Vājasaneyi Saṃhitā (Śukla Yajurveda, as given on Wikisource) 12

दृशानो रुक्म ऽ उर्व्या व्यद्यौद् दुर्मर्षम् आयुः श्रिये रुचानः । अग्निर् अमृतो ऽ अभवद् वयोभिर् यद् एनं द्यौर् जनयत् सुरेताः ॥

dṛśāno rukma ' urvyā vyadyaud durmarṣam āyuḥ śriye rucānaḥ | agnir amṛto ' abhavad vayobhir yad enaṃ dyaur janayat suretāḥ ||

नक्तोषासा समनसा विरूपे धापयेते शिशुम् एकꣳ समीची । द्यावाक्षामा रुक्मो ऽ अन्तर् वि भाति देवा ऽ अग्निं धारयन् द्रविणोदाः ॥

naktoṣāsā samanasā virūpe dhāpayete śiśum ekam̐ samīcī | dyāvākṣāmā rukmo ' antar vi bhāti devā ' agniṃ dhārayan draviṇodāḥ ||

Sanskrit only: no published translation is held for this verse.

विश्वा रूपाणि प्रति मुञ्चते कविः प्रासावीद् भद्रं द्विपदे चतुष्पदे । वि नाकम् अख्यत् सविता वरेण्योऽनु प्रयाणम् उषसो वि राजति ॥

viśvā rūpāṇi prati muñcate kaviḥ prāsāvīd bhadraṃ dvipade catuṣpade | vi nākam akhyat savitā vareṇyo'nu prayāṇam uṣaso vi rājati ||

सुपर्णोऽसि गरुत्माꣳस् त्रिवृत् ते शिरो गायत्रं चक्षुर् बृहद्रथन्तरे पक्षौ । स्तोम ऽ आत्मा छन्दाꣳस्य् अङ्गानि यजूꣳषि नाम । साम ते तनूर् वामदेव्यं यज्ञायज्ञियं पुच्छं धिष्ण्याः शफाः । सुपर्णो ऽसि गरुत्मान् दिवं गच्छ स्वः पत ॥

suparṇo'si garutmām̐s trivṛt te śiro gāyatraṃ cakṣur bṛhadrathantare pakṣau | stoma ' ātmā chandām̐sy aṅgāni yajūm̐ṣi nāma | sāma te tanūr vāmadevyaṃ yajñāyajñiyaṃ pucchaṃ dhiṣṇyāḥ śaphāḥ | suparṇo 'si garutmān divaṃ gaccha svaḥ pata ||

Sanskrit only: no published translation is held for this verse.

विष्णोः क्रमोऽसि सपत्नहा गायत्रं छन्द ऽ आ रोह पृथिवीम् अनु वि क्रमस्व । विष्णोः क्रमोऽस्य् अभिमातिहा त्रैष्टुभं छन्द ऽ आ रोहान्तरिक्षम् अनु वि क्रमस्व । विष्णोः क्रमोऽस्य् अरातीयतो हन्ता जागतं छन्द ऽ आ रोह दिवम् अनु वि क्रमस्व । विष्णोः क्रमोऽसि शत्रूयतो हन्ताऽऽनुष्टुभं छन्द ऽ आ रोह दिशोऽनु वि क्रमस्व ॥

viṣṇoḥ kramo'si sapatnahā gāyatraṃ chanda ' ā roha pṛthivīm anu vi kramasva | viṣṇoḥ kramo'sy abhimātihā traiṣṭubhaṃ chanda ' ā rohāntarikṣam anu vi kramasva | viṣṇoḥ kramo'sy arātīyato hantā jāgataṃ chanda ' ā roha divam anu vi kramasva | viṣṇoḥ kramo'si śatrūyato hantā''nuṣṭubhaṃ chanda ' ā roha diśo'nu vi kramasva ||

Sanskrit only: no published translation is held for this verse.

अक्रन्दद् अग्नि स्तनयन्न् इव द्यौः क्षामा रेरिहद् वीरुधः समञ्जन् । सद्यो जज्ञानो वि हीम् इद्धोऽ अख्यद् आ रोदसी भानुना भात्य् अन्तः ॥

akrandad agni stanayann iva dyauḥ kṣāmā rerihad vīrudhaḥ samañjan | sadyo jajñāno vi hīm iddho' akhyad ā rodasī bhānunā bhāty antaḥ ||

अग्नेऽभ्यावर्तिन्न् अभि मा नि वर्तस्वायुषा वर्चसा प्रजया धनेन । सन्या मेधया रय्या पोषेण ॥

agne'bhyāvartinn abhi mā ni vartasvāyuṣā varcasā prajayā dhanena | sanyā medhayā rayyā poṣeṇa ||

Sanskrit only: no published translation is held for this verse.

अग्ने ऽ अङ्गिरः शतं ते सन्त्वावृतः सहस्रं त ऽ उपावृतः । अधा पोषस्य पोषेण पुनर् नो नष्टम् आ कृधि पुनर् नो रयिम् आ कृधि ॥

agne ' aṅgiraḥ śataṃ te santvāvṛtaḥ sahasraṃ ta ' upāvṛtaḥ | adhā poṣasya poṣeṇa punar no naṣṭam ā kṛdhi punar no rayim ā kṛdhi ||

Sanskrit only: no published translation is held for this verse.

पुनर् ऊर्जा नि वर्तस्व पुनर् अग्न ऽ इषायुषा । पुनर् नः पाह्य् अꣳहसः ॥

punar ūrjā ni vartasva punar agna ' iṣāyuṣā | punar naḥ pāhy am̐hasaḥ ||

Sanskrit only: no published translation is held for this verse.

सह रय्या नि वर्तस्वाग्ने पिन्वस्व धारया । विश्वप्स्न्या विश्वतस् परि ॥

saha rayyā ni vartasvāgne pinvasva dhārayā | viśvapsnyā viśvatas pari ||

Sanskrit only: no published translation is held for this verse.

आ त्वाहार्षम् अन्तर् अभूर् ध्रुवस् तिष्ठाविचाचलिः । विशस् त्वा सर्वा वाञ्छन्तु मा त्वद् राष्ट्रम् अधि भ्रशत् ॥

ā tvāhārṣam antar abhūr dhruvas tiṣṭhāvicācaliḥ | viśas tvā sarvā vāñchantu mā tvad rāṣṭram adhi bhraśat ||

उद् उत्तमं वरुण पाशम् अस्मद् अवाधमं वि मध्यमꣳ श्रथाय । अथा वयम् आदित्य व्रते तवानागसो ऽ अदितये स्याम ॥

ud uttamaṃ varuṇa pāśam asmad avādhamaṃ vi madhyamam̐ śrathāya | athā vayam āditya vrate tavānāgaso ' aditaye syāma ||

अग्रे बृहन्न् उषसामूर्ध्वो ऽ अस्थान् निर्जगन्वान् तमसो ज्योतिषागात् । अग्निर् भानुना रुशता स्वङ्ग ऽ आ जातो विश्वा सद्मान्य् अप्राः ॥

agre bṛhann uṣasāmūrdhvo ' asthān nirjaganvān tamaso jyotiṣāgāt | agnir bhānunā ruśatā svaṅga ' ā jāto viśvā sadmāny aprāḥ ||

हꣳसः शुचिषद् वसुर् अन्तरिक्षसद् होता वेदिषद् अतिथिर् दुरोणसत् । नृषद् वरसद् ऋतसद् व्योमसद् अब्जा गोजा ऽ ऋतजा अद्रिजा ऽ ऋतम् बृहत् ॥

ham̐saḥ śuciṣad vasur antarikṣasad hotā vediṣad atithir duroṇasat | nṛṣad varasad ṛtasad vyomasad abjā gojā ' ṛtajā adrijā ' ṛtam bṛhat ||

सीद त्वं मातुर् अस्या ऽ उपस्थे विश्वान्य् अग्ने वयुनानि विद्वान् । मैनां तपसा मार्चिषाऽभिशोचीर् अन्तर् अस्याꣳ शुक्रज्योतिर् वि भाहि ॥

sīda tvaṃ mātur asyā ' upasthe viśvāny agne vayunāni vidvān | maināṃ tapasā mārciṣā'bhiśocīr antar asyām̐ śukrajyotir vi bhāhi ||

Sanskrit only: no published translation is held for this verse.

अन्तर् अग्ने रुचा त्वम् उखायाः सदने स्वे । तस्यास् त्वꣳ हरसा तपन् जातवेदः शिवो भव ॥

antar agne rucā tvam ukhāyāḥ sadane sve | tasyās tvam̐ harasā tapan jātavedaḥ śivo bhava ||

Sanskrit only: no published translation is held for this verse.

शिवो भूत्वा मह्यम् अग्नेऽ अथो सीद शिवस् त्वम् । शिवः कृत्वा दिशः सर्वाः स्वं योनिम् इहासदः ॥

śivo bhūtvā mahyam agne' atho sīda śivas tvam | śivaḥ kṛtvā diśaḥ sarvāḥ svaṃ yonim ihāsadaḥ ||

Sanskrit only: no published translation is held for this verse.

दिवस् परि प्रथमं जज्ञे ऽ अग्निर् अस्माद् द्वितीयं परि जातवेदाः । तृतीयम् अप्सु नृमणा ऽ अजस्रम् इन्धान ऽ एनं जरते स्वाधीः ॥

divas pari prathamaṃ jajñe ' agnir asmād dvitīyaṃ pari jātavedāḥ | tṛtīyam apsu nṛmaṇā ' ajasram indhāna ' enaṃ jarate svādhīḥ ||

विद्मा ते ऽ अग्ने त्रेधा त्रयाणि विद्मा ते धाम विभृता पुरुत्रा । विद्मा ते नाम परमं गुहा यद् विद्मा तम् उत्सं यत ऽ आजगन्थ ॥

vidmā te ' agne tredhā trayāṇi vidmā te dhāma vibhṛtā purutrā | vidmā te nāma paramaṃ guhā yad vidmā tam utsaṃ yata ' ājagantha ||

समुद्रे त्वा नृमणा ऽ अप्स्व् अन्तर् नृचक्षा ऽ ईधे दिवो अग्न ऽ ऊधन् । तृतीये त्वा रजसि तस्थिवाꣳसम् अपाम् उपस्थे महिषा ऽ अवर्धन् ॥

samudre tvā nṛmaṇā ' apsv antar nṛcakṣā ' īdhe divo agna ' ūdhan | tṛtīye tvā rajasi tasthivām̐sam apām upasthe mahiṣā ' avardhan ||

अक्रन्दद् अग्नि स्तनयन्न् इव द्यौः क्षामा रेरिहद् वीरुधः समञ्जन् । सद्यो जज्ञानो वि हीम् इद्धो ऽ अख्यद् आ रोदसी भानुना भात्य् अन्तः ॥

akrandad agni stanayann iva dyauḥ kṣāmā rerihad vīrudhaḥ samañjan | sadyo jajñāno vi hīm iddho ' akhyad ā rodasī bhānunā bhāty antaḥ ||

श्रीणाम् उदारो धरुणो रयीणां मनीषाणां प्रार्पणः सोमगोपाः । वसुः सूनुः सहसो ऽ अप्सु राजा वि भात्य् अग्र ऽ उषसाम् इधानः ॥

śrīṇām udāro dharuṇo rayīṇāṃ manīṣāṇāṃ prārpaṇaḥ somagopāḥ | vasuḥ sūnuḥ sahaso ' apsu rājā vi bhāty agra ' uṣasām idhānaḥ ||

विश्वस्य केतुर् भुवनस्य गर्भऽ आ रोदसी ऽ अपृणाज् जायमानः । वीडुं चिद् अद्रिम् अभिनत् परायञ् जना यद् अग्निम् अयजन्त पञ्च ॥

viśvasya ketur bhuvanasya garbha' ā rodasī ' apṛṇāj jāyamānaḥ | vīḍuṃ cid adrim abhinat parāyañ janā yad agnim ayajanta pañca ||

उशिक् पावको अरतिः सुमेधा मर्त्येष्व् अग्निर् अमृतो नि धायि । इयर्ति धूमम् अरुषं भरिभ्रद् उच् छुक्रेण शोचिषा द्याम् इनक्षन् ॥

uśik pāvako aratiḥ sumedhā martyeṣv agnir amṛto ni dhāyi | iyarti dhūmam aruṣaṃ bharibhrad uc chukreṇa śociṣā dyām inakṣan ||

दृशानो रुक्म ऽ उर्व्या व्यद्यौद् दुर्मर्षम् आयुः श्रिये रुचानः । अग्निर् अमृतो ऽ अभवद् वयोभिर् यद् एनं द्यौर् जनयत् सुरेताः ॥

dṛśāno rukma ' urvyā vyadyaud durmarṣam āyuḥ śriye rucānaḥ | agnir amṛto ' abhavad vayobhir yad enaṃ dyaur janayat suretāḥ ||

यस् ते अद्य कृणवद् भद्रशोचेऽपूपं देव घृतवन्तम् अग्ने । प्र तं नय प्रतरं वस्यो ऽ अच्छाभि सुम्नं देवभक्तं यविष्ठ ॥

yas te adya kṛṇavad bhadraśoce'pūpaṃ deva ghṛtavantam agne | pra taṃ naya prataraṃ vasyo ' acchābhi sumnaṃ devabhaktaṃ yaviṣṭha ||

आ तं भज सौश्रवसेष्व् अग्न ऽ उक्थ ऽ उक्थ ऽ आ भज शस्यमाने । प्रियः सूर्ये प्रियो ऽ अग्ना भवात्य् उज् जातेन भिनदद् उज् जनित्वैः ॥

ā taṃ bhaja sauśravaseṣv agna ' uktha ' uktha ' ā bhaja śasyamāne | priyaḥ sūrye priyo ' agnā bhavāty uj jātena bhinadad uj janitvaiḥ ||

त्वाम् अग्ने यजमाना ऽ अनु द्यून् विश्वा वसु दधिरे वार्याणि । त्वया सह द्रविणम् इच्छमाना व्रजं गोमन्तम् उशिजो वि वव्रुः ॥

tvām agne yajamānā ' anu dyūn viśvā vasu dadhire vāryāṇi | tvayā saha draviṇam icchamānā vrajaṃ gomantam uśijo vi vavruḥ ||

अस्ताव्य् अग्निर् नराꣳ सुशेवो वैश्वानर ऽ ऋषिभिः सोमगोपाः । अद्वेषे द्यावापृथिवी हुवेम देवा धत्त रयिम् अस्मे सुवीरम् ॥

astāvy agnir narām̐ suśevo vaiśvānara ' ṛṣibhiḥ somagopāḥ | adveṣe dyāvāpṛthivī huvema devā dhatta rayim asme suvīram ||

समिधाग्निं दुवस्यत घृतैर् बोधयतातिथिम् । आस्मिन् हव्या जुहोतन ॥

samidhāgniṃ duvasyata ghṛtair bodhayatātithim | āsmin havyā juhotana ||

उद् उ त्वा विश्वे देवा ऽ अग्ने भरन्तु चित्तिभिः । स नो भव शिवस् त्वꣳ सुप्रतीको विभावसुः ॥

ud u tvā viśve devā ' agne bharantu cittibhiḥ | sa no bhava śivas tvam̐ supratīko vibhāvasuḥ ||

Sanskrit only: no published translation is held for this verse.

प्रेद् अग्ने ज्योतिष्मान् याहि शिवेभिर् अर्चिभिष् ट्वम् । बृहद्भिर् भानुभिर् भासन् मा हिꣳसीस् तन्वा प्रजाः ॥

pred agne jyotiṣmān yāhi śivebhir arcibhiṣ ṭvam | bṛhadbhir bhānubhir bhāsan mā him̐sīs tanvā prajāḥ ||

Sanskrit only: no published translation is held for this verse.

अक्रन्दद् अग्नि स्तनयन्न् इव द्यौः क्षामा रेरिहद् वीरुधः समञ्जन् । सद्यो जज्ञानो वि हीम् इद्धो ऽ अख्यद् आ रोदसी भानुना भात्य् अन्तः ॥

akrandad agni stanayann iva dyauḥ kṣāmā rerihad vīrudhaḥ samañjan | sadyo jajñāno vi hīm iddho ' akhyad ā rodasī bhānunā bhāty antaḥ ||

प्र-प्रायम् अग्निर् भरतस्य शृण्वे वि यत् सूर्यो न रोचते बृहद् भाः । अभि यः पूरुं पृतनासु तस्थउ दीदाय दैव्यो ऽ अतिथिः शिवो नः ॥

pra-prāyam agnir bharatasya śṛṇve vi yat sūryo na rocate bṛhad bhāḥ | abhi yaḥ pūruṃ pṛtanāsu tasthau dīdāya daivyo ' atithiḥ śivo naḥ ||

आपो देवीः प्रति गृभ्णीत भस्मैतत् स्योने कृणुध्वꣳ सुरभा ऽ उ लोके । तस्मै नमन्तां जनयः सुपत्नीर् मातेव पुत्रं बिभृताप्स्व् एनत् ॥

āpo devīḥ prati gṛbhṇīta bhasmaitat syone kṛṇudhvam̐ surabhā ' u loke | tasmai namantāṃ janayaḥ supatnīr māteva putraṃ bibhṛtāpsv enat ||

Sanskrit only: no published translation is held for this verse.

अप्स्व् अग्ने सधिष् टव सौषधीर् अनु रुध्यसे । गर्भै सन् जायसे पुनः ॥

apsv agne sadhiṣ ṭava sauṣadhīr anu rudhyase | garbhai san jāyase punaḥ ||

गर्भोऽअस्य् ओषधीनां गर्भो वनस्पतीनाम् । गर्भो विश्वस्य भूतस्याग्ने गर्भोऽअपाम् असि ॥

garbho'asy oṣadhīnāṃ garbho vanaspatīnām | garbho viśvasya bhūtasyāgne garbho'apām asi ||

Sanskrit only: no published translation is held for this verse.

प्रसद्य भस्मना योनिम् अपश् च पृथिवीम् अग्ने । सꣳसृज्य मातृभिष् ट्वं ज्योतिष्मान् पुनर् आसदः ॥

prasadya bhasmanā yonim apaś ca pṛthivīm agne | sam̐sṛjya mātṛbhiṣ ṭvaṃ jyotiṣmān punar āsadaḥ ||

Sanskrit only: no published translation is held for this verse.

पुनर् आसद्य सदनम् अपश् च पृथिवीम् अग्ने । शेषे मातुर् यथोपस्थे ऽन्तर् अस्याꣳ शिवतमः ॥

punar āsadya sadanam apaś ca pṛthivīm agne | śeṣe mātur yathopasthe 'ntar asyām̐ śivatamaḥ ||

Sanskrit only: no published translation is held for this verse.

पुनर् ऊर्जा निवर्तस्व पुनर् अग्न ऽ इषायुषा । पुनर् नः पाह्य् अꣳहसः ॥

punar ūrjā nivartasva punar agna ' iṣāyuṣā | punar naḥ pāhy am̐hasaḥ ||

Sanskrit only: no published translation is held for this verse.

सह रय्या नि वर्तस्वाग्ने पिन्वस्व धारया । विश्वप्स्न्या विश्वतस् परि ॥

saha rayyā ni vartasvāgne pinvasva dhārayā | viśvapsnyā viśvatas pari ||

Sanskrit only: no published translation is held for this verse.

बोधा मे ऽ अस्य वचसो यविष्ठ मꣳहिष्ठस्य प्रभृतस्य स्वधावः । पीयति त्वो ऽ अनु त्वो गृणाति वन्दारुष् टे तन्वं वन्दे ऽ अग्ने ॥

bodhā me ' asya vacaso yaviṣṭha mam̐hiṣṭhasya prabhṛtasya svadhāvaḥ | pīyati tvo ' anu tvo gṛṇāti vandāruṣ ṭe tanvaṃ vande ' agne ||

स बोधि सूरिर् मघवा वसुपते वसुदावन् । युयोध्य् अस्मद् द्वेषाꣳसि । विश्वकर्मणे स्वाहा ॥

sa bodhi sūrir maghavā vasupate vasudāvan | yuyodhy asmad dveṣām̐si | viśvakarmaṇe svāhā ||

Sanskrit only: no published translation is held for this verse.

पुनस् त्वाऽऽदित्या रुद्रा वसवः सम् इन्धतां पुनर् ब्रह्माणो वसुनीथ यज्ञैः । घृतेन त्वं तन्वं वर्धयस्व सत्याः सन्तु यजमानस्य कामाः ॥

punas tvā''dityā rudrā vasavaḥ sam indhatāṃ punar brahmāṇo vasunītha yajñaiḥ | ghṛtena tvaṃ tanvaṃ vardhayasva satyāḥ santu yajamānasya kāmāḥ ||

Sanskrit only: no published translation is held for this verse.

अपेत वीत वि च सर्पतातो ये ऽत्र स्थ पुराणा ये च नूतनाः । अदाद् यमो ऽवसानं पृथिव्या ऽ अक्रन्न् इमं पितरो लोकम् अस्मै ॥

apeta vīta vi ca sarpatāto ye 'tra stha purāṇā ye ca nūtanāḥ | adād yamo 'vasānaṃ pṛthivyā ' akrann imaṃ pitaro lokam asmai ||

Sanskrit only: no published translation is held for this verse.

संज्ञानम् असि । कामधरणम् । मयि ते कामधरणं भूयात् । अग्नेर् भस्मास्य् अग्नेः पुरीषम् असि । चित स्थ परिचित ऽ ऊर्ध्वचितः श्रयध्वम् ॥

saṃjñānam asi | kāmadharaṇam | mayi te kāmadharaṇaṃ bhūyāt | agner bhasmāsy agneḥ purīṣam asi | cita stha paricita ' ūrdhvacitaḥ śrayadhvam ||

Sanskrit only: no published translation is held for this verse.

अयꣳ सो ऽ अग्निर् यस्मिन्त् सोमम् इन्द्रः सुतं दधे जठरे वावशानः । सहस्रिणं वाजम् अत्यं न सप्तिꣳ ससवान्त् सन्त् स्तूयसे जातवेदः ॥

ayam̐ so ' agnir yasmint somam indraḥ sutaṃ dadhe jaṭhare vāvaśānaḥ | sahasriṇaṃ vājam atyaṃ na saptim̐ sasavānt sant stūyase jātavedaḥ ||

अग्ने यत् ते दिवि वर्चः पृथिव्यां यद् ओषधीष्व् अप्स्व् आ यजत्र । येनान्तरिक्षम् उर्व् आततन्थ त्वेषः स भानुर् अर्णवो नृचक्षाः ॥

agne yat te divi varcaḥ pṛthivyāṃ yad oṣadhīṣv apsv ā yajatra | yenāntarikṣam urv ātatantha tveṣaḥ sa bhānur arṇavo nṛcakṣāḥ ||

अग्ने दिवोऽ अर्णम् अच्छा जिगास्य् अच्छा देवाꣳ ऽ ऊचिषे धिष्ण्या ये । या रोचने परस्तात् सूर्यस्य याश् चावस्ताद् उपतिष्ठन्त ऽ आपः ॥

agne divo' arṇam acchā jigāsy acchā devām̐ ' ūciṣe dhiṣṇyā ye | yā rocane parastāt sūryasya yāś cāvastād upatiṣṭhanta ' āpaḥ ||

पुरीष्यासो ऽ अग्नयः प्रावणेभिः सजोषसः । जुषन्तां यज्ञम् अद्रुहोऽनमीवा ऽइषो महीः ॥

purīṣyāso ' agnayaḥ prāvaṇebhiḥ sajoṣasaḥ | juṣantāṃ yajñam adruho'namīvā 'iṣo mahīḥ ||

इडाम् अग्ने पुरुदꣳसꣳ सनिं गोः शश्वत्तमꣳ हवमानाय साध । स्यान् नः सूनुस् तनयो विजावाग्ने सा ते सुमतिर् भूत्व् अस्मे ॥

iḍām agne purudam̐sam̐ saniṃ goḥ śaśvattamam̐ havamānāya sādha | syān naḥ sūnus tanayo vijāvāgne sā te sumatir bhūtv asme ||

अयं ते योनिर् ऋत्वियो यतो जातो ऽ अरोचथाः । तं जानन्न् अग्न ऽ आ रोहाथा नो वर्धया रयिम् ॥

ayaṃ te yonir ṛtviyo yato jāto ' arocathāḥ | taṃ jānann agna ' ā rohāthā no vardhayā rayim ||

Sanskrit only: no published translation is held for this verse.

चिद् असि तया देवतयाङ्गिरस्वद् ध्रुवा सीद । परिचिद् असि तया देवतयाङ्गिरस्वद् ध्रुवा सीद ॥

cid asi tayā devatayāṅgirasvad dhruvā sīda | paricid asi tayā devatayāṅgirasvad dhruvā sīda ||

Sanskrit only: no published translation is held for this verse.

लोकं पृण छिद्रं पृणाथो सीद ध्रुवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् ॥

lokaṃ pṛṇa chidraṃ pṛṇātho sīda dhruvā tvam | indrāgnī tvā bṛhaspatir asmin yonāv asīṣadan ||

Sanskrit only: no published translation is held for this verse.

ता अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः ॥

tā asya sūdadohasaḥ somam̐ śrīṇanti pṛśnayaḥ | janman devānāṃ viśas triṣv ā rocane divaḥ ||

Sanskrit only: no published translation is held for this verse.

इन्द्रं विश्वा ऽ अवीवृधन्त् समुद्रव्यचसं गिरः । रथीतमꣳ रथीनां वाजानाꣳ सत्पतिं पतिम् ॥

indraṃ viśvā ' avīvṛdhant samudravyacasaṃ giraḥ | rathītamam̐ rathīnāṃ vājānām̐ satpatiṃ patim ||

समितꣳ सं कल्पेथाꣳ सम्प्रियौ रोचिष्णू सुमनस्यमानौ । इषमूर्जम् अभि संवसानौ ॥

samitam̐ saṃ kalpethām̐ sampriyau rociṣṇū sumanasyamānau | iṣamūrjam abhi saṃvasānau ||

Sanskrit only: no published translation is held for this verse.

सं वां मनाꣳसि सं व्रता सम् उ चित्तान्य् आकरम् । अग्ने पुरीष्याधिपा भव त्वं न ऽ इषमूर्जं यजमानाय धेहि ॥

saṃ vāṃ manām̐si saṃ vratā sam u cittāny ākaram | agne purīṣyādhipā bhava tvaṃ na ' iṣamūrjaṃ yajamānāya dhehi ||

Sanskrit only: no published translation is held for this verse.

अग्ने त्वं पुरीष्यो रयिमान् पुष्टिमाꣳ२ ऽ असि । शिवाः कृत्वा दिशः सर्वाः स्वं योनिम् इहासदः ॥

agne tvaṃ purīṣyo rayimān puṣṭimām̐2 ' asi | śivāḥ kṛtvā diśaḥ sarvāḥ svaṃ yonim ihāsadaḥ ||

Sanskrit only: no published translation is held for this verse.

भवतं नः समनसौ सचेतसाव् अरेपसौ । मा यज्ञꣳ हिꣳसिष्टं मा यज्ञपतिं जातवेदसौ शिवौ भवतम् अद्य नः ॥

bhavataṃ naḥ samanasau sacetasāv arepasau | mā yajñam̐ him̐siṣṭaṃ mā yajñapatiṃ jātavedasau śivau bhavatam adya naḥ ||

Sanskrit only: no published translation is held for this verse.

मातेव पुत्रं पृथिवी पुरीष्यम् अग्निꣳ स्वे योनाव् अभार् उखा । तां विश्वैर् देवैर् ऋतुभिः संविदानः प्रजापतिर् विश्वकर्मा वि मुञ्चतु ॥

māteva putraṃ pṛthivī purīṣyam agnim̐ sve yonāv abhār ukhā | tāṃ viśvair devair ṛtubhiḥ saṃvidānaḥ prajāpatir viśvakarmā vi muñcatu ||

Sanskrit only: no published translation is held for this verse.

असुन्वन्तम् अयजमानम् इच्छ स्तेनस्येत्याम् अन्व् इहि तस्करस्य । अन्यम् अस्मद् इच्छ सा त इत्या नमो देवि निर्ऋते तुभ्यम् अस्तु ॥

asunvantam ayajamānam iccha stenasyetyām anv ihi taskarasya | anyam asmad iccha sā ta ityā namo devi nirṛte tubhyam astu ||

Sanskrit only: no published translation is held for this verse.

नमः सु ते निर्ऋते तिग्मतेजो ऽयस्मयं वि चृता बन्धम् एतम् । यमेन त्वं यम्या संविदानोत्तमे नाके ऽ अधि रोहयैनम् ॥

namaḥ su te nirṛte tigmatejo 'yasmayaṃ vi cṛtā bandham etam | yamena tvaṃ yamyā saṃvidānottame nāke ' adhi rohayainam ||

Sanskrit only: no published translation is held for this verse.

यस्यास् ते घोर ऽ आसन् जुहोम्य् एषां बन्धानाम् अवसर्जनाय । यां त्वा जनो भूमिर् इति प्रमन्दते निर्ऋतिं त्वाहं परि वेद विश्वतः ॥

yasyās te ghora ' āsan juhomy eṣāṃ bandhānām avasarjanāya | yāṃ tvā jano bhūmir iti pramandate nirṛtiṃ tvāhaṃ pari veda viśvataḥ ||

Sanskrit only: no published translation is held for this verse.

यं ते देवी निर्ऋतिर् आबबन्ध पाशं ग्रीवास्व् अविचृत्यम् । तं ते वि ष्याम्य् आयुषो न मध्याद् अथैतं पितुम् अद्धि प्रसूतः । नमो भूत्यै येदं चकार ॥

yaṃ te devī nirṛtir ābabandha pāśaṃ grīvāsv avicṛtyam | taṃ te vi ṣyāmy āyuṣo na madhyād athaitaṃ pitum addhi prasūtaḥ | namo bhūtyai yedaṃ cakāra ||

Sanskrit only: no published translation is held for this verse.

निवेशनः संगमनो वसूनां विश्वा रूपाऽभि चष्टे शचीभिः । देव ऽ इव सविता सत्यधर्मेन्द्रो न तस्थौ समरे पथीनाम् ॥

niveśanaḥ saṃgamano vasūnāṃ viśvā rūpā'bhi caṣṭe śacībhiḥ | deva ' iva savitā satyadharmendro na tasthau samare pathīnām ||

Sanskrit only: no published translation is held for this verse.

सीरा युञ्जन्ति कवयो युगा वि तन्वते पृथक् । धीरा देवेषु सुम्नया ॥

sīrā yuñjanti kavayo yugā vi tanvate pṛthak | dhīrā deveṣu sumnayā ||

युनक्त सीरा वि युगा तनुध्वं कृते योनौ वपतेह बीजम् । गिरा च श्रुष्टिः सभरा असन् नो नेदीयऽ इत् सृण्यः पक्वम् एयात् ॥

yunakta sīrā vi yugā tanudhvaṃ kṛte yonau vapateha bījam | girā ca śruṣṭiḥ sabharā asan no nedīya' it sṛṇyaḥ pakvam eyāt ||

शुनꣳ सु फाला वि कृषन्तु भूमिꣳ शुनं कीनाशा ऽ अभि यन्तु वाहैः । शुनासीरा हविषा तोशमाना सुपिप्पला ऽ ओषधीः कर्तनास्मे ॥

śunam̐ su phālā vi kṛṣantu bhūmim̐ śunaṃ kīnāśā ' abhi yantu vāhaiḥ | śunāsīrā haviṣā tośamānā supippalā ' oṣadhīḥ kartanāsme ||

Sanskrit only: no published translation is held for this verse.

घृतेन सीता मधुना सम् अज्यतां विश्वैर् देवैर् अनुमता मरुद्भिः । ऊर्जस्वती पयसा पिन्वमानास्मान्त् सीते पयसाभ्या ववृत्स्व ॥

ghṛtena sītā madhunā sam ajyatāṃ viśvair devair anumatā marudbhiḥ | ūrjasvatī payasā pinvamānāsmānt sīte payasābhyā vavṛtsva ||

Sanskrit only: no published translation is held for this verse.

लाङ्गलं पवीरवत् सुशेवꣳ सोमपित्सरु । तद् उद् वपति गाम् अविं प्रफर्व्यं च पीवरीं प्रस्थावद् रथवाहनम् ॥

lāṅgalaṃ pavīravat suśevam̐ somapitsaru | tad ud vapati gām aviṃ prapharvyaṃ ca pīvarīṃ prasthāvad rathavāhanam ||

Sanskrit only: no published translation is held for this verse.

कामं कामदुघे धुक्ष्व मित्राय वरुणाय च । इन्द्रायाश्विभ्यां पूष्णे प्रजाभ्य ऽ ओषधीभ्यः ॥

kāmaṃ kāmadughe dhukṣva mitrāya varuṇāya ca | indrāyāśvibhyāṃ pūṣṇe prajābhya ' oṣadhībhyaḥ ||

Sanskrit only: no published translation is held for this verse.

वि मुच्यध्वम् अघ्न्या देवयाना ऽ अगन्म तमसस् पारम् अस्य ज्योतिर् आपाम ॥

vi mucyadhvam aghnyā devayānā ' aganma tamasas pāram asya jyotir āpāma ||

Sanskrit only: no published translation is held for this verse.

सजूर् अब्दो ऽ अयवोभिः सजूर् उषा ऽ अरुणीभिः सजोषसाव् अश्विना दꣳसोभिः सजूः सूर ऽ एतशेन सजूर् वैश्वानर ऽ इडया घृतेन स्वाहा ॥

sajūr abdo ' ayavobhiḥ sajūr uṣā ' aruṇībhiḥ sajoṣasāv aśvinā dam̐sobhiḥ sajūḥ sūra ' etaśena sajūr vaiśvānara ' iḍayā ghṛtena svāhā ||

Sanskrit only: no published translation is held for this verse.

या ओषधीः पूर्वा जाता देवेभ्यस् त्रियुगं पुरा । मनै नु बभ्रूणाम् अहꣳ शतं धामानि सप्त च ॥

yā oṣadhīḥ pūrvā jātā devebhyas triyugaṃ purā | manai nu babhrūṇām aham̐ śataṃ dhāmāni sapta ca ||

शतं वो ऽ अम्ब धामानि सहस्रम् उत वो रुहः । अधा शतक्रत्वो यूयम् इमं मे ऽ अगदं कृत ॥

śataṃ vo ' amba dhāmāni sahasram uta vo ruhaḥ | adhā śatakratvo yūyam imaṃ me ' agadaṃ kṛta ||

ओषधीः प्रति मोदध्वं पुष्पवतीः प्रसूवरीः । अश्वा ऽ इव सजित्वरीर् वीरुधः पारयिष्ण्वः ॥

oṣadhīḥ prati modadhvaṃ puṣpavatīḥ prasūvarīḥ | aśvā ' iva sajitvarīr vīrudhaḥ pārayiṣṇvaḥ ||

ओषधीर् इति मातरस् तद् वो देवीर् उप ब्रुवे । सनेयम् अश्वं गां वास ऽ आत्मानं तव पूरुष ॥

oṣadhīr iti mātaras tad vo devīr upa bruve | saneyam aśvaṃ gāṃ vāsa ' ātmānaṃ tava pūruṣa ||

अश्वत्थे वो निषदनं पर्णे वो वसतिष् कृता । गोभाज ऽ इत् किलासथ यत् सनवथ पूरुषम् ॥

aśvatthe vo niṣadanaṃ parṇe vo vasatiṣ kṛtā | gobhāja ' it kilāsatha yat sanavatha pūruṣam ||

यत्रौषधीः समग्मत राजानः समिताव् इव । विप्रः स ऽ उच्यते भिषग् रक्षोहामीवचातनः ॥

yatrauṣadhīḥ samagmata rājānaḥ samitāv iva | vipraḥ sa ' ucyate bhiṣag rakṣohāmīvacātanaḥ ||

अश्वावतीꣳ सोमावतीमूर्जयन्तीम् उदोजसम् । आवित्सि सर्वा ऽ ओषधीर् अस्मा अरिष्टतातये ॥

aśvāvatīm̐ somāvatīmūrjayantīm udojasam | āvitsi sarvā ' oṣadhīr asmā ariṣṭatātaye ||

उच् छुष्मा ऽ ओषधीनां गावो गोष्ठाद् इवेरते । धनꣳ सनिष्यन्तीनाम् आत्मानं तव पूरुष ॥ इष्कृतिर् नाम वो माताथो यूयꣳ स्थ निष्कृतीः । सीराः पतत्रिणी स्थन यद् आमयति निष्कृथ ॥

uc chuṣmā ' oṣadhīnāṃ gāvo goṣṭhād iverate | dhanam̐ saniṣyantīnām ātmānaṃ tava pūruṣa || iṣkṛtir nāma vo mātātho yūyam̐ stha niṣkṛtīḥ | sīrāḥ patatriṇī sthana yad āmayati niṣkṛtha ||

Sanskrit only: no published translation is held for this verse.

अति विश्वाः परिष्ठा स्तेन इव ऽ व्रजम् अक्रमुः । ओषधीः प्राचुच्यवुर् यत् किं च तन्वो रपः ॥

ati viśvāḥ pariṣṭhā stena iva ' vrajam akramuḥ | oṣadhīḥ prācucyavur yat kiṃ ca tanvo rapaḥ ||

यद् इमा वाजयन्न् अहम् ओषधीर् हस्त ऽ आदधे । आत्मा यक्ष्मस्य नश्यति पुरा जीवगृभो यथा ॥

yad imā vājayann aham oṣadhīr hasta ' ādadhe | ātmā yakṣmasya naśyati purā jīvagṛbho yathā ||

यस्यौषधीः प्रसर्पथाङ्गम्-अङ्गं परुष्-परुः । ततो यक्ष्मं वि बाधध्व ऽ उग्रो मध्यमशीर् इव ॥

yasyauṣadhīḥ prasarpathāṅgam-aṅgaṃ paruṣ-paruḥ | tato yakṣmaṃ vi bādhadhva ' ugro madhyamaśīr iva ||

साकं यक्ष्म प्रपत चाषेण किकिदीविना । साकं वातस्य ध्राज्या साकं नश्य निहाकया ॥

sākaṃ yakṣma prapata cāṣeṇa kikidīvinā | sākaṃ vātasya dhrājyā sākaṃ naśya nihākayā ||

अन्या वो ऽ अन्याम् अवत्व् अन्यान्यस्या ऽ उपावत । ताः सर्वाः संविदाना ऽ इदं मे प्रावता वचः ॥

anyā vo ' anyām avatv anyānyasyā ' upāvata | tāḥ sarvāḥ saṃvidānā ' idaṃ me prāvatā vacaḥ ||

याः फलिनीर् या ऽ अफला ऽ अपुष्पा याश् च पुष्पिणीः । बृहस्पतिप्रसूतास् ता नो मुञ्चन्त्व् अꣳहसः ॥

yāḥ phalinīr yā ' aphalā ' apuṣpā yāś ca puṣpiṇīḥ | bṛhaspatiprasūtās tā no muñcantv am̐hasaḥ ||

मुञ्चन्तु मा शपथ्याद् अथो वरुण्याद् उत । अथो यमस्य पड्वीशात् सर्वस्माद् देवकिल्विषात् ॥

muñcantu mā śapathyād atho varuṇyād uta | atho yamasya paḍvīśāt sarvasmād devakilviṣāt ||

अवपतन्तीर् अवदन् दिव ऽ ओषधयस् परि । यं जीवम् अश्नवामहै न स रिष्याति पूरुषः ॥

avapatantīr avadan diva ' oṣadhayas pari | yaṃ jīvam aśnavāmahai na sa riṣyāti pūruṣaḥ ||

या ऽ ओषधीः सोमराज्ञीर् बह्वीः शतविचक्षणाः । तासाम् असि त्वम् उत्तमारं कामाय शꣳ हृदे ॥

yā ' oṣadhīḥ somarājñīr bahvīḥ śatavicakṣaṇāḥ | tāsām asi tvam uttamāraṃ kāmāya śam̐ hṛde ||

या ऽ ओषधीः सोमराज्ञीर् विष्ठिताः पृथिवीम् अनु । बृहस्पतिप्रसूता ऽ अस्यै सं दत्त वीर्यम् ॥

yā ' oṣadhīḥ somarājñīr viṣṭhitāḥ pṛthivīm anu | bṛhaspatiprasūtā ' asyai saṃ datta vīryam ||

याश् चेदम् उपशृण्वन्ति याश् च दूरं परागताः । सर्वाः संगत्य वीरुधो ऽस्यै सं दत्त वीर्यम् ॥

yāś cedam upaśṛṇvanti yāś ca dūraṃ parāgatāḥ | sarvāḥ saṃgatya vīrudho 'syai saṃ datta vīryam ||

मा वो रिषत् खनिता यस्मै चाहं खनामि वः । द्विपाच् चतुष्पाद् अस्माकꣳ सर्वम् अस्त्व् अनातुरम् ॥

mā vo riṣat khanitā yasmai cāhaṃ khanāmi vaḥ | dvipāc catuṣpād asmākam̐ sarvam astv anāturam ||

ओषधयः सम् अवदन्त सोमेन सह राज्ञा । यस्मै कृणोति ब्राह्मणस् तꣳ राजन् पारयामसि ॥

oṣadhayaḥ sam avadanta somena saha rājñā | yasmai kṛṇoti brāhmaṇas tam̐ rājan pārayāmasi ||

नाशयित्री बलासस्यार्शस ऽउपचिताम् असि । अथो शतस्य यक्ष्माणां पाकारोर् असि नाशनी ॥

nāśayitrī balāsasyārśasa 'upacitām asi | atho śatasya yakṣmāṇāṃ pākāror asi nāśanī ||

Sanskrit only: no published translation is held for this verse.

त्वां गन्धर्वा ऽअखनꣳस् त्वाम् इन्द्रस् त्वां बृहस्पतिः । त्वाम् ओषधे सोमो राजा विद्वान् यक्ष्माद् अमुच्यत ॥

tvāṃ gandharvā 'akhanam̐s tvām indras tvāṃ bṛhaspatiḥ | tvām oṣadhe somo rājā vidvān yakṣmād amucyata ||

Sanskrit only: no published translation is held for this verse.

सहस्व मे ऽ अरातीः सहस्व पृतनायतः । सहस्व सर्वं पाप्मानꣳ सहमानास्य् ओषधे ॥

sahasva me ' arātīḥ sahasva pṛtanāyataḥ | sahasva sarvaṃ pāpmānam̐ sahamānāsy oṣadhe ||

Sanskrit only: no published translation is held for this verse.

दीर्घायुस्त ऽ ओषधे खनिता यस्मै च त्वा खनाम्य् अहम् । अथो त्वं दीर्घायुर् भूत्वा शतवल्शा वि रोहतात् ॥

dīrghāyusta ' oṣadhe khanitā yasmai ca tvā khanāmy aham | atho tvaṃ dīrghāyur bhūtvā śatavalśā vi rohatāt ||

Sanskrit only: no published translation is held for this verse.

त्वम् उत्तमास्य् ओषधे तव वृक्षा ऽ उपस्तयः । उपस्तिर् अस्तु सो स्माकं योऽअस्माꣳ२ऽ अभिदासति ॥

tvam uttamāsy oṣadhe tava vṛkṣā ' upastayaḥ | upastir astu so smākaṃ yo'asmām̐2' abhidāsati ||

मा मा हिꣳसीज् जनिता यः पृथिव्या यो वा दिवꣳ सत्यधर्मा व्यानट् । यश् चापश् चन्द्राः प्रथमो जजान कस्मै देवाय हविषा विधेम ॥

mā mā him̐sīj janitā yaḥ pṛthivyā yo vā divam̐ satyadharmā vyānaṭ | yaś cāpaś candrāḥ prathamo jajāna kasmai devāya haviṣā vidhema ||

Sanskrit only: no published translation is held for this verse.

अभ्या वर्तस्व पृथिवि यज्ञेन पयसा सह । वपां ते अग्निर् ऽ इषितो ऽ अरोहत् ॥

abhyā vartasva pṛthivi yajñena payasā saha | vapāṃ te agnir ' iṣito ' arohat ||

Sanskrit only: no published translation is held for this verse.

अग्ने यत् ते शुक्रं यच् चन्द्रं यत् पूतं यच् च यज्ञियम् । तद् देवेभ्यो भरामसि ॥

agne yat te śukraṃ yac candraṃ yat pūtaṃ yac ca yajñiyam | tad devebhyo bharāmasi ||

Sanskrit only: no published translation is held for this verse.

इषमूर्जम् अहम् इत ऽ आदम् ऋतस्य योनिं महिषस्य धाराम् । आ मा गोषु विशत्वा तनूषु जहामि सेदिम् अनिराम् अमीवाम् ॥

iṣamūrjam aham ita ' ādam ṛtasya yoniṃ mahiṣasya dhārām | ā mā goṣu viśatvā tanūṣu jahāmi sedim anirām amīvām ||

Sanskrit only: no published translation is held for this verse.

अग्ने तव श्रवो वयो महि भ्राजन्ते ऽ अर्चयो विभावसो । बृहद्भानो शवसा वाजम् उक्थ्यं दधासि दाशुषे कवे ॥

agne tava śravo vayo mahi bhrājante ' arcayo vibhāvaso | bṛhadbhāno śavasā vājam ukthyaṃ dadhāsi dāśuṣe kave ||

पावकवर्चाः शुक्रवर्चा ऽ अनूनवर्चा ऽ उद् इयर्षि भानुना । पुत्रो मातरा विचरन्न् उपावसि पृणक्षि रोदसी ऽ उभे ॥

pāvakavarcāḥ śukravarcā ' anūnavarcā ' ud iyarṣi bhānunā | putro mātarā vicarann upāvasi pṛṇakṣi rodasī ' ubhe ||

ऊर्जो नपाज् जातवेदः सुशस्तिभिर् मन्दस्व धीतिभिर् हितः । त्वे ऽ इषः सं दधुर् भूरिवर्पसश् चित्रोतयो वामजाताः ॥

ūrjo napāj jātavedaḥ suśastibhir mandasva dhītibhir hitaḥ | tve ' iṣaḥ saṃ dadhur bhūrivarpasaś citrotayo vāmajātāḥ ||

इरज्यन्न् अग्ने प्रथयस्व जन्तुभिर् अस्मे रायो ऽ अमर्त्य । स दर्शतस्य वपुषो वि राजसि पृणक्षि सानसिं क्रतुम् ॥

irajyann agne prathayasva jantubhir asme rāyo ' amartya | sa darśatasya vapuṣo vi rājasi pṛṇakṣi sānasiṃ kratum ||

इष्कर्तारम् अध्वरस्य प्रचेतसं क्षयन्तꣳ राधसो महः । रातिं वामस्य सुभगां महीम् इषं दधासि सानसिꣳ रयिम् ॥

iṣkartāram adhvarasya pracetasaṃ kṣayantam̐ rādhaso mahaḥ | rātiṃ vāmasya subhagāṃ mahīm iṣaṃ dadhāsi sānasim̐ rayim ||

ऋतावानं महिषं विश्वदर्शतम् अग्निꣳ सुम्नाय दधिरे पुरो जनाः । श्रुत्कर्णꣳ सप्रथस्तमं त्वा गिरा दैव्यं मानुषा युगा ॥

ṛtāvānaṃ mahiṣaṃ viśvadarśatam agnim̐ sumnāya dadhire puro janāḥ | śrutkarṇam̐ saprathastamaṃ tvā girā daivyaṃ mānuṣā yugā ||

आ प्यायस्व सम् एतु ते विश्वतः सोम वृष्ण्यम् । भवा वाजस्य संगथे ॥

ā pyāyasva sam etu te viśvataḥ soma vṛṣṇyam | bhavā vājasya saṃgathe ||

सं ते पयाꣳसि सम् उ यन्तु वाजाः सं वृष्ण्यान्य् अभिमातिषाहः । आप्यायमानो ऽ अमृताय सोम दिवि श्रवाꣳस्य् उत्तमानि धिष्व ॥

saṃ te payām̐si sam u yantu vājāḥ saṃ vṛṣṇyāny abhimātiṣāhaḥ | āpyāyamāno ' amṛtāya soma divi śravām̐sy uttamāni dhiṣva ||

Sanskrit only: no published translation is held for this verse.

आ प्यायस्व मदिन्तम सोम विश्वेभिर् अꣳशुभिः । भवा नः सुश्रवस्तमः सखा वृधे ॥

ā pyāyasva madintama soma viśvebhir am̐śubhiḥ | bhavā naḥ suśravastamaḥ sakhā vṛdhe ||

Sanskrit only: no published translation is held for this verse.

आ ते वत्सो मनो यमत् परमाच् चित् सधस्थात् । अग्ने त्वां कामया गिरा ॥

ā te vatso mano yamat paramāc cit sadhasthāt | agne tvāṃ kāmayā girā ||

तुभ्यं ता ऽ अङ्गिरस्तम विश्वाः सुक्षितयः पृथक् । अग्ने कामाय येमिरे ॥

tubhyaṃ tā ' aṅgirastama viśvāḥ sukṣitayaḥ pṛthak | agne kāmāya yemire ||

अग्निः प्रियेषु धामसु कामो भूतस्य भव्यस्य । सम्राड् एको वि राजति ॥

agniḥ priyeṣu dhāmasu kāmo bhūtasya bhavyasya | samrāḍ eko vi rājati ||

Sanskrit only: no published translation is held for this verse.