇamatir nausārathir babhūva / dharmatā hy eṣā bodhisattvānāṃ prakṛtimedhāvitvād yad uta yaṃ yaṃ śāstrātiśayaṃ jijñāsante kalāviśeṣaṃ vā tasmiṃs tasminn adhikā bhavanti medhāvino jagataḥ // atha sa mahātmā viditajyotirgatitvād digvibhāgeṣv asaṃmūḍhamatiḥ parividitaniyatāgantukautpātikanimittaḥ kālākālakramakuśalo mīnatoyavarṇabhaumaprakāraśakuniparvatādibhiś cihnaiḥ sūpalakṣitasamudrapradeśaḥ smṛtimān vijitatandrīnidraḥ śītoṣṇavarṣādiparikhedasahiṣṇur apramādī dhṛtimān āharaṇāpasaraṇādikuśalatvād īpsitaṃ deśaṃ prāpayitā vaṇijām āsīt / tasya paramasiddhayātratvāt supāraga ity eva nāma babhūva / tadadhyuṣitaṃ ca pattanaṃ supāragam ity eva khyātam āsīt / yad etarhi śūrpārakam iti jñāyate // so 'timaṅgalasaṃmatatvād vṛddhatve 'pi sāṃyātrikair yātrāsiddhikāmair vahanam abhyarthanasatkārapuraḥsaram āropyate sma // atha kadā cid bharukacchād abhiprayātāḥ suvarṇabhūmiṃ vaṇijo yātrāsiddhikāmāḥ supāragaṃ pattanam upetya taṃ mahāsattvaṃ vahanārohaṇārtham abhyarthayām āsuḥ / sa tān uvāca / jarājñayā saṃhriyamāṇadarśane śramābhipātaiḥ pratanūkṛtasmṛtau / svadehakṛtye 'py avasannavikrame sahāyatā kā pariśaṅkyate mayi

Sanskrit only: no published translation is held for this verse.

वणिज ऊचुः । विदितेयम् अस्माकं युष्मच्छरीरावस्था । सत्य् अपि च वः पराक्रमसहत्वे नैव वयं कर्मविनियोगेन युष्मान् आयासयितुम् इच्छामः । किं तर्हि । त्वत्पादपङ्कजसमाश्रयसत्कृतेन मङ्गल्यताम् उपगता रजसा त्व् इयं नौः । दुर्गे महत्य् अपि च तोयनिधाव् अमुष्मिन् स्वस्ति व्रजेद् इति भवन्तम् उपागताः स्मः

vaṇija ūcuḥ / viditeyam asmākaṃ yuṣmaccharīrāvasthā / saty api ca vaḥ parākramasahatve naiva vayaṃ karmaviniyogena yuṣmān āyāsayitum icchāmaḥ / kiṃ tarhi / tvatpādapaṅkajasamāśrayasatkṛtena maṅgalyatām upagatā rajasā tv iyaṃ nauḥ / durge mahaty api ca toyanidhāv amuṣmin svasti vrajed iti bhavantam upāgatāḥ smaḥ

Sanskrit only: no published translation is held for this verse.

अथ स महात्मा तेषाम् अनुकम्पया जराशिथिलशरीरो ऽपि तद्वहनम् आरुरोह । तदधिरोहणाच् च प्रमुदितमनसः सर्व एव ते वणिजो बभूवुर् नियतम् अस्माकम् उत्तमा यात्रासिद्धिर् इति । क्रमेण चावजगाहिरे विविधमीनकुलविचरितम् अनिभृतजलकलकलारावम् अनिलविलासप्रविचलिततरङ्गं बहुविधरत्नैर् भूमिविशेषैर् अर्पितरङ्गं फेनावलीकुसुमदामविचित्रम् असुरवरभुजगवरभवनं दुरापपातालम् अप्रमेयतोयं महासमुद्रम् । अथेन्द्रनीलप्रकराभिनीलं सूर्यांशुतापाद् इव खं विलीनम् । समन्ततो ऽन्तर्हिततीरलेखम् अगाधम् अम्भोनिधिमध्यम् ईयुः

atha sa mahātmā teṣām anukampayā jarāśithilaśarīro 'pi tadvahanam āruroha / tadadhirohaṇāc ca pramuditamanasaḥ sarva eva te vaṇijo babhūvur niyatam asmākam uttamā yātrāsiddhir iti / krameṇa cāvajagāhire vividhamīnakulavicaritam anibhṛtajalakalakalārāvam anilavilāsapravicalitataraṅgaṃ bahuvidharatnair bhūmiviśeṣair arpitaraṅgaṃ phenāvalīkusumadāmavicitram asuravarabhujagavarabhavanaṃ durāpapātālam aprameyatoyaṃ mahāsamudram / athendranīlaprakarābhinīlaṃ sūryāṃśutāpād iva khaṃ vilīnam / samantato 'ntarhitatīralekham agādham ambhonidhimadhyam īyuḥ

Sanskrit only: no published translation is held for this verse.

तेषां तत्रानुप्राप्तानां सायाह्नसमये मृदूभूतकिरणचक्रप्रभावे सवितरि महद् औत्पातिकं परमभीषणं प्रादुरभूत् । विभिद्यमानोर्मिविकीर्णफेनश् चण्डानिलास्फालनभीमनादः । नैभृत्यनिर्मुक्तसमग्रतोयः क्षणेन रौद्रः समभूत् समुद्रः

teṣāṃ tatrānuprāptānāṃ sāyāhnasamaye mṛdūbhūtakiraṇacakraprabhāve savitari mahad autpātikaṃ paramabhīṣaṇaṃ prādurabhūt / vibhidyamānormivikīrṇaphenaś caṇḍānilāsphālanabhīmanādaḥ / naibhṛtyanirmuktasamagratoyaḥ kṣaṇena raudraḥ samabhūt samudraḥ

Sanskrit only: no published translation is held for this verse.

उत्पातवाताकलितैर् महद्भिस् तोयस्थलैर् भीमरयैर् भ्रमद्भिः । युगान्तकालप्रचलाचलेव भूमिर् बभूवोग्रवपुः समुद्रः

utpātavātākalitair mahadbhis toyasthalair bhīmarayair bhramadbhiḥ / yugāntakālapracalācaleva bhūmir babhūvogravapuḥ samudraḥ

Sanskrit only: no published translation is held for this verse.

विद्युल्लतोद्भासुरलोलजिह्वा नीला भुजंगा इव नैकशीर्षाः । आवव्रुर् आदित्यपथं पयोदाः प्रसक्तभीमस्तनितानुनादाः

vidyullatodbhāsuralolajihvā nīlā bhujaṃgā iva naikaśīrṣāḥ / āvavrur ādityapathaṃ payodāḥ prasaktabhīmastanitānunādāḥ

Sanskrit only: no published translation is held for this verse.

घनैर् घनैर् आवृतरश्मिजालः सूर्यः क्रमेणास्तम् उपारुरोह । दिनान्तलब्धप्रसरं समन्तात् तमो घनीभावम् इवाजगाम

ghanair ghanair āvṛtaraśmijālaḥ sūryaḥ krameṇāstam upāruroha / dināntalabdhaprasaraṃ samantāt tamo ghanībhāvam ivājagāma

Sanskrit only: no published translation is held for this verse.

धाराशरैर् आच्छुरितोर्मिचक्रे महोदधाव् उत्पततीव रोषात् । भीतेव नौर् अभ्यधिकं चकम्पे विषादयन्ती हृदयानि तेषाम्

dhārāśarair ācchuritormicakre mahodadhāv utpatatīva roṣāt / bhīteva naur abhyadhikaṃ cakampe viṣādayantī hṛdayāni teṣām

Sanskrit only: no published translation is held for this verse.

ते त्रासदीनाश् च विषादमूका धीराः प्रतीकारससंभ्रमाश् च । स्वदेवतायाचनतत्पराश् च भावान् यथासत्त्वगुणं विवव्रुः

te trāsadīnāś ca viṣādamūkā dhīrāḥ pratīkārasasaṃbhramāś ca / svadevatāyācanatatparāś ca bhāvān yathāsattvaguṇaṃ vivavruḥ

Sanskrit only: no published translation is held for this verse.

अथ ते सांयात्रिकाः पवनसलिलवेगवशगया नावा परिभ्राम्यमाणा बहुभिर् अप्य् अहोभिर् नैव कुतश् चित् तीरं ददृशुर् न च यथेप्सितानि समुद्रचिह्नानि । अपूर्वैर् एव तु समुद्रचिह्नैर् अभिवर्धमानवैमनस्या भयविषादव्याकुलताम् उपजग्मुः ॥ अथैनान् सुपारगो बोधिसत्त्वो व्यवस्थापयन्न् उवाच । अनाश्चर्यः खलु समुद्रम् अवगाढानाम् औत्पातिकक्षोभपरिक्लेशः । तद् अलम् अत्रभवतां विषादानुवृत्त्या । नापत्प्रतीकारविधिर् विषादस् तस्माद् अलं दैन्यपरिग्रहेण । धैर्यात् तु कार्यप्रतिपत्तिदक्षाः कृच्छ्राण्य् अकृच्छ्रेण समुत्तरन्ति

atha te sāṃyātrikāḥ pavanasalilavegavaśagayā nāvā paribhrāmyamāṇā bahubhir apy ahobhir naiva kutaś cit tīraṃ dadṛśur na ca yathepsitāni samudracihnāni / apūrvair eva tu samudracihnair abhivardhamānavaimanasyā bhayaviṣādavyākulatām upajagmuḥ // athainān supārago bodhisattvo vyavasthāpayann uvāca / anāścaryaḥ khalu samudram avagāḍhānām autpātikakṣobhaparikleśaḥ / tad alam atrabhavatāṃ viṣādānuvṛttyā / nāpatpratīkāravidhir viṣādas tasmād alaṃ dainyaparigraheṇa / dhairyāt tu kāryapratipattidakṣāḥ kṛcchrāṇy akṛcchreṇa samuttaranti

Sanskrit only: no published translation is held for this verse.

विषाददैन्यं व्यवधूय तस्मात् कार्यावकाशं क्रियया भजध्वम् । प्राज्ञस्य धैर्यज्वलितं हि तेजः सर्वार्थसिद्धिग्रहणाग्रहस्तः

viṣādadainyaṃ vyavadhūya tasmāt kāryāvakāśaṃ kriyayā bhajadhvam / prājñasya dhairyajvalitaṃ hi tejaḥ sarvārthasiddhigrahaṇāgrahastaḥ

Sanskrit only: no published translation is held for this verse.

इति ते सांयात्रिकास् तेन महात्मना धीरीकृतमनसः कूलसंदर्शनोत्सुकमतयः समुद्रम् अवलोकयन्तो ददृशुः पुरुषविग्रहान् आमुक्तरूप्यकवचान् इवोन्मज्जतो निमज्जतश् च । सम्यक् चैषाम् आकृतिनिमित्तम् अवधार्य सविस्मयाः सुपारगाय न्यवेदयन्त । अपूर्वं खल्व् इदम् इह समुद्रे चिह्नम् उपलभ्यते । एते खलु आमुक्तरूप्यकवचा इव दैत्ययोधा घोरेक्षणाः क्षुरनिकाशविरूपघोणाः । उन्मज्जनावतरणस्फुरणप्रसङ्गात् कृईडाम् इवार्णवजले ऽनुभवन्ति के ऽपि

iti te sāṃyātrikās tena mahātmanā dhīrīkṛtamanasaḥ kūlasaṃdarśanotsukamatayaḥ samudram avalokayanto dadṛśuḥ puruṣavigrahān āmuktarūpyakavacān ivonmajjato nimajjataś ca / samyak caiṣām ākṛtinimittam avadhārya savismayāḥ supāragāya nyavedayanta / apūrvaṃ khalv idam iha samudre cihnam upalabhyate / ete khalu āmuktarūpyakavacā iva daityayodhā ghorekṣaṇāḥ kṣuranikāśavirūpaghoṇāḥ / unmajjanāvataraṇasphuraṇaprasaṅgāt kṛīḍām ivārṇavajale 'nubhavanti ke 'pi

Sanskrit only: no published translation is held for this verse.

सुपारग उवाच । नैते मानुषा अमानुषा वा । मीनाः खल्व् एते यतो न भेतव्यम् एभ्यः । किं तु । सुदूरम् अपकृष्टाः स्मः पत्तनद्वितयाद् अपि । क्षुरमाली समुद्रो ऽयं तद् यतध्वं निवर्तितुम्

supāraga uvāca / naite mānuṣā amānuṣā vā / mīnāḥ khalv ete yato na bhetavyam ebhyaḥ / kiṃ tu / sudūram apakṛṣṭāḥ smaḥ pattanadvitayād api / kṣuramālī samudro 'yaṃ tad yatadhvaṃ nivartitum

Sanskrit only: no published translation is held for this verse.

चण्डवेगवाहिना तु सलिलनिवहेनैकान्तहरेण च पाश्चात्येन वायुना समाक्षिप्तया नावा न ते सांयात्रिकाः शेकुर् विनिवर्तितुम् ॥ अथावगाहमानाः क्रमेण रूप्यप्रभावभासितसितसलिलं फेननिचयपाण्डरम् अपरं समुद्रम् आलोक्य सविस्मयाः सुपारगम् ऊचुः । स्वफेनमग्नैर् इव को ऽयम् अम्बुभिर् महार्णवः शुक्लदुकूलवान् इव । द्रवान् इवेन्दोः किरणान् समुद्वहन् समन्ततो हास इव प्रसर्पति

caṇḍavegavāhinā tu salilanivahenaikāntahareṇa ca pāścātyena vāyunā samākṣiptayā nāvā na te sāṃyātrikāḥ śekur vinivartitum // athāvagāhamānāḥ krameṇa rūpyaprabhāvabhāsitasitasalilaṃ phenanicayapāṇḍaram aparaṃ samudram ālokya savismayāḥ supāragam ūcuḥ / svaphenamagnair iva ko 'yam ambubhir mahārṇavaḥ śukladukūlavān iva / dravān ivendoḥ kiraṇān samudvahan samantato hāsa iva prasarpati

Sanskrit only: no published translation is held for this verse.

सुपारग उवाच । कष्टम् । अतिदूरं खल्व् अवगाह्यते । क्षीरार्णव इति ख्यात उदधिर् दधिमाल्य् असौ । क्षमं नातः परं गन्तुं शक्यते चेन् निवर्तितुम्

supāraga uvāca / kaṣṭam / atidūraṃ khalv avagāhyate / kṣīrārṇava iti khyāta udadhir dadhimāly asau / kṣamaṃ nātaḥ paraṃ gantuṃ śakyate cen nivartitum

Sanskrit only: no published translation is held for this verse.

वणिज ऊचुः । न खलु शक्यते विलम्बयितुम् अपि वहनं कुत एव निवर्तयितुम् अतिशीघ्रवाहित्वाद् वहनस्य प्रतिकूलत्वाच् च मारुतस्येति ॥ अथ व्यतीत्य तम् अपि समुद्रं सुवर्णप्रभानुरञ्जितप्रचलोर्मिमालम् अग्निज्वालाकपिलसलिलम् अपरं समुद्रम् आलोक्य सविस्मयकौतूहलास् ते वणिजः सुपारगं पप्रच्छुः । बालार्कलक्ष्म्येव कृताङ्गरागैः समुन्नमद्भिः सलिलैर् अनीलैः । ज्वलन् महान् अग्निर् इवावभाति को नाम कस्माच् च महार्णवो ऽयम्

vaṇija ūcuḥ / na khalu śakyate vilambayitum api vahanaṃ kuta eva nivartayitum atiśīghravāhitvād vahanasya pratikūlatvāc ca mārutasyeti // atha vyatītya tam api samudraṃ suvarṇaprabhānurañjitapracalormimālam agnijvālākapilasalilam aparaṃ samudram ālokya savismayakautūhalās te vaṇijaḥ supāragaṃ papracchuḥ / bālārkalakṣmyeva kṛtāṅgarāgaiḥ samunnamadbhiḥ salilair anīlaiḥ / jvalan mahān agnir ivāvabhāti ko nāma kasmāc ca mahārṇavo 'yam

Sanskrit only: no published translation is held for this verse.

सुपारग उवाच । अग्निमालीति विख्यातः समुद्रो ऽयं प्रकाशते । अतीव खलु साधु स्यान् निवर्तेमहि यद्य् अतः

supāraga uvāca / agnimālīti vikhyātaḥ samudro 'yaṃ prakāśate / atīva khalu sādhu syān nivartemahi yady ataḥ

Sanskrit only: no published translation is held for this verse.

इति स महात्मा नाममात्रम् अकथयत् तस्य सरित्पतेर् न तोयवैवर्ण्यकारणं दीर्घदर्शित्वात् ॥ अथ ते सांयात्रिकास् तम् अपि समुद्रम् अतीत्य पुष्परागेन्द्रनीलप्रभोद्द्योतितसलिलं परिपक्वकुशपर्णनिकाशवर्णम् अपरं समुद्रम् आलोक्य कौतूहलजाताः सुपारगं पप्रच्छुः । परिणतकुशपर्णवर्णतोयः सलिलनिधिः कतमो न्व् अयं विभाति । सकुसुम इव फेनभक्तिचित्रैर् अनिलजवाकलितैस् तरङ्गभङ्गैः

iti sa mahātmā nāmamātram akathayat tasya saritpater na toyavaivarṇyakāraṇaṃ dīrghadarśitvāt // atha te sāṃyātrikās tam api samudram atītya puṣparāgendranīlaprabhoddyotitasalilaṃ paripakvakuśaparṇanikāśavarṇam aparaṃ samudram ālokya kautūhalajātāḥ supāragaṃ papracchuḥ / pariṇatakuśaparṇavarṇatoyaḥ salilanidhiḥ katamo nv ayaṃ vibhāti / sakusuma iva phenabhakticitrair anilajavākalitais taraṅgabhaṅgaiḥ

Sanskrit only: no published translation is held for this verse.

सुपारग उवाच । भोः सार्थवाहा निवर्तनं प्रति यत्नः क्रियताम् । न खल्व् अतः परं क्षमते गन्तुम् । कुशमाली समुद्रो ऽयम् अत्यङ्कुश इव द्विपः । प्रसह्यासह्यसलिलो हरन् हरति नो रतिम्

supāraga uvāca / bhoḥ sārthavāhā nivartanaṃ prati yatnaḥ kriyatām / na khalv ataḥ paraṃ kṣamate gantum / kuśamālī samudro 'yam atyaṅkuśa iva dvipaḥ / prasahyāsahyasalilo haran harati no ratim

Sanskrit only: no published translation is held for this verse.

अथ ते वाणिजकाः परेणापि यत्नेन वहनं निवर्तयितुम् अशक्नुवन्तस् तम् अपि समुद्रम् अतीत्य वंशरागवैडूर्यप्रभाव्यतिकरहरितसलिलम् अपरं समुद्रम् आलोक्य सुपारगम् अपृच्छन् । मरकतहरितप्रभैर् जलैर् वहति नवाम् इव शाद्वलश्रियम् । कुमुदरुचिरफेनभूषणः सलिलनिधिः कतमो ऽयम् ईक्ष्यते

atha te vāṇijakāḥ pareṇāpi yatnena vahanaṃ nivartayitum aśaknuvantas tam api samudram atītya vaṃśarāgavaiḍūryaprabhāvyatikaraharitasalilam aparaṃ samudram ālokya supāragam apṛcchan / marakataharitaprabhair jalair vahati navām iva śādvalaśriyam / kumudaruciraphenabhūṣaṇaḥ salilanidhiḥ katamo 'yam īkṣyate

Sanskrit only: no published translation is held for this verse.

अथ स महात्मा तेन तस्य वणिग्जनस्य व्यसनोपनिपातेन परिदह्यमानहृदयो दीर्घम् उष्णम् अभिनिश्वस्य शनकैर् उवाच । अतिदूरम् उपेताः स्मः दुःखम् अस्मान् निवर्तितुम् । पर्यन्त इव लोकस्य नलमाल्य् एष सागरः

atha sa mahātmā tena tasya vaṇigjanasya vyasanopanipātena paridahyamānahṛdayo dīrgham uṣṇam abhiniśvasya śanakair uvāca / atidūram upetāḥ smaḥ duḥkham asmān nivartitum / paryanta iva lokasya nalamāly eṣa sāgaraḥ

Sanskrit only: no published translation is held for this verse.

तच् छ्रुत्वा ते वाणिजका विषादोपरुध्यमानमनसो विस्रस्यमानगात्रोत्साहा निश्वसितमात्रपरायणास् तत्रैव निषेदुः । व्यतीत्य तम् अपि समुद्रं सायाह्नसमये विलम्बमानमन्दरश्मिमण्डले सलिलनिधिम् इव प्रवेष्टुकामे दिवसकरे समुद्वर्तमानस्येव सलिलनिधेर् अशनीनाम् इव च संपततां वेणुवनानाम् इव चाग्निपरिगतानां विस्फुटतां तुमुलम् अतिभीषणं श्रुतिहृदयविदारणं समुद्रध्वनिम् अश्रौषुः । श्रुत्वा च संत्रासवशगाः स्फुरन्मनसः सहसैवोत्थाय समन्ततो ऽनुविलोकयन्तो ददृशुः प्रपात इव श्वभ्र इव च महान्तं तम् उदकौघं निपतन्तम् दृष्ट्वा च परमभयविह्वलाः सुपारगम् उपेत्योचुः । निर्भिन्दन्न् इव नः श्रुतीः प्रतिभयश् चेतांसि मथ्नन्न् इव क्रुद्धस्येव सरित्पतेर् ध्वनिर् अयं दूराद् अपि श्रूयते । भीमे श्वभ्र इवाग्रतश् च निपतत्य् एतत् समग्रं जलं तत् को ऽसाव् उदधिः किम् अत्र च परं कृत्यं भवान् मन्यते

tac chrutvā te vāṇijakā viṣādoparudhyamānamanaso visrasyamānagātrotsāhā niśvasitamātraparāyaṇās tatraiva niṣeduḥ / vyatītya tam api samudraṃ sāyāhnasamaye vilambamānamandaraśmimaṇḍale salilanidhim iva praveṣṭukāme divasakare samudvartamānasyeva salilanidher aśanīnām iva ca saṃpatatāṃ veṇuvanānām iva cāgniparigatānāṃ visphuṭatāṃ tumulam atibhīṣaṇaṃ śrutihṛdayavidāraṇaṃ samudradhvanim aśrauṣuḥ / śrutvā ca saṃtrāsavaśagāḥ sphuranmanasaḥ sahasaivotthāya samantato 'nuvilokayanto dadṛśuḥ prapāta iva śvabhra iva ca mahāntaṃ tam udakaughaṃ nipatantam dṛṣṭvā ca paramabhayavihvalāḥ supāragam upetyocuḥ / nirbhindann iva naḥ śrutīḥ pratibhayaś cetāṃsi mathnann iva kruddhasyeva saritpater dhvanir ayaṃ dūrād api śrūyate / bhīme śvabhra ivāgrataś ca nipataty etat samagraṃ jalaṃ tat ko 'sāv udadhiḥ kim atra ca paraṃ kṛtyaṃ bhavān manyate

Sanskrit only: no published translation is held for this verse.

अथ स महात्मा ससंभ्रमः कष्टं कष्टम् इत्य् उक्त्वा समुद्रम् आलोकयन्न् उवाच । यत् प्राप्य न निवर्तन्ते मृत्योर् मुखम् इवामुखम् । अशिवं समुपेताः स्मस् तद् एतद् वडबामुखम्

atha sa mahātmā sasaṃbhramaḥ kaṣṭaṃ kaṣṭam ity uktvā samudram ālokayann uvāca / yat prāpya na nivartante mṛtyor mukham ivāmukham / aśivaṃ samupetāḥ smas tad etad vaḍabāmukham

Sanskrit only: no published translation is held for this verse.

तद् उपश्रुत्य ते वाणिजका वडबामुखम् उपेता वयम् इति त्यक्तजीविताशा मरणभयविक्लवीभूतमनसः सस्वरं रुरुदुः के चिद् विलेपुर् अथ चुक्रुशुः । न किं चित् प्रत्यपद्यन्त के चित् त्रासविचेतसः

tad upaśrutya te vāṇijakā vaḍabāmukham upetā vayam iti tyaktajīvitāśā maraṇabhayaviklavībhūtamanasaḥ sasvaraṃ ruruduḥ ke cid vilepur atha cukruśuḥ / na kiṃ cit pratyapadyanta ke cit trāsavicetasaḥ

Sanskrit only: no published translation is held for this verse.

विशेषतः के चिद् अभिप्रणेमुर् देवेन्द्रम् आर्तिप्रहितैर् मनोभिः । आदित्यरुद्राश्विमरुद्वसूंश् च प्रपेदिरे सागरम् एव चान्ये

viśeṣataḥ ke cid abhipraṇemur devendram ārtiprahitair manobhiḥ / ādityarudrāśvimarudvasūṃś ca prapedire sāgaram eva cānye

Sanskrit only: no published translation is held for this verse.

जेपुश् च मन्त्रान् अपरे विचित्रान् अन्ये तु देवीं विधिवत् प्रणेमुः । सुपारगं के चिद् उपेत्य तत् तद् विचेष्टमानाः करुणं विलेपुः

jepuś ca mantrān apare vicitrān anye tu devīṃ vidhivat praṇemuḥ / supāragaṃ ke cid upetya tat tad viceṣṭamānāḥ karuṇaṃ vilepuḥ

Sanskrit only: no published translation is held for this verse.

आपद्गतत्रासहरस्य नित्यं परानुकम्पागुणसंभृतस्य । अयं प्रभावातिशयस्य तस्य तवाभ्युपेतो विनियोगकालः

āpadgatatrāsaharasya nityaṃ parānukampāguṇasaṃbhṛtasya / ayaṃ prabhāvātiśayasya tasya tavābhyupeto viniyogakālaḥ

Sanskrit only: no published translation is held for this verse.

आर्तान् अनाथाञ् छरणागतान् नस् त्वं त्रातुम् आवर्जय धीर चेतः । अयं हि कोपाद् वडबामुखेन चिकीर्षति ग्रासम् इवार्णवो ऽस्मान्

ārtān anāthāñ charaṇāgatān nas tvaṃ trātum āvarjaya dhīra cetaḥ / ayaṃ hi kopād vaḍabāmukhena cikīrṣati grāsam ivārṇavo 'smān

Sanskrit only: no published translation is held for this verse.

नोपेक्षितुं युक्तम् अयं जनस् ते विपद्यमानः सलिलौघमध्ये । नाज्ञां तवात्येति महासमुद्रस् तद् वार्यताम् अप्रशमो ऽयम् अस्य

nopekṣituṃ yuktam ayaṃ janas te vipadyamānaḥ salilaughamadhye / nājñāṃ tavātyeti mahāsamudras tad vāryatām apraśamo 'yam asya

Sanskrit only: no published translation is held for this verse.

अथ स महात्मा महत्या करुणया समापीड्यमानहृदयस् तान् वाणिजकान् व्यवस्थापयन्न् उवाच । अस्त्य् अत्रापि नः कश् चित् प्रतीकारविधिः प्रतिभाति । तं तावत् प्रयोक्ष्ये यतो मुहूर्तं धीरास् तावद् भवन्तु भवन्त इति ॥ अथ ते वाणिजका अस्त्य् अत्रापि प्रतीकार इत्य् आशया समुपस्तम्भितधैर्यास् तदवहितमनसस् तूष्णींबभूवुः ॥ अथ सुपारगो बोधिसत्त्व एकांसम् उत्तरासङ्गं कृत्वा दक्षिणेन जानुमण्डलेनाधिष्ठाय नावं समावर्जितसर्वभावः प्रणम्य तथागतेभ्यस् तान् सांयात्रिकान् आमन्त्रयते स्म । शृण्वन्त्व् अत्रभवन्तः सांयात्रिकाः सलिलनिधिव्योमाश्रयाश् च देवताविशेषाः । स्मरामि यत आत्मानं यतः प्राप्तो ऽस्मि विज्ञताम् । नाभिजानामि संचिन्त्य प्राणिनं हिंसितुं क्व चित्

atha sa mahātmā mahatyā karuṇayā samāpīḍyamānahṛdayas tān vāṇijakān vyavasthāpayann uvāca / asty atrāpi naḥ kaś cit pratīkāravidhiḥ pratibhāti / taṃ tāvat prayokṣye yato muhūrtaṃ dhīrās tāvad bhavantu bhavanta iti // atha te vāṇijakā asty atrāpi pratīkāra ity āśayā samupastambhitadhairyās tadavahitamanasas tūṣṇīṃbabhūvuḥ // atha supārago bodhisattva ekāṃsam uttarāsaṅgaṃ kṛtvā dakṣiṇena jānumaṇḍalenādhiṣṭhāya nāvaṃ samāvarjitasarvabhāvaḥ praṇamya tathāgatebhyas tān sāṃyātrikān āmantrayate sma / śṛṇvantv atrabhavantaḥ sāṃyātrikāḥ salilanidhivyomāśrayāś ca devatāviśeṣāḥ / smarāmi yata ātmānaṃ yataḥ prāpto 'smi vijñatām / nābhijānāmi saṃcintya prāṇinaṃ hiṃsituṃ kva cit

Sanskrit only: no published translation is held for this verse.

अनेन सत्यवाक्येन मम पुण्यबलेन च । वडबामुखम् अप्राप्य स्वस्ति नौर् विनिवर्तताम्

anena satyavākyena mama puṇyabalena ca / vaḍabāmukham aprāpya svasti naur vinivartatām

Sanskrit only: no published translation is held for this verse.

अथ तस्य महात्मनः सत्याधिष्ठानप्रभावात् पुण्यतेजसा च सह सलिलजवेन स मारुतो व्यावर्तमानस् तां नावं विनिवर्तयाम् आस । निवृत्तां तु तां नावम् अभिसमीक्ष्य ते वाणिजकाः परमविस्मयप्रहर्षोद्धतमानसा निवृत्ता निवृत्ता नौर् इति प्रणामसभाजनपुरःसरं सुपारगाय न्यवेदयन्त ॥ अथ स महात्मा तान् वाणिजकान् उवाच । स्थिरीभवन्तु भवन्तः । शीघ्रम् आरोप्यन्तां शीतानि । इति च तेन समादिष्टाः प्रमोदाद् उद्भूतबलोत्साहास् ते तदधिकृतास् तथा चक्रुः । अथ मुदितजनप्रहासनादा प्रविततपाण्डरशीतचारुपक्षा । सलिलनिधिगता रराज सा नौर् गतजलदे नभसीव राजहंसी

atha tasya mahātmanaḥ satyādhiṣṭhānaprabhāvāt puṇyatejasā ca saha salilajavena sa māruto vyāvartamānas tāṃ nāvaṃ vinivartayām āsa / nivṛttāṃ tu tāṃ nāvam abhisamīkṣya te vāṇijakāḥ paramavismayapraharṣoddhatamānasā nivṛttā nivṛttā naur iti praṇāmasabhājanapuraḥsaraṃ supāragāya nyavedayanta // atha sa mahātmā tān vāṇijakān uvāca / sthirībhavantu bhavantaḥ / śīghram āropyantāṃ śītāni / iti ca tena samādiṣṭāḥ pramodād udbhūtabalotsāhās te tadadhikṛtās tathā cakruḥ / atha muditajanaprahāsanādā pravitatapāṇḍaraśītacārupakṣā / salilanidhigatā rarāja sā naur gatajalade nabhasīva rājahaṃsī

Sanskrit only: no published translation is held for this verse.

निवृत्तायां तु तस्याम् अनुकूलसलिलमारुतायां विमानलीलया स्वेच्छयैवाभिप्रयातायां नावि नातिश्यामीभूतसंध्याङ्गरागासु प्रवितन्यमानतमोवितानास्व् आलक्ष्यनक्षत्रभूषणासु दिक्षु किं चिद् अवशेषप्रभे दिवसकरमार्गे प्रवृत्ते क्षणदाधिकारे सुपारगस् तान् वाणिजकान् उवाच । भोः सार्थवाहा नलमालिप्रभृतिभ्यो यथादृष्टेभ्यः समुद्रेभ्यो वालिकापाषाणा वहनम् आरोप्यन्तां यावत् सहते । एवम् इदं यानपात्रं निर्घातभराक्रान्तं न च पार्श्वानि दास्यति । मङ्गलसंमताश् चैते वालिकापाषाणा नियतं लाभसिद्धये वो भविष्यन्तीति ॥ ते सुपारगप्रेमबहुमानावर्जितमतिभिर् देवताभिर् अनुप्रदर्शितेभ्यः स्थलेभ्य आदाय वालिकापाषाणबुद्ध्या वैडूर्यादीनि रत्नानि वहनम् आरोपयाम् आसुः ॥ तेनैव चैकरात्रेण सा नौर् भरुकच्छम् उपजगाम ॥ अथ प्रभाते रजतेन्द्रनीलवैडूर्यहेमप्रतिपूर्णनौकाः । स्वदेशतीरान्तम् उपागतास् ते प्रीत्या तम् आनर्चुर् उदीर्णहर्षाः

nivṛttāyāṃ tu tasyām anukūlasalilamārutāyāṃ vimānalīlayā svecchayaivābhiprayātāyāṃ nāvi nātiśyāmībhūtasaṃdhyāṅgarāgāsu pravitanyamānatamovitānāsv ālakṣyanakṣatrabhūṣaṇāsu dikṣu kiṃ cid avaśeṣaprabhe divasakaramārge pravṛtte kṣaṇadādhikāre supāragas tān vāṇijakān uvāca / bhoḥ sārthavāhā nalamāliprabhṛtibhyo yathādṛṣṭebhyaḥ samudrebhyo vālikāpāṣāṇā vahanam āropyantāṃ yāvat sahate / evam idaṃ yānapātraṃ nirghātabharākrāntaṃ na ca pārśvāni dāsyati / maṅgalasaṃmatāś caite vālikāpāṣāṇā niyataṃ lābhasiddhaye vo bhaviṣyantīti // te supāragapremabahumānāvarjitamatibhir devatābhir anupradarśitebhyaḥ sthalebhya ādāya vālikāpāṣāṇabuddhyā vaiḍūryādīni ratnāni vahanam āropayām āsuḥ // tenaiva caikarātreṇa sā naur bharukaccham upajagāma // atha prabhāte rajatendranīlavaiḍūryahemapratipūrṇanaukāḥ / svadeśatīrāntam upāgatās te prītyā tam ānarcur udīrṇaharṣāḥ

Sanskrit only: no published translation is held for this verse.